អ្នកនាំពាក្យ អះអាងថា កម្ពុជានៅតែបន្តគ្រប់គ្រងប្រាសាទព្រះវិហារ និងវត្ត​កែវ​​សិក្ខា​គិរី​ស្វារៈ​

ប្រាសាទព្រះវិហារ និងវត្ត​កែវ​​សិក្ខា​គិរី​ស្វារៈ នៅតែបន្តគ្រប់គ្រងកាន់កាប់ក្នុងដែនអធិបតេយ្យរបស់កម្ពុជា។ នេះជាការអះអាងរបស់អ្នកនាំពាក្យក្រសួងការពារជាតិ លោកស្រី ម៉ាលី សុជាតា នៅព្រឹកថ្ងៃទី២៥ ខែកក្កដា ឆ្នាំ២០២៥នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងរបស់អ្នកនាំពាក្យក្រសួងការពារជាតិកម្ពុជា ជាការច្រានចោលចំពោះការផ្សព្វផ្សាយព័ត៌មានមិនពិតដោយសារព័ត៌មានថៃ The Nation ដែលផ្សាយថា កងទ័ពថៃបានវាយចូលកាន់កាប់ទីតាំងប្រាសាទព្រះវិហារ និងវត្តកែវសិក្ខាគិរីស្វារៈ។

លោកស្រីឧត្តមសេនីយ៍ឯក ម៉ាលី សុជាតា បានលើកឡើងក្នុងសន្និសីទសារព័ត៌មាន នាព្រឹកថ្ងៃនេះ ថា «ក្រសួងការពារជាតិច្រានចោលទាំងស្រុងចំពោះទីតាំងប្រាសាទព្រះវិហារ និងវត្ត​កែវ​​សិក្ខា​គិរី​ស្វារៈ​ គឺយើងនៅគ្រប់គ្រង រក្សាបានទីតាំងនៅក្នុងដែនអធិតេយ្យភាពកម្ពុជាដដែល មិនមានអ្វីដូចដែលសារព័ត៌មានថៃបានលើកឡើងទេ»។

បើតាមលោកស្រីអ្នកនាំពាក្យ កងកម្លាំងកម្ពុជានៅតែឈរជើងដ៏រឹងមាំ ដើម្បីទប់ទល់នឹងការឈ្លានពានដោយកងទ័ពថៃ។ ចំពោះការផ្សាយព័ត៌មានដោយថៃបែបនេះ លោកស្រី ម៉ាលី សុជាតា ចាត់ទុកថា គឺជាព័ត៌មានក្លែងក្លាយ ដើម្បីប្រតិដ្ឋឡើងក្នុងចេតនាបំភ្លៃការពិតតែប៉ុណ្ណោះ។

ក្នុងសន្និសីទសារព័ត៌មានស្ដីពីព្រឹត្តិការណ៍បាញ់ប្រហារគ្នានៅតំបន់ព្រំដែនរវាងកម្ពុជា និងថៃ កាលពីរសៀលថ្ងៃទី២៤ ខែកក្កដា ម្សិលមិញនេះ ឆ្លើយនឹងសំណួរថា តើការផ្សាយព័ត៌មានដោយភាគីថៃពិតដែរឬអត់ជុំវិញសភាពការណ៍ដ៏ក្ដៅគគុកតាមព្រំដែនរវាងកម្ពុជា និងថៃ? លោកស្រីឧត្តមសេនីយ៍ឯក ម៉ាលី សុជាតា តបថា «សារព័ត៌មានថៃ គឺរហ័ស លឿន ក៏ប៉ុន្តែមិនប្រាកដថាការពិតទេ»៕

ដោយ៖ ធឿន វ៉ាន់សុង