យោធិនកម្ពុជាបន្តសិក្សាយោធាជាន់ខ្ពស់នៅជប៉ុន មានមហិច្ឆិតាក្លាយជាមេទ័ពការពារជាតិដូចឪពុក

នាយឯក ហែម រតនា ដែលជានាយទាហាននៃក្រសួងការពារជាតិ នឹងបន្តការសិក្សាថ្នាក់បរិញ្ញាបត្រ នៅបណ្ឌិត្យសភាការពារជាតិជប៉ុន និងកម្មវិធីអប់រំយោធាជាន់ខ្ពស់ ដោយមានគោលបំណងពង្រឹងសមត្ថភាព និងចំណេះដឹងផ្នែកយោធាឲ្យកាន់តែខ្ពង់ខ្ពស់។ រតនា គឺជាបេក្ខភាពបន្តការសិក្សាផ្នែកយោធានៅប្រទេសជប៉ុនរយៈពេល ៥ ចាប់ពីខែមេសា ឆ្នាំ ២០២៦ ផ្នែកកងរាជអាវុធហត្ថ កងទ័ពជើងគោក។

លោកបានថ្លែងប្រាប់កម្ពុជាថ្មី ទាំងទឹកមុខញញឹមដោយបានបង្ហាញអារម្មណ៍សប្បាយរីករាយ និងមានកិត្តិយសយ៉ាងខ្លាំងចំពោះឱកាសសិក្សានៅប្រទេសជប៉ុន ដែលមានប្រព័ន្ធបណ្តុះបណ្តាលយោធាទំនើប និងវិន័យតឹងរឹង។ លោកក៏មានបំណងសិក្សា និងស្វែងយល់ពីរបៀបគ្រប់គ្រង និងបណ្តុះបណ្តាលយោធា ដើម្បីយកមកអនុវត្តនៅកម្ពុជា។

មូលហេតុសំខាន់ដែលជំរុញឲ្យលោកជ្រើសរើសផ្លូវយោធានេះ គឺដោយសារតែឪពុករបស់លោក ដែលជាមេទ័ពប្រចាំទិសនៅខេត្តបាត់ដំបង ជាគំរូនៃភាពក្លាហាន វិន័យ និងការលះបង់ដើម្បីជាតិ។ ដោយមើលឃើញការលះ​បង់របស់ឪពុក លោក រតនា បានបញ្ជាក់ថា ខ្លួនមានបំណងដើរតាមជំហានឪពុក ដើម្បីការពារអធិបតេយ្យភាព និងសន្តិសុខជាតិ។

លោកថ្លែងប្រាប់ថា៖«ខ្ញុំចង់ធ្វើជាមេទ័ពយកគំរូតាមប៉ា ដោយសារប៉ាខ្ញុំគាត់បម្រើការងារនៅខេត្តបាត់ដំបង ខ្ញុំចង់បន្តពីគាត់ដើម្បីជួយដល់ប្រទេសជាតិ ជាពិសេសនៅទិសខេត្តបាត់ដំបង។ ដោយសារប៉ាគាត់ជាមនុស្សដែលច្បាស់លាស់ ហ្មត់ចត់ហើយគាត់ខ្លាំង និងបានជួយប្រទេសជាតិច្រើន ដូច្នេះពេលត្រឡប់មកពីប្រទេសជប៉ុនវិញ ខ្ញុំចង់យកគំរូតាមគាត់ដោយសារគាត់លះបង់ដើម្បីប្រទេសយើង»។

នៅថ្ងៃអនាគត បន្ទាប់ពីបញ្ចប់ការសិក្សា លោក ហែម រតនា មានគោលដៅយកចំណេះដឹង និងបទពិសោធន៍ដែលទទួលបានពីប្រទេសជប៉ុន មកចូលរួមអភិវឌ្ឍវិស័យយោធានៅកម្ពុជា ព្រមទាំងចែករំលែកចំណេះដឹងទៅកាន់សិស្សប្អូនជំនាន់ក្រោយ ដើម្បីបង្កើនសមត្ថភាពកម្លាំងការពារជាតិឲ្យកាន់តែរឹងមាំ។ លោកក៏បានប្តេជ្ញាថា នឹងប្រើប្រាស់ជំនាញដែលបានសិក្សាដើម្បីបម្រើជាតិ និងត្រៀមខ្លួនរួចជាស្រេចក្នុងការការពារប្រទេស ប្រសិនបើមានការគំរាមកំហែងពីសត្រូវឈ្លានពាន។

ឆ្លៀតក្នុងឱកាសនេះ លោកបានថ្លែងអំណរគុណចំពោះរដ្ឋាភិបាលជប៉ុនដែលបានផ្តល់ឱកាស ក៏ដូចជាក្រសួងការពារជាតិដែលបានអនុញ្ញាតឱ្យលោកទៅសិក្សានៅប្រទេសជប៉ុន។ អំឡុងពេលសិក្សា លោកប្តេជ្ញាចិត្តក្នុងការពង្រឹងចំណេះដឹង និងក្លាយជាបុគ្គលដែលមានសមត្ថភាពជាងមុនរួមចំណែកដល់សង្គម និងវិស័យការពារជាតិ និងប្រទេសជាតិ។

កាលពីថ្ងៃទី ១៩ ខែមីនា ឆ្នាំ​២០២៦ ស្ថានទូតជប៉ុនប្រចាំកម្ពុជា បានរៀបចំពិធីជប់លៀងជូនដំណើរយោធិនកម្ពុជាចំនួន៤រូប រួមមាន នាយឯក ហែម រតនា និងយោធិន៣រូបទៀត ដែលនឹងបន្តការសិក្សានៅបណ្ឌិត្យសភាការពារជាតិប្រទេសជប៉ុន និងកម្មវិធីអប់រំយោធាជាន់ខ្ពស់៕