កម្ពុជា ប្តេជ្ញាបន្តផ្តល់ការអប់រំដល់យុវជនប្រកបដោយគុណភាព ដើម្បីការអភិវឌ្ឍជាតិ

លោក សេរី ជំនះ រដ្ឋលេខាធិការក្រសួងអប់រំយុវជននិងកីឡាបានលើកឡើងថា កម្ពុជាប្តេជ្ញាបន្តផ្តល់ការអប់រំប្រកបដោយគុណភាព និងបរិយាបន្ន, ពង្រឹងពង្រីកការអភិវឌ្ឍជំនាញ និងចំណេះដឹងឌីជីថល, និងបង្កើតឱកាសបន្ថែមសម្រាប់យុវជន ដើម្បីអភិវឌ្ឍប្រទេសជាតិប្រកបដោយចីរភាព។

ការលើកឡើងរបស់លោកសេរី ជំនះនេះក្នុងឱកាសថ្លែងបទអន្តរាគមន៍ឆ្លើយតបនឹងប្រធានបទស្តីពីភាពជាអ្នកដឹកនាំយុវជន៖ កម្លាំងដ៏ចាំបាច់ក្នុងការបង្កើតអនាគតប្រកបដោយចីរភាព និងបរិយាបន្នសម្រាប់ទាំងអស់គ្នានៅក្នុងវេទិកាយុវជនក្រុមប្រឹក្សាសេដ្ឋកិច្ច និងសង្គម នៃអង្គការសហប្រជាជាតិឆ្នាំ២០២៦។

លោក សេរី ជំនះបានគូសបញ្ជាក់ថា «នៅកម្ពុជា យុវជនគឺជាកម្លាំងជំរុញនៃការផ្លាស់ប្តូរ។ ជាង ៦០ ភាគរយនៃប្រជាជនកម្ពុជាមានអាយុក្រោម ៣៥ ឆ្នាំ។ ដូច្នេះ ការពង្រឹងសមត្ថភាពយុវជនគឺស្ថិតនៅចំណុចកណ្ដាលនៃរបៀបវារៈអភិវឌ្ឍន៍របស់កម្ពុជា»។

លោកបានបន្តថាផ្អែកលើយុទ្ធសាស្ត្របញ្ចកោណ និងគោលនយោបាយជាតិស្តីពីការអភិវឌ្ឍយុវជនកម្ពុជា កម្ពុជាសម្រេចបានវឌ្ឍនភាពគួរឱ្យកត់សម្គាល់ ក្នុងការពង្រឹងសមត្ថភាពយុវជនលើជំនាញ ចំណេះដឹង និងឱកាស ដើម្បីប្រែក្លាយខ្លួនជាអ្នកដឹកនាំប្រកបដោយទំនុកចិត្ត និងទំនួលខុសត្រូវ។ ភាពជាអ្នកដឹកនាំរបស់យុវជនពិតជាមានសារៈសំខាន់ក្នុងការដោះស្រាយបញ្ហាប្រឈមដ៏ស្មុគស្មាញនៃសាកលលោកបច្ចុប្បន្ន។

ចំណែកក្រសួងអប់រំយុវជន និងកីឡានៃព្រះរាជាណាចក្រកម្ពុជា បានអនុវត្តកម្មវិធីអភិវឌ្ឍយុវជនជាច្រើន រួមមាន កម្មវិធីមនសិការពលរដ្ឋល្អ, ជជែកដេញដោលយុវជន,ស្ម័គ្រចិត្តដើម្បីសហគមន៍ខ្ញុំ, យុវជន២១, ប្រកួតប្រជែងស្ទែម,កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត, ការអប់រំឌីជីថល និងការអប់រំហិរញ្ញវត្ថុ ជាដើម។

លោកបានបន្តទៀតថាគំនិតផ្តួចផ្តើមទាំងនេះ បានជួយយុវជនរាប់ពាន់នាក់នៅទូទាំងប្រទេស ពង្រឹងសមត្ថភាព បំណិន ឱកាសការងារ និងការចូលរួមក្នុងការងារសង្គម។ លើសពីនេះ ក្រុមប្រឹក្សាយុវជន និងកុមារកម្ពុជា និងកងល្បាតកាយរឹទ្ធិ នៅតាមសាលារៀន ផ្តល់ឱកាសយ៉ាងពិតប្រាកដដល់យុវជន និងកុមារ ក្នុងការរៀនសូត្រ ដឹកនាំ ស្ម័គ្រចិត្ត ធ្វើជាតំណាង និងចូលរួមធ្វើការសម្រេចចិត្តក្នុងក្របខណ្ឌសាលារៀន និងសហគមន៍របស់ពួកគេ។

លោកបានបន្ថែមថា«ការលើកកម្ពស់ការអប់រំពហុភាសា ការអប់រំបរិយាបន្ន និងការអប់រំពិសេស ចំពោះកុមារជនជាតិដើមភាគតិច និងកុមារមានពិការភាព ត្រូវបានយកចិត្តទុកដាក់យ៉ាងសំខាន់ពីរាជរដ្ឋាភិបាលកម្ពុជា។ទោះយ៉ាងណា បញ្ហាប្រឈមនៅតែមាន ជាពិសេស គម្លាតរវាងយុវជននៅតំបន់ជនបទដាច់ស្រយាល និងទីប្រជុំជន ចំពោះការទទួលបានការអប់រំប្រកបដោយគុណភាព និងសេដ្ឋកិច្ចឌីជីថល»។

លោកបានបន្ថែមទៀតថាកម្ពុជាប្តេជ្ញាបន្តផ្តល់ការអប់រំប្រកបដោយគុណភាព និងបរិយាបន្ន, ពង្រឹងពង្រីកការអភិវឌ្ឍជំនាញ និងចំណេះដឹងឌីជីថល, និងបង្កើតឱកាសបន្ថែមសម្រាប់យុវជន ដើម្បីដោះសោរសក្តានុពលរបស់ខ្លួន។ ការវិនិយោគលើយុវជន គឺជាការកសាងអនាគតប្រកបដោយចីរភាព បរិយាបន្ន និងភាពធន់សម្រាប់ទាំងអស់គ្នា៕

អត្ថបទ៖សំអឿន