ក្រោយមានជម្លោះ! កម្ពុជា-ថៃ សម្រេចថាទុកឱ្យកម្លាំងឈរជើងនៅប្រាសាទតាមាន់ធំជាអ្នកស្រាយបញ្ហាផ្ទាល់ មិនត្រូវបន្ថែមកម្លាំងច្រើនលើសលប់ទៀតឡើយ

កងទ័ពកម្ពុជា-ថៃ សម្រេចថាទៅថ្ងៃក្រោយបើមានករណីជាយថាហេតុណាមួយកើតឡើងនៅលើប្រាសាទតាមាន់ធំ ត្រូវទុកលទ្ធភាពឱ្យកងកម្លាំងដែលមានភារកិច្ចជាក់ស្ដែងជាអ្នកដោះស្រាយ មិនត្រូវឱ្យភាគីណាមួយបន្ថែមកម្លាំងច្រើនលើសលប់ចូលមកដោះស្រាយដូចករណីជម្លោះពាក្យសម្ដី កាលពីថ្ងៃទី១៥ ខែកក្កដានោះឡើយ។ ការសម្រេចនេះ នៅក្នុងកិច្ចពិភាក្សារវាងឧត្តមសេនីយ៍ត្រី នាក់ វង្ស មេបញ្ជាការកងពលតូចថ្មើរជើងលេខ៤២ ជាមួយ វរសេនីយ៍ឯក ប៊ុន ស៊ីម មេបញ្ជាការរងកងកម្លាំងសុរ:ណារីថៃ នៅលើប្រាសាទតាមាន់ នៅម៉ោង៨៖៣០ នាទីព្រឹកថ្ងៃទី១៦ ខែកក្កដា។  នេះបើតាមរបាយការណ៍ស្ដីពីលទ្ធផលនៃកិច្ចពិភាក្សា ដែល«កម្ពុជាថ្មី» ទទួលបាន។

កិច្ចពិភាក្សាបានធ្វើឡើងរយៈពេល១ថ្ងៃបន្ទាប់ពី​ កាលពីថ្ងៃទី១៥ ខែកក្កដា កន្លងទៅ មានករណីជម្លោះទាស់ទែងពាក្យសម្ដី និងកាយវិការមួយកើតឡើង ព្រោះតែអាកប្បករិយាមិនសមរម្យរបស់ទាហានថៃ មកលើភ្ញៀវទេសចរជនជាតិខ្មែរ រហូតភាគីកម្ពុជា-ថៃ បង្កើនចំនួនកងទ័ពជាច្រើនលើសលប់(ហួសការឯកភាពលើការឈរជើងជាក់ស្ដែង) ទៅកាន់ទីតាំងជម្លោះដើម្បីដោះស្រាយបញ្ហា។

នៅក្នុងជំនួបពិភាក្សានេះ ភាគីកម្ពុជា ថៃ ក៏បានសម្របសម្រួលចំពោះការប៉ះទង្គិចគ្នាដោយពាក្យសម្តីការពីថ្ងៃទី១៥ខែ កក្កដា និងរក្សាគោលការណ៍ដែលបានកំណត់កាលពីមុន ពោលគឺត្រូវបើកប្រាសាទនៅម៉ោង៩៖០០នាទីព្រឹកតទៅដើម្បីឱ្យប្រជាពលរដ្ឋទាំងសងខាងឡើងទៅទស្សនាជាធម្មតា ហើយចាប់ពីម៉ោង៣៖០០នាទីរសៀលតទៅ ត្រូវបិទមិនអនុញ្ញាតឱ្យប្រជាពលរដ្ឋទាំងសងខាងបន្តលេងកម្សាន្តឬចូលទៅទស្សនាទៀតឡើយ។  ភាគីទាំងពីរក៏កំណត់ឱ្យកម្លាំងឈរជើងប្រចាំការនៅលើប្រាសាទចំនួន៧ នាក់ស្មើៗគ្នាផងដែរ។

នៅតំបន់ប្រាសាទតាមាន់ធំ ថៃបានបង្កបញ្ហាជារឿយៗ  តួយ៉ាងនៅ​ថ្ងៃ​ទី​២២ ខែ​មិថុនា ទាហាន​ថៃ០៣​នាក់ ​បាន​ដឹក​នាំ​ក្រុម​អ្នក​ជិះកង់​​​ជន​ជាតិ​ថៃ​ប្រមាណ​១៥០​នាក់ ចូល​ក្នុង​បរិវេណ​ប្រាសាទ​តាមាន់​ធំ ​ដោយមិន​បាន​ជូន​ដំណឹង​ដល់​ភាគី​កម្ពុជា​ជាមុន​ទាល់តែសោះ​។ បន្ទាប់មក នៅចុងខែមិថុនា អតីតរដ្ឋមន្ត្រីការពារជាតិថៃ ប្រគល់សិទ្ធិចង់ឱ្យ មេភូមិភាគពីរថៃ បិទមិនឱ្យពលរដ្ឋកម្ពុជា ចូលទស្សនាប្រាសាទតាមាន់ធំ។ ក្រោយមកទៀត នៅថ្ងៃទី០៥ ខែកក្កដា ភ្ញៀវទេសចរជនជាតិថៃ ក៏ប្រុងប្រើអំពើហិង្សាមកលើពលរដ្ឋស្លូតត្រង់របស់កម្ពុជា ព្រោះតែឃើញបង់ករក្រមា ដែលមានទង់ជាតិកម្ពុជា។ ថ្មីៗ ថ្នាក់ដឹកនាំថៃ​ ក៏ចង់ធ្វើរបងព័ទ្ធយកប្រាសាទតាមាន់ធំ ដែលផែនទីបារាំងគូសបញ្ជាក់ថា ជាកម្មសិទ្ធិរបស់កម្ពុជាទៀតផង។ នៅថ្ងៃទី១៣ ខែកក្កដា អតីតទាហានថៃ ដ៏កំសាកញីម្នាក់បានលបលួចដាល់កងទ័ពកម្ពុជាម្នាក់។

នៅរសៀលថ្ងៃទី១៥ ខែកក្កដា ក៏កើតមានបញ្ហាម្ដងទៀត ដែលជាបញ្ហាជម្លោះពាក្យសម្ដី និងកាយវិការ បង្កឡើងដោយទាហានថៃម្នាក់ដែលឈរជើងនៅច្រកទ្វារចូលប្រាសាទតាមាន់ធំ មកលើស្ត្រីជាជនជាតិខ្មែរ នាំទៅដល់ការភាន់ច្រឡំ និងការប៉ះទង្គិចពាក្យសម្តី ហើយទាហានថៃនោះក៏បានហាមឃាត់មិនឱ្យស្ត្រីជាជនជាតិខ្មែរឡើងទៅប្រាសាទ។ ដោយឃើញហេតុការណ៍នេះ ទាំងទាហានកម្ពុជា និងទាហានថៃជាច្រើននាក់ដែលកំពុងឈរជើងនៅប្រាសាទ ក៏បានរត់ទៅកាន់កន្លែងកើតហេតុ ប៉ុន្តែមិនមានជម្លោះប្រដាប់ដោយអាវុធអ្វីនោះទេ។ ភ្លាមៗនោះ មេបញ្ជាកម្ពុជា ថៃក៏បានដោះស្រាយដោយសន្តិវិធី ទើបស្ថានភាពនៅប្រាសាទតាមាន់ធំមានសភាពស្ងប់ស្ងាត់ជាធម្មតាវិញ៕

ដោយ៖ ង៉ិល ណារ៉ាត់