តារាចិនជាតួ BL លួចសម្រក់ទឹកភ្នែក បន្ទាប់ពីត្រូវគេជេរប្រមាថលើយន្តហោះ

ពាក្យគន្លឹះ Tian Xu Ning យំលើយន្តហោះ បានជាប់ចំណាត់ថ្នាក់លេខ១ កាលពីថ្ងៃទី ៧ ខែកក្កដា នៅក្នុងចំណោមពាក្យគន្លឹះដែលត្រូវបានគេស្វែងរកច្រើនបំផុតនៅលើបណ្តាញសង្គម Weibo ។ ប្រព័ន្ធផ្សព្វផ្សាយបានរាយការណ៍ថា អ្នកគាំទ្រម្នាដ៏ងុបងល់ម្នាក់បានតាមតារាប្រុសឡើងលើយន្តហោះ ហើយបន្តសួរគាត់ថា តើគាត់បានបែកគ្នាជាមួយមិត្តស្រីរបស់គាត់ឬអត់?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រឈមមុខនឹងទង្វើដ៏ឃោរឃៅពីសំណាក់អ្នកគាំទ្រឆ្កួតៗ តារាសម្ដែងរូបនេះគ្រាន់តែនៅស្ងៀម ហើយបែរមុខទៅរកបង្អួច។ បន្ទាប់​មក​ដោយ​សារ​សម្ពាធ​ខ្លាំង​ពេក គាត់​ក៏​ជូត​ទឹក​ភ្នែក​ចេញ​ថ្នមៗដោយមិនចង់ឲ្យអ្នកណាបានឃើញឡើយ។

នៅលើវេទិកានានា ព័ត៌មានដែលថា តារាសម្ដែងវ័យ២៧ឆ្នាំត្រូវអ្នកគាំទ្រជេរប្រមាថលើយន្តហោះ បណ្តាលឲ្យមានភាពចម្រូងចម្រាសយ៉ាងខ្លាំង។ អ្នក​លេង​អ៊ីនធឺណិត​ភាគ​ច្រើន​បាន​រិះគន់​អ្នក​គាំទ្រ​មានគំនិតឆ្កួតៗនិងងុបងល់ និងបញ្ចេញមតិដូចៗគ្នាថា ហ្វេនម្នាក់នោះ​កំពុង​រំលោភ​សិទ្ធិ​ឯកជន​របស់​តារា​ល្បីៗហើយ។

ក្នុង​ប៉ុន្មាន​ថ្ងៃ​ចុង​ក្រោយ​នេះ តារាចិនបាន​ក្លាយ​ជា​ឈ្មោះ​ពេញ​និយម​បំផុត​ក្នុង​ការ​កម្សាន្ត​របស់​ចិន។ គាត់ត្រូវបានគេស្រឡាញ់សម្រាប់តួនាទីរបស់គាត់ជា Chi Cheng ក្នុងរឿងប្រភេទ BL «Revenged Love»។ ភាពយន្ត​នេះ​បាន​បង្កើត​រលក​ដ៏​ខ្លាំង ដោយ​បាន​ជួយ​តួ​ប្រុស​ពីរ​ដួង​គឺ Tian Xu Ning និង Zi Yu ក្លាយ​ជា​តារា​ល្បីល្បាញភ្លាមៗ។

ក្នុងរយៈពេល ៧ ថ្ងៃគណនី Weibo ផ្ទាល់ខ្លួនរបស់តួចិនបានកើនឡើងយ៉ាងខ្លាំង ជាមួយនឹងអ្នកតាមដានថ្មីជិត១ លាននាក់។ តាមរយៈការបង្ហោះរូបថតត្រឹមតែ ១ សន្លឹក តារាប្រុសរូបនេះទទួលបានទំនាក់ទំនងយ៉ាងច្រើនបន្ទាប់ពីត្រឹមតែ ៥ នាទីប៉ុណ្ណោះ។

ភាពល្បីល្បាញភ្លាមៗបាននាំឲ្យមានពាក្យចចាមអារ៉ាមជាបន្តបន្ទាប់ជុំវិញ Tian Xu Ning។ អ្វី​ដែល​គួរ​ឲ្យ​កត់​សម្គាល់​នោះ​គឺ​ដំណឹង​ដែល​តារា​ប្រុស​មាន​ប្រពន្ធ​កូន​ធ្វើ​ឲ្យ​កក្រើក​បណ្ដាញ​សង្គម។ ក្នុងរយៈពេល៣ ថ្ងៃ មានព័ត៌មានអវិជ្ជមានរាប់រយ និងពាក្យគន្លឹះទាក់ទងនឹងតារាវ័យក្មេងនេះ។ គិតត្រឹមល្ងាចថ្ងៃទី៦ ខែកក្កដា ក្រុមហ៊ុនគ្រប់គ្រងរបស់លោកបានប្រកាសជាផ្លូវការថា តារាប្រុសរូបនេះនៅលីវ មិនដែលរៀបការ និងគ្មានកូនទេ។

ភ្លាមៗនោះលោកក៏បានចេញមុខសុំទោសមហាជន និងអ្នកគាំទ្រថា «អំឡុងពេលនេះរឿងផ្ទាល់ខ្លួនរបស់ខ្ញុំបានទម្លាយព័ត៌មានជាសាធារណៈ ខ្ញុំពិតជាសោកស្តាយខ្លាំងណាស់ដែលបានធ្វើឲ្យប៉ះពាល់ដល់អ្នកដែលយកចិត្តទុកដាក់ និងគាំទ្រខ្ញុំ ខ្ញុំសង្ឃឹមថាអ្នកទាំងអស់គ្នាធ្វើការ និងរស់នៅប្រកបដោយសុខភាពល្អ»។

តារាសម្ដែង Tian Xu Ning កើតក្នុងឆ្នាំ ១៩៩៧ មកពីខេត្ត Shandong រូបលោកមានកម្ពស់ ១ម៉ែត្រនិង៩០សងទីម៉ែត្រ ព្រមទាំងមានមុខមាត់ស្អាតប្លែក។ តារាសម្តែងរូបនេះបានលេចមុខនៅក្នុងខ្សែភាពយន្តជាច្រើនដូចជា Six Sisters, Daydream និង Her, The Mute Wife៕

អត្ថបទ៖ សាង ស្រីល័ក្ខ

ចុចអាន៖ក្រុមឆបោកល្បួងតារាចិន ៤ រូប ធ្លាយទៅដល់ច្រកជួញដូរមនុស្ស ថៃ-មីយ៉ាន់ម៉ា