ព័ត៌មានអន្ដរជាតិ

អ៊ុយក្រែនសម្លាប់មេបញ្ជាការរងជើងទឹករុស្ស៊ី ធ្វើឲ្យផ្ទុះការចាប់អារម្មណ៍សង្គ្រាមនេះជាថ្មី

បានផុស

១០ ខែ មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

មរណៈភាពរបស់មេបញ្ជាការរងនៃកងទ័ពជើងទឹករុស្ស៊ី បានបង្ហាញការចាប់អារម្មណ៍ជាថ្មីទៀតក្នុងសង្គ្រាមរុស្ស៊ីនិងអ៊ុយក្រែន ដែលបានអូសបន្លាយអស់រយៈពេលជាង៣ឆ្នាំ ដែលមិនទាន់អាចកំណត់ឈ្នះនិងចាញ់ ក៏ដូចជាសញ្ញានៃការបញ្ចប់។

សារព័ត៌មានរុស្ស៊ី TASS បានផ្សាយថា ភាគីរុស្ស៊ីទទួលស្គាល់ថា អគ្គមេបញ្ជាការរងនៃកងទ័ពជើងទឹករុស្ស៊ី លោក Mikhail Gudkov ដែលជាឧត្តមសេនីយ៍ឯកឆ្មាំ និងជាអតីតមេបញ្ជាការកងពលតូចឆ្មាំលេខ១៥៥ នៃកងពលថ្មើរជើងជើងទឹកប៉ាស៊ីហ្វិក ត្រូវបានសម្លាប់នៅក្នុងតំបន់ Kursk។ នេះដោយយោងតាមការអះអាងរបស់ អភិបាលតំបន់ Primorye លោក Oleg Kozhemyako បានរាយការណ៍តាមរយៈ Telegram ។

Kozhemyako បានបន្ថែមថា មិត្តរួមអាវុធ Nariman Shikhaliyev ដែលជាមិត្តស្មោះត្រង់របស់ Gudkov ក៏ត្រូវបានសម្លាប់ដែរ។

តាមសារព័ត៌មាន Al Jazeera អគ្គមេបញ្ជាការរងនៃកងទ័ពជើងទឹករុស្ស៊ី លោក Mikhail Gudkov វ័យ៤២ឆ្នាំ ជាមេបញ្ជាការជាន់ខ្ពស់បំផុតរបស់រុស្ស៊ីត្រូវបានស្លាប់ក្នុងសង្គ្រាម។

អភិបាលនៃតំបន់នៅចុងបូព៌ារបស់រុស្ស៊ី បានសរសេរនៅក្នុងសារ Telegram៖«ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតចំពោះក្រុមគ្រួសារ មិត្តភ័ក្តិ និងអ្នករួមការងាររបស់ Mikhail Gudkov, Nariman Shikhaliyev និងយុទ្ធជនផ្សេងទៀតទាំងអស់ដែលត្រូវបានសម្លាប់នៅក្នុងតំបន់ Kursk»។

អភិបាលក្រុងរូបនេះ បានលើកឡើងថា ឧត្តមសេនីយ៍ឯក Gudkov គឺជាអ្នកប្រយុទ្ធដែលមានឆន្ទៈខ្លាំងដែលមិនឈប់ទៅមើលមុខតំណែងរបស់មន្រ្តីថ្មើរជើងជើងទឹក សូម្បីតែបន្ទាប់ពីគាត់បានចូលកាន់តំណែងជាមេបញ្ជាការរងនៃកងទ័ពជើងទឹករុស្ស៊ីក៏ដោយ។

ក្រសួងការពារជាតិរុស្ស៊ីបានបញ្ជាក់កាលពីថ្ងៃព្រហស្បតិ៍ថា ឧត្តមសេនីយ Gudkov ត្រូវបានសម្លាប់ ខណៈកំពុងបំពេញបេសកកម្មប្រយុទ្ធនៅតំបន់ព្រំដែនមួយនៃតំបន់ Kursk កាលពីថ្ងៃទី២ ខែកក្កដា។

ឧត្តមសេនីយ៍ឯង Gudkov បានចូលរួមក្នុងប្រតិបត្តិការយោធាពិសេសជាមេបញ្ជាការកងពលតូចថ្មើរជើងកងនាវាចរដាច់ដោយឡែកទី១៥៥ ចាប់ពីថ្ងៃទី២៤ ខែកុម្ភៈឆ្នាំ ២០២២។ នៅខែមីនាឆ្នាំ២០២៥ លោកត្រូវបានតែងតាំងជាអគ្គមេបញ្ជាការរងនៃកងទ័ពជើងទឹករុស្ស៊ី។

ប្រធានាធិបតីវ្ល៉ាឌីមៀ ពូទីន បានប្រកាសតែងតាំងលោក Gudkov នៅឯកិច្ចប្រជុំជាមួយនាវិកនៃកងនាវាមុជទឹកដើរដោយថាមពលនុយក្លេអ៊ែរ Arkhangelsk ។ បន្ទាប់មក លោក ពូទីន បានដាក់លោក Gudkov ឱ្យទទួលខុសត្រូវលើកងទ័ពជើងទឹកទាំងមូលរបស់កងទ័ពជើងទឹក និងកងកម្លាំងមីស៊ីល និងកាំភ្លើងធំនៅតាមឆ្នេរសមុទ្រទាំងអស់។

កងទ័ពរបស់ទីក្រុងកៀវរបស់អ៊ុយក្រែន បានសម្រេចចិត្តវាយចូលទឹកដីរុស្ស៊ីក្នុងតំបន់ Kursk ដោយដណ្តើមយកផ្នែកខ្លះនៃតំបន់រុស្ស៊ីសម្រាប់បង្កើតតំបន់ទ្រនាប់ ក្នុងការវាយលុកដ៏គួរឱ្យភ្ញាក់ផ្អើលមួយក្នុងខែសីហា ឆ្នាំ២០២៤។ ទោះបីជាទីក្រុងម៉ូស្គូបានអះអាងកាលពីខែមេសាថា ខ្លួនបានយកមកវិញទាំងស្រុងក៏ដោយ ប៉ុន្តែការប៉ះទង្គិចគ្នានៅក្នុងតំបន់នេះបានបន្ត៕

រ៉ាន់ រើយ