គណៈកម្មាធិការ​អចិន្ត្រៃយ៍សភានឹង​ប្រជុំពិនិត្យសេចក្ដីស្នើ​វិសោធនកម្មរដ្ឋធម្មនុញ្ញនៅ​ថ្ងៃទី​៨ កក្កដា

គណៈម្មាធិការ​អចិន្ត្រៃយ៍​សភានឹង​បើក​កិច្ច​ប្រជុំពិនិត្យលទ្ធផលនៃការពិនិត្យសិក្សារបស់គណៈកម្មការជំនាញលើវិសោធនកម្មរដ្ឋធម្មនុញ្ញមាត្រា៣៣ ដកសញ្ជាតិខ្មែរចំពោះពលរដ្ឋដែលបានប្រព្រឹត្តអំពើក្បត់ជាតិ ឬការធ្វើសកម្មភាពប៉ះពាល់ធ្ងន់ធ្ងរដល់ផលប្រយោជន៍កម្ពុជានៅថ្ងៃទី៨ ខែកក្កដា ស្អែកនេះ មុន​នឹង​ដាក់​ក្នុង​សម័យ​ប្រជុំ​ពេញ​អង្គ​រដ្ឋសភានៅ​ថ្ងៃទី​១១ ខែកក្កដា ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការ​ប្រជុំ​ពិនិត្យគណៈកម្មការ​អចិន្ត្រៃយ៍នេះគឺ​បន្ទាប់​ពី​បាន​ទទួល​យក​សំណើពី​តំណាងរាស្ត្រ​ទាំង​១២៥រូប​ ស្មើ​នឹង​១០០%​នៃ​តំណាង​រាស្ត្រសរុប​ក្នុង​សភានៅ​ព្រឹក​ថ្ងៃច័ន្ទ​នេះ​នឹង​បានប្រគល់ភារកិច្ចនេះជូនគណៈកម្មការជំនាញគឺគណៈកម្មការនីតិកម្មនិងយុត្តិធម៌ ពិនិត្យសិក្សាហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភាវិញ។

យោងតាម​ការ​បញ្ជាក់​ពី​សភាជាតិ៖ «ការធ្វើវិសោធនកម្មមាត្រា៣៣ នៃរដ្ឋធម្មនុញ្ញនៃព្រះរាជាណាចក្រកម្ពុជា ដើម្បីធានាការពារនិងលើកកម្ពស់ផលប្រយោជន៍ប្រទេសជាតិ និងប្រជាពលរដ្ឋ ទប់ស្កាត់ និងប្រឆំាងរាល់សកម្មភាពក្បត់ជាតិដោយបុគ្គល ណា ដែលបានឃុបឃិតជាមួយបរទេសហើយមកបំផ្លាញជាតិ និងបំផ្លាញពលរដ្ឋខ្លួនឯង»។

បើតាម​រដ្ឋសភាការដកសញ្ជាតិខ្មែរពីប្រជាពលរដ្ឋរបស់ខ្លួនណាម្នាក់មិនមែនជារឿងថ្មីនោះទេ។ សម្រាប់កម្ពុជា កាលពីសម័យមុនក៏មានច្បាប់កំណត់អំពីដកសញ្ជាតិខ្មែរ ដូចជា ក្រមរដ្ឋប្បវេណីឆ្នាំ១៩២០ ដែលត្រូវបានធ្វើវិសោធនកម្មជាបន្តបន្ទាប់ និងច្បាប់ស្ដីពីការបាត់សញ្ជាតិខ្មែរ កាលពីថ្ងៃទី១៦ ខែតុលា ឆ្នាំ១៩៦៨ ជាដើម។

មានប្រទេសចំនួនប្រមាណ១៥០នៅលើ ពិភពលោក ទំាងនៅអាស៊ី និងអឺរ៉ុប (មាន២៨ប្រទេស មាន១៨ ប្រទេស មានច្បាប់ដកសញ្ជាតិ ព្រោះប្រទេសទាំងនេះជាបិតាប្រជាធិបតេយ្យ)។ ប្រទេសដែលមានច្បាប់ដកសញ្ជាតិមាន ដូចជា បារាំង, អាម៉េរិក, អង់គ្លេស, អាល្លឺម៉ង់, អូស្ត្រាលី, អ៊ីតាលី, ប៊ែលហ្ស៊ិក, ឥណ្ឌា, កូរ៉េខាងត្បូង និងសិង្ហបុរី ជាដើម សុទ្ធតែមានច្បាប់កំណត់អំពីការដកសញ្ជាតិពីពលរដ្ឋរបស់ខ្លួន ជាពិសេស ក្នុងករណីអំពើធ្វើឱ្យប៉ះពាល់ធ្ងន់ធ្ងរដល់ផលប្រយោជន៍របស់ជាតិ ឬអំពើធ្វើឱ្យប៉ះពាល់ដល់វិស័យសន្តិសុខជាតិ។

រដ្ឋសភាបញ្ជាក់ថា ការធ្វើវិសោធនកម្មមាត្រា៣៣ ក៏នឹងរួមចំណែកយ៉ាងសំខាន់ក្នុងការប្រឆាំងនឹងការជ្រៀតជ្រែកពីខាងក្រៅចូលមកក្នុងកិច្ចការផ្ទៃក្នុងរបស់កម្ពុជា ពិសេស ការប្រឆាំងនឹងអំពើក្បត់ជាតិ និងអំពើឃុបឃិតគ្នាជាមួយបរទេស ដែលនឹងធ្វើឱ្យប៉ះពាល់ធ្ងន់ធ្ងរដល់វិស័យសន្តិសុខជាតិ សេចក្ដីសុខសាន្តរបស់ប្រជាជន និងឧត្តមប្រយោជន៍របស់ប្រទេសជាតិ។

កាលពីថ្ងៃទី២ ខែកក្កដា ឆ្នាំ២០២៥ ក្រុមប្រឹក្សាធម្មនុញ្ញ ក៏បានទួលថ្វាយព្រះមហាក្សត្រថា សេចក្ដីស្នើសុំធ្វើវិសោធនកម្មមាត្រា៣៣ នៃរដ្ឋធម្មនុញ្ញនៃព្រះរាជាណាចក្រកម្ពុជានេះ មិនប៉ះពាល់ដល់ប្រព័ន្ធប្រជាធិបតេយ្យ សេរីពហុបក្ស និងរបបរាជានិយមឡើយ។ សេចក្ដីស្នើសុំធ្វើវិសោធនកម្មមាត្រា៣៣ នៃរដ្ឋធម្មនុញ្ញនៃព្រះរាជាណាចក្រកម្ពុជានេះ អាចធ្វើទៅបាន។

គំនិតផ្ដួចផ្ដើមឱ្យ​មាន​ការ​ធ្វើ​វិសោធនកម្ម​រដ្ឋធម្មនុញ្ញដើម្បី​ដក​សញ្ជាតិ​ពលរដ្ឋ​ខ្មែរ​ណាដែលចូល​ដៃ​ជើង​ជាមួយ​បរទេស​បំផ្លាញ​ប្រយោជន៍​ជាតិ ត្រូវ​បាន​លើក​ឡើង​ដោយ​សម្ដេច​តេជោ ហ៊ុន សែន ក្នុង​ពេល​ដែល​សម្ដេច​ចុះជួបសំណេះសំណាលជាមួយសមាជិកក្រុមប្រឹក្សាឃុំសង្កាត់ ស្រុកក្រុង នៅខេត្តព្រះវិហារកាលពីថ្ងៃទី​២៧ ខែ​មិថុនា ឆ្នាំ២០២៥កន្លងទៅ។ សម្ដេច​ថាការ​សម្រេច​នេះ​គឺ​ដោយ​សារ​អ្នកជ្រុលនិយមខ្លះប្រឆាំងហួសហេតុពេកមិនគិតផលប្រយោជន៍ជាតិ៕

អត្ថបទដោយ ហ៊ុន សិរីវឌ្ឍន៍