ABA ទទួលស្គាល់ជា ធនាគារបម្រើសេវារូបវន្តបុគ្គលដ៏ឆ្នើមប្រចាំឆ្នាំពីទស្សនាវដ្តី Asian Banking and Finance

ធនាគារ ABA ដែលជាធនាគារពាណិជ្ជធំជាងគេនៅកម្ពុជាបានទទួលស្គាល់ជា ធនាគារបម្រើសេវារូបវន្តបុគ្គលដ៏ឆ្នើមនៅកម្ពុជា ជាថ្មីម្តងទៀត ពីទស្សនាវដ្តី Asian Banking and Finance (ABF)។  

នេះជាឆ្នាំទី5 ជាប់ៗគ្នា ដែល ABA ទទួលបានពានរង្វាន់ថ្នាក់តំបន់ដ៏មានកិត្យានុភាពនេះ ដោយទទួលស្គាល់ពីការប្តេជ្ញាចិត្តជាបន្ដបន្ទាប់របស់ធនាគារចំពោះនវានុវត្តន៍ សេវាកម្មល្អឯក និងភាពនាំមុខ លើផ្នែកឌីជីថលនៅក្នុងវិស័យធនាគារកម្ពុជា។  

គណៈវិនិច្ឆ័យរបស់ទស្សនាវដ្តី ABF បានពិចារណាលើសមិទ្ធផលគួរឲ្យកត់សម្កាល់ថ្មីៗរបស់ ABA រួមមានជាអាទិ៍ ការសម្រេចបានអតិថិជនក្នុងដៃប្រមាណ 5.1 លាននាក់ និងកិច្ចខិតខំប្រឹងប្រែងជាបន្ដបន្ទាប់ក្នុងការពង្រឹងសមត្ថភាពកម្មវិធីធនាគារលើទូរស័ព្ទដៃ និងសេវាធនាគារអនឡាញ ដើម្បីបម្រើសេវាជូនអតិថិជនជារូបវន្ដបុគ្គល និងអាជីវកម្មឲ្យកាន់តែប្រសើរឡើងជាលំដាប់។  

ABA Mobile ដែលជាផលិតផលឯករបស់ធនាគារ ទទួលបាន​ការអភិវឌ្ឍសំខាន់ៗ ក្នុងគោលបំណងពង្រឹងសុវត្ថិភាព និងបង្កើនភាពងាយស្រួលជូនដល់អ្នកប្រើប្រាស់។ មុខងារថ្មីៗ រួមមានជាអាទិ៍៖  

• សោមុខ (FacePass Secure): មុខងារសុវត្ថិភាព ប្រើប្រាស់ការសម្គាល់ផ្ទៃមុខរស់ផ្ទាល់ទៅក្នុងកម្មវិធីធនាគារលើទូរស័ព្ទដំបូងគេបង្អស់នៅកម្ពុជា។ មុខងារនេះ ប្រើប្រាស់បច្ចេកវិទ្យាទំនើប ដើម្បីទប់ស្កាត់ការក្លែងបន្លំ ដោយធានាប្រតិបត្តិការរបស់អតិថិជនធ្វើឡើងដោយត្រឹមត្រូវ ស្របតាមឆន្ទៈ និងសុវត្ថិភាព។  
• មុខងារឆាតក្នុង ABA Mobile: មុខងារថ្មីដំបូងបង្អស់ក្នុងប្រទេស ដែលអនុញ្ញាតឲ្យអ្នកប្រើប្រាស់ជជែកសន្ទនា ផ្ញើប្រាក់ និងបញ្ជាក់ប្រតិបត្តិការយ៉ាងសុវត្ថិភាពនៅកន្លែងតែមួយ — ជួយកាត់បន្ថយការក្លែងបន្លំ/ហេគប្រូហ្វាលតាមបណ្ដាញសង្គមនានា​។  
• ណាវី — ជំនួយការនិម្មិតសម្រាប់សេវាធនាគារ: ជា AI ជំនួយការសម្រាប់ផ្ដល់ព័ត៌មាននានាពាក់ព័ន្ធនឹងសេវាធនាគារ ដែលបង្កើតឡើងដើម្បីឆ្លើយតបភ្លាមៗទៅនឹងសំណួរ ឬចម្ងល់ពាក់ព័ន្ធនឹងផលិតផល ឬសេវាកម្មរបស់ ABA។ ណាវីចេះច្រើនភាសា និងបានរចនាឡើងដើម្បីយល់សំណួរ និងផ្ដល់ចម្លើយច្បាស់ ងាយស្រួលយល់ដូចនិយាយជាមួយមនុស្សពិតៗ។ 

ABA ក៏បន្តគាំទ្រអាជីវកម្មតូចធំគ្រប់ប្រភេទផងដែរ។ ផ្លែតហ្វមសេវាធនាគារអនឡាញ ABA Business បានសម្រួលប្រតិបត្តិការហិរញ្ញវត្ថុរបស់អាជីវកម្ម ជាមួយមុខងារល្អៗដូចជា ការទូទាត់ច្រើនដំណាលគ្នា ប្រាក់បៀវត្សរ៍ សេវាប្រមូលប្រាក់ និងការភ្ជាប់ប្រព័ន្ធគណនេយ្យ Cloud។ ក្នុងឆ្នាំ 2024 ចំនួនអ្នកប្រើប្រាស់កើនបាន 24% និង​ទំហំប្រតិបត្តិការសរុបកើនបាន 35%។ 

បណ្ដាស្ថាប័នរដ្ឋាភិបាលជាច្រើន ក៏ប្រើប្រាស់ ABA ដើម្បីគ្រប់គ្រងការទូទាត់ផងដែរ រួមមានជាអាទិ៍ ការប្រមូលពន្ធ បង់ទឹកភ្លើង&សំរាម និងកម្រៃសេវាសាធារណៈផ្សេងៗទៀត – បង្ហាញពីទំនុកចិត្តថែមមួយកម្រិតទៀតមកលើ ABA ដោយមានការទុកចិត្តពីស្ថាប័នរដ្ឋ។   

លោក Askhat Azhikhanov អគ្គនាយក និងជានាយកប្រតិបត្តិនៃធនាគារ ABA មានប្រសាសន៍ថា “យើងខ្ញុំមានមោទនភាពយ៉ាងក្រៃលែងដែលបានទទួលពាន ធនាគារបម្រើសេវារូបវន្តបុគ្គលដ៏ឆ្នើម ជាលើកទីប្រាំ។ ពានរង្វាន់នេះ បានឆ្លុះបង្ហាញពីកិច្ចខិតខំប្រឹងប្រែងជាបន្តបន្ទាប់របស់យើងខ្ញុំ ធ្វើយ៉ាងណាឲ្យសេវាធនាគារកាន់តែងាយស្រួលប្រើប្រាស់ ពេញដោយនវានុវត្ត ដោយគិតគូពីតម្រូវការជាក់ស្ដែងរបស់អតិថិជនជាគោល។ ពានរង្វាន់នេះទៀតសោត ក៏បានបង្ហាញយ៉ាងច្បាស់ពីទំនុកចិត្តរបស់អតិថិជនមកលើធនាគារ ABA ផងដែរ”។ 

នៅក្នុងសំណេរពាក់ព័ន្ធនឹងពានរង្វាន់របស់ធនាគារ ABA នាឆ្នាំនេះ ទស្សនាវដ្តី បានអធិប្បាយថា “ធនាគារ ABA ត្រូវបានទទួលស្គាល់ជា ធនាគារបម្រើសេវារូបវន្តបុគ្គលដ៏ឆ្នើមប្រចាំឆ្នាំ ដោយសារលទ្ធផលដ៏រឹងមាំ ដោយបន្ដនាំមុខក្នុងទីផ្សារទាំងផ្នែករូបវន្ដបុគ្គល និងឌីជីថល។ ​កម្មវិធី ABA Mobile ដែលជាផលិតផលឯករបស់ធនាគារ​ ត្រូវបានគេប្រដូចនឹងការទូទាត់ឌីជីថលនៅកម្ពុជា។ វឌ្ឍនភាពរបស់ធនាគារ គួបផ្សំជាមួយនឹងបណ្ដាញសាខា និងសេវាកម្មដែលបន្ដពង្រីកជាលំដាប់ បានធ្វើឲ្យធនាគារនេះ សម្រេចបាននូវបរិយាបន្នហិរញ្ញវត្ថុនៅកម្ពុជា។” 

ជាមួយការផ្តោតលើនវានុវត្តន៍ និងយុទ្ធសាស្ដ្រផ្ដោតលើអតិថិជនជាគោលចម្បង ធនាគារ ABA តែងតែនាំមុខ ក្នុងការកំណត់ស្ដង់ដារថ្មី សម្រាប់អនាគតវិស័យធនាគារនៅកម្ពុជា។ 

អំពី ABA៖ 

ABA គឺជាធនាគារពាណិជ្ជធំជាងគេនៅកម្ពុជា គិតលើទ្រព្យសកម្មសរុប ប្រាក់បញ្ញើ និងប្រាក់កម្ចី យោងតាមរបាយការណ៍ត្រួតពិនិត្យរបស់ធនាគារជាតិនៃកម្ពុជាឆ្នាំ 2021-2024។

ធនាគារ ABA មាន 101 សាខា, ទីតាំងស្វ័យសេវា ABA 24/7 ចំនួន 45 កន្លែង, ម៉ាស៊ីនស្វ័យសេវាជាង 1,800 នៅទូទាំងប្រទេស, សេវាធនាគារអនឡាញ និងកម្មវិធីធនាគារតាមទូរស័ព្ទដ៏ទំនើប អនុញ្ញាតឲ្យអតិថិជនជាង 5 លាននាក់ ប្រើប្រាស់សេវាហិរញ្ញវត្ថុដ៏ទំនើបសម្បូរបែបនេះ។