ព័ត៌មានជាតិ

ការនាំចូលរថយន្តពីអាមេរិកបញ្ចុះពន្ធគយសល់ ០% តែនៅជាប់ពន្ធ VAT និងពន្ធអាករពិសេស

បានផុស

៩ ខែ មុន

នៅ

ថ្ងៃសុក្រ ១ សីហា ២០២៥

ដោយ

បើតាមការគូសបញ្ជាក់ពីលោក ស៊ុន ចាន់ថុល ឧបនាយករដ្ឋមន្រ្តីបានថ្លែងនៅក្នុងសន្និសីទសារព័ត៌មានស្តីពីលទ្ធផលនៃការអនុវត្តអត្រាពន្ធគយបដិការរវាងកម្ពុជា និងសហរដ្ឋអាម៉េរិកនៅព្រឹកនេះថា ក្រោយការចរចាពាណិជ្ជកម្មពាក់ព័ន្ធការដាក់ពន្ធបដិកាពីអាមេរិក កម្ពុជានឹងអនុវត្តពន្ធគយ ០% លើការនាំចូលទំនិញពីអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ ឆ្លើយតបសំនួរអ្នកសារព័ត៌មានលើការនាំចូលរថយន្តមួយទឹកពីអាមេរិក តើត្រូវអនុវត្តពន្ធ ០% ឬយ៉ាងណា? លោក ស៊ុន ចាន់ថុល បានឆ្លើយបញ្ជាក់ថា ទោះបីការនាំចូលទំនិញពីអាមេរិកទម្លាក់ពន្ធគយមក ០% តែសម្រាប់ការនាំចូលរថយន្ត នៅតែជាប់កាតព្វកិច្ចក្នុងការបង់ពន្ធផ្សេងទៀតក្នុងនោះមានពន្ធអាករពិសេស និងពន្ធលើតម្លៃបន្ថែម VAT។

បើតាមប្រភពឈ្មួញនាំចូលរថយន្តពីក្រៅប្រទេសមួយរូបបានឲ្យដឹងថា ការនាំចូលរថយន្តមកប្រទេសកម្ពុជា ត្រូវជាប់កាតព្វកិច្ចបង់ពន្ធ ៣ ប្រភេទ ក្នុងនោះរួមមាន ១.ពន្ធគយ ២. ពន្ធអាករពិសេស និង៣. ពន្ធលើតម្លៃបន្ថែម (VAT)។

ក្នុងការចរចាលើការដាក់ពន្ធបដិកាពីអាមេរិក កម្ពុជាសម្រេចមិនយកពន្ធគយរាល់មុខទំនិញនាំចូលពីអាមេរិក ដោយអនុវត្តពីថ្ងៃ ០១ សីហា ឆ្នាំ ២០២៥។ ដោយឡែក អាមេរិកក៏បានសម្រេចបញ្ចុះពន្ធលើទំនិញនាំចេញពីកម្ពុជាទៅកាន់សហរដ្ឋអាមេរិកមកត្រឹម ១៩% ប្រៀបធៀបជាមួយអត្រាពន្ធពីដំបូង ៤៩%៕