សមាជិកសភាចិនមាន​ជំនឿថាប្រទេស​លោក​និង​កម្ពុជា​នឹង​សម្រេច​ចក្ខុវិស័យឆ្នាំ២០៥០​ដូចគ្នា

សមាជិក​សភា​ចិន​ ​វ៉ាង ជីមិន បានលើកឡើងដោយ​មាន​ជំនឿថាកម្ពុជានិង​ចិន នឹង​បន្ត​ធ្វើ​ដំណើរ​រួម​ឆ្ពោះ​សម្រេច​បាន​នូវ​ចក្ខុវិស័យ​ឆ្នាំ​២០៥០របស់​ខ្លួនដោយ​ជោគជ័យ​។ ការ​លើក​ឡើង​នេះ​ក្នុងពេល​ដែល​លោក​ជួបពិភាក្សា​ការ​ងារ​ជាមួយ​ប្រធាន​សភា​កម្ពុជា​កាលពី​ថ្ងៃទី​១៥ ខែ​កក្កដា ឆ្នាំ២០២៥​។

ថ្លែង​ក្នុង​ជំនួប​ជាមួយ​ប្រធាន​សភា​កម្ពុជា​នៅវិមាន​រដ្ឋសភាភ្នំពេញ លោក វ៉ាង ជីមិន បាន​លើក​ឡើង​ថា ប្រទេស​ចិន និង​កម្ពុជា​មាន​ទស្សនវិស័យ​ឆ្នាំ​២០៥០​ដូច​គ្នា ដែល​ចិន​នឹង​ធ្វើ​ឱ្យ​ប្រទេស​ក្លាយ​ជា​ប្រទេស​សង្គមនិយមដ៏រុងរឿងជាប្រទេសប្រជាធិបតេយ្យបែបចិន ខណៈកម្ពុជានឹង​ឆ្ពោះ​ទៅ​កាន់​ប្រទេស​មាន​ចំណូល​ខ្ពស់។

លោកបានជម្រាបជូន​ប្រធាន​សភាកម្ពុជាពី​គោលបំណងពង្រឹង​ពង្រីក​កិច្ចសហប្រតិបត្តិការសភាប្រទេសទំាងពីរបន្ថែមទៀតពិសេសការផ្លាស់ប្តូរបទពិសោធន៍ជាមួយ គណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈនិងទេសចរណ៍ នៃរដ្ឋសភាកម្ពុជា។

ប្រធានសភាកម្ពុជា​ សម្ដេច​សភាធិបតី ឃួន សុដារី មាន​ប្រសាសន៍​ថា​បច្ចុប្បន្ន​ទំនាក់ទំនង​រវាង​កម្ពុជា​និង​ចិន​កាន់​តែ​ស៊ីជម្រៅខ្លាំង សំដៅ​សម្រេច​បាន​ការ​កសាង​សហគមន៍វាសនារួម កម្ពុជា-ចិន ក្នុងយុគសម័យថ្មីប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់។ សម្ដេច​បន្ថែមថា ក្នុងអំឡុងដំណើរទស្សនកិច្ចផ្លូវរដ្ឋរបស់ប្រធានាធិបតី ស៊ី ជីនពីង នៅដើមឆ្នាំនេះនៅកម្ពុជា មាន​សម្រេច​នូវ​ឯកសារចំនួន៣៧ ដែល​បានពង្រឹងទំនាក់ទំនងប្រទេសទំាងពីរឱ្យកាន់តែរឹងមាំ និងបាន នាំមកនូវផលប្រយោជន៍កាន់តែច្រើនឡើងជូនប្រជាពលរដ្ឋទំាងសងខាង។

ក្រៅពីការជំរុញការវិនិយោគនិងការទាក់ទាញអ្នកទេសចរពីប្រទេសចិនមកកម្ពុជាបន្ថែមទៀត សម្តេចប្រធានរដ្ឋសភា មានសុទិដ្ឋនិយមថា សភាតំណាងប្រជាជនចិន និងគំាទ្រកម្ពុជាបន្ថែមទៀតលើវិស័យអប់រំ បណ្តុះបណ្តាលធនធានមនុស្ស និងវិស័យសុខាភិបាល ដោយហេតុថាវិស័យទំាងពីរនេះ សុទ្ធសឹងជាវិស័យអាទិភាព ជួយដល់ប្រជាពលរដ្ឋ ពីព្រោះថាទំាងការអប់រំនិងសុខភាពជាកត្តាចំបងក្នុងការជំរុញគោលដៅអភិវឌ្ឍន៍របស់កម្ពុជាក្លាយជាប្រទេសមានចំណូលមធ្យមកម្រិតខ្ពស់ឆ្នាំ២០៣០និងប្រទេសមានចំណូលខ្ពស់នៅឆ្នាំ២០៥០ផងដែរ៕

អត្ថបទដោយ ហ៊ុន សិរីវឌ្ឍន៍