ថៃបន្តបាញ់វាយប្រហារលើកម្ពុជា ដោយប្រើគ្រាប់បែកចង្កោមដែលអន្តរជាតិហាមឃាត់

អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានថ្លែងឱ្យដឹងថា ចាប់ពីខ្ទង់ម៉ោង៣រំលងអធ្រាត្រថ្ងៃទី២៥ ខែកក្កដា ឆ្នាំ២០២៥ កងទ័ពថៃបានបន្តបាញ់ប្រហារមកលើដែនអធិបតេយ្យរបស់កម្ពុជាយ៉ាងគឃ្លើន ដោយប្រើគ្រាប់បែកចង្កោម ដែលច្បាប់អន្តរជាតិហាមឃាត់។

បើតាមលោកស្រីឧត្តមសេនីយ៍ឯក ម៉ាលី សុជាតា នៅព្រឹកថ្ងៃទី២៥ កក្កដា ២០២៥ ភាគីថៃបានបន្តបើកការវាយប្រហារចំនួន៧ទីតាំងមកលើដែនអធិបតេយ្យកម្ពុជា និងបានឈានដល់ការប្រើប្រាស់គ្រាប់បែកចង្កោម ដែលប្រឆាំងនឹងច្បាប់អន្តរជាតិ។ លោកស្រីបានរៀបរាប់ឱ្យដឹងថា៖

– វេលាម៉ោង៣:២០នាទីព្រឹក ភាគីថៃបានបើកការវាយប្រហារនៅតំបន់ភ្នំខ្មោច តាថាវ និងភ្នំ៣៣៣

– វេលាម៉ោង៥:២៥នាទីព្រឹក ភាគីថៃប្រើប្រាស់គ្រាប់បែកចង្កោមវាយប្រហារមកលើតំបន់ភ្នំខ្មោច

– វេលាម៉ោង៥:៣០នាទីព្រឹក ភាគីថៃបានបើកការវាយប្រហារនៅប្រាសាទតាមាន់ និងប្រាសាទតាក្របី

– វេលាម៉ោង៥:៤០នាទីព្រឹក ភាគីថៃបានបើកការវាយប្រហារនៅតំបន់មុំបី

– វេលាម៉ោង៦:៥០នាទីព្រឹក ភាគីថៃបានបាញ់គ្រាប់បែកចង្កោមលើកទី២ មកលើភូមិតេជោធម្មជាតិ ស្រុកជាំក្សាន្ត ខេត្តព្រះវិហារ

– វេលាម៉ោង៧:០៣នាទីព្រឹក ភាគីថៃបានបាញ់គ្រាប់ផ្លោងចូលតំបន់ជាំតែ

– វេលាម៉ោង៨:០០នាទីព្រឹក ភាគីថៃបានព្យាយាមវៃយកប្រាសាទតាក្របីវិញ ប៉ុន្តែកងទ័ពកម្ពុជាបានឈរជើងយ៉ាងរឹងមាំ ក្នុងកិច្ចការពារដែនអធិបតេយ្យ និងបូរណភាពទឹកដី មិនឱ្យថៃឡើងមកវិញទេ។

អ្នកនាំពាក្យក្រសួងការពារជាតិ ថា អំពើឈ្លានពានយ៉ាងកម្រោលរបស់កងទ័ពថៃ ជាការរំលោភបំពានលើច្បាប់អន្តរជាតិ និងអនុសញ្ញាស្ដីពីគ្រាប់បែកចង្កោម ដែលការប្រើប្រាស់អាវុធបែបនេះ មិនត្រឹមតែបង្ហាញពីភាពឃោរឃៅ អមនុស្ស និងឈ្លានពានរបស់ថៃមកលើកម្ពុជាប៉ុណ្ណោះទេ ក៏ប៉ុន្តែថែមទាំងឆ្លុះបញ្ចាំងឱ្យឃើញថា ថៃគ្មានខ្លាចរអាចំពោះច្បាប់មនុស្សធម៌របស់អន្តរជាតិឡើយ។

ការពង្រាយគ្រាប់បែកចង្កោម លោកស្រី ថា ជាការគំរាមកំហែងយូរអង្វែងដល់ជនស៊ីវិល និងបរិស្ថាន ដែលជាឧក្រិដ្ឋកម្មសង្គ្រាមក្រោមច្បាប់អន្តរជាតិ និងការបំផ្លិចបំផ្លាញសន្តិភាព និងសន្តិសុខក្នុងតំបន់៕

ដោយ៖ ធឿន វ៉ាន់សុង