ព័ត៌មានអន្ដរជាតិ

នាយករដ្ឋមន្ត្រីចាំផ្ទះថៃ ផ្តើមសង្ស័យបក្សក្រៅរដ្ឋាភិបាល ជុំវិញស្នើនាយករដ្ឋមន្ត្រីថ្មី ឆ្ពោះទៅវិសោធនកម្មរដ្ឋធម្មនុញ្ញ

បានផុស

១០ ខែ មុន

នៅ

ថ្ងៃចន្ទ ៧ កក្កដា ២០២៥

ដោយ

ខណៈពេលដែលភាពមិនច្បាស់លាស់នៃការវិលទៅកាន់អំណាចវិញរបស់នាយករដ្ឋមន្ត្រី ផែថងថាន ស៊ីណាវ៉ាត្រ ដែលត្រូវបានតុលាការធម្មនុញ្ញព្យួរអំណាច ជម្លោះនយោបាយថៃក៏កាន់តែក្តៅគគុកក្នុងចំណោមគណបក្សដឹកនាំរដ្ឋាភិបាលចម្រុះ និងគណបក្សប្រឆាំងដែលកំពុងកើនឡើងសំឡេងក្នុងសភា។

នាយករដ្ឋមន្ត្រីចាំផ្ទះ លោក លោក ភុមថាំ វិច្ឆាយ៉ាឆៃ និង នាយករដ្ឋមន្ត្រីត្រូវព្យួរអំណាច ផែថងថាន ស៊ីណាវ៉ាត្រ។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន The Nation របស់ថៃ បានផ្សាយថា នាយករដ្ឋមន្ត្រីចាំផ្ទះ លោក ភុមថាំ វិច្ឆាយ៉ាឆៃ (Phumtham Wechayachai) បានដាក់ការសង្ស័យថា គណបក្សភូមិចៃថៃ (Bhumjaithai) ដែលទើបប្រកាសដកខ្លួនពីរដ្ឋាភិបាលចម្រុះកាលថ្ងៃទី១៨ខែមិថុនា ដោយសារតែខឹងនឹងគណបក្សភឿថៃ ដោយសារការដកហូតក្រសួងមហាផ្ទៃ នឹងគាំទ្របក្សប្រជាជន (People’s Party) នៅក្នុងការធ្វើវិសោធនកម្មរដ្ឋធម្មនុញ្ញដែលគណបក្សនេះតែងតែប៉ងចង់ធ្វើ់ក្នុងនយោបាយរបស់ពួកគេ។

លោក ភុមថាំ វិច្ឆាយ៉ាឆៃ នាយករដ្ឋមន្ត្រីចាំផ្ទះ និងជារដ្ឋមន្ត្រីក្រសួងមហាផ្ទៃ បានលើកឡើងនៅថ្ងៃចន្ទនេះ ដោយបង្ហាញនូវការងឿងឆ្ងល់អំពីផែនការរបស់គណបក្សប្រឆាំងដើម្បីស្វែងរកការគាំទ្រពីគណបក្សភូមិចៃថៃ ដើម្បីធ្វើវិសោធនកម្មរដ្ឋធម្មនុញ្ញ បន្ទាប់ពីបានស្នើមេដឹកនាំ នៃគណបក្សភូមិចៃថៃ គឺ លោក អានុទីន ចាន់វីរៈគុល (Anutin Charnvirakul) ជានាយករដ្ឋមន្ត្រីបណ្តោះអាសន្ន នៅពេលដែលអនាគតរបស់នាយករដ្ឋមន្ត្រី ផែថងថាន ស៊ីណាវ៉ាត្រកាន់តែមិនច្បាស់លាស់។

នាយករដ្ឋមន្ត្រីផ្ទះ វិច្ឆាយ៉ាឆៃ ត្រូវបានស្រង់សម្តី ដោយបានកត់សម្គាល់ថា គណបក្សភូមិចៃថៃតែងតែរារាំងដល់ការប៉ុនប៉ងរបស់គណបក្សភឿថៃដែលកំពុងកាន់អំណាចក្នុងការធ្វើវិសោធនកម្មរដ្ឋធម្មនុញ្ញ សូម្បីគណបក្សភូមិចៃថៃនៅក្នុងរដ្ឋាភិបាលចម្រុះនោះក៏ដោយ។

គណបក្សភូមិចៃថៃរបស់លោក អានុទីន ចាន់វីរៈគុល មានសមាជិកសភា៦៩រូប ជាគណបក្សធំលំដាប់លេខ២ក្នុងរដ្ឋាភិបាលចម្រុះដឹកនាំដោយគណបក្សភឿថៃ បានប្រកាសដកខ្លួនចេញពីរដ្ឋាភិបាលចម្រុះ ក្រោយគណបក្សភឿថៃ បានដណ្តើមយកក្រសួងមហាផ្ទៃពីលោក អានុទីន ចាន់វីរៈគុល។ ការចាកចេញរបស់គណបក្សនេះ ធ្វើឲ្យរដ្ឋាភិបាលចម្រុះដឹកនាំដោយគណបក្សភឿថៃបច្ចុប្បន្នមានសំឡេងសភាភាគច្រើនតិចតួចបំផុត ដែលស្ទើរតែដួលរលំទៅហើយ។

ក្នុងករណីគណបក្សណាមួយដែលមានសមាជិកសភាលើសពី១០នាក់ក្នុងរដ្ឋាភិបាលចម្រុះប្រកាសដកខ្លួនចេញទៀតនោះ រដ្ឋាភិបាលចម្រុះនឹងអស់សុពលភាព ហើយ គណបក្សក្រៅរដ្ឋាភិបាលអាចចងសម្ព័ន្ធភាពដើម្បីបង្កើតរដ្ឋាភិបាលចម្រុះបាន ដែលជាប្រកាសធ្វើឲ្យគណបក្សភឿថៃស្ថិតនៅចំណុចមានហានិភ័យខ្ពស់នៃការបាត់បង់ឱកាសដឹកនាំរដ្ឋាភិបាលចម្រុះ។

បច្ចុប្បន្នសមាជិកសភាថៃមាន ៤៩៥សំឡេង ហើយ សមាជិកសភាសរុបក្នុងរដ្ឋាភិបាលចម្រុះមាន៣២៤ ប៉ុន្តែក្រោយការប្រកាសដកខ្លួនរបស់គណបក្សភូមិចៃថៃ សមាជិកសភានៃគណបក្សក្នុងរដ្ឋាភិបាលចម្រុះនៅសល់ត្រឹមតែ២៥៥ ដែលលើមធ្យមភាគ២៤៨ ត្រឹមតែ៧សំឡេងប៉ុណ្ណោះ៕

រ៉ាន់ រើយ