ព័ត៌មានជាតិ

មន្ត្រីជាន់ខ្ពស់សុខាភិបាល ចុះពិនិត្យស្ថានភាពផលប៉ះពាល់មណ្ឌលសុខភាពតាមបណ្ដោយព្រំដែនកម្ពុជា-ថៃ ក្រោយផ្ទុះអាវុធ

បានផុស

៩ ខែ មុន

នៅ

ថ្ងៃចន្ទ ១១ សីហា ២០២៥

ដោយ

មន្ត្រីជាន់ខ្ពស់ក្រសួងសុខាភិបាល បានចុះពិនិត្យស្ថានភាពផលប៉ះពាល់មណ្ឌលសុខភាព និងមណ្ឌលសុវត្ថិភាព នៅខេត្តព្រះវិហារ បន្ទាយមានជ័យ និងឧត្តរមានជ័យ តាមព្រំដែនកម្ពុជា-ថៃ ក្រោយផ្ទុះអាវុធ ដើម្បីធ្វើរបាយការណ៍ទៅថ្នាក់ដឹកនាំក្រសួងធ្វើការជួសជុលឡើងវិញសម្រួលដល់ការបម្រើសេវាជូនប្រជាពលរដ្ឋឱ្យបានល្អប្រសើរ។

ក្នុងនោះ ចាប់ពីថ្ងៃទី ០៦ ដល់ថ្ងៃទី ១០ ខែសីហា ឆ្នាំ ២០២៥ ក្រុមការងារបច្ចេកទេសសេវាសុខភាពបឋម នៃក្រសួងសុខាភិបាល ដឹកនាំដោយលោកវេជ្ជបណ្ឌិត នាង ភារិទ្ធ រដ្ឋលេខាធិការ និងក្រុមការងារ បានចុះពិនិត្យការងារ និងសួរសុខទុក្ខមន្ត្រីសុខាភិបាល នៅមណ្ឌលសុខភាព និងប៉ុស្តិ៍សុខភាព នៅតាមបណ្តោយព្រំដែន នៃខេត្តព្រះវិហារ ដែលកំពុងរងផលប៉ះពាល់ដោយសារជម្លោះព្រំដែនកម្ពុជា-ថៃ។

ចំណែក លោកស្រីឱសថការី លី គឹមអេង រដ្ឋលេខាធិការក្រសួងសុខាភិបាល និងក្រុមការងារ បានចុះពិនិត្យស្ថានភាពផលប៉ះពាល់មណ្ឌលសុខភាពចំនួន ១១ កន្លែង និងមណ្ឌលសុវត្ថិភាពចំនួន ២ កន្លែង នៅខេត្តឧត្តរមានជ័យ និងខេត្តបន្ទាយមានជ័យ ដោយសារការផ្ទុះអាវុធនៅតាមបណ្ដោយព្រំដែនកម្ពុជា-ថៃ ដែលបង្កឡើងដោយភាគីថៃ។

មណ្ឌលសុខភាពចំនួន ១១ និង មណ្ឌលសុវត្ថិភាពចំនួន ២ ក្នុងនោះរួមមាន ៖ ១)មណ្ឌលសុខភាព អូរស្មាច់ , ២)មណ្ឌលសុខភាពមនោរម្យ ១ និង ២ , ៣)មណ្ឌលសុខភាពសំរោងសែនជ័យ , ៤)មណ្ឌលសុខភាពគោកភ្លុក , ៥)មណ្ឌលសុខភាពរំដួលសែនជ័យ , ៦)មណ្ឌលសុខភាពហាលៀមសែនជ័យ , ៧)មណ្ឌលសុខភាព ទំនប់ដាច់ , ៨)មណ្ឌលសុខភាព ត្រពាំងប្រាសាទ , ៩)មណ្ឌលសុខភាព គោករមៀត , ១០)មណ្ឌលសុខភាព បឹងត្រកួន , ១១)មណ្ឌលសុខភាព អូរបីជាន់ និងក្រុមគ្រូពេទ្យសង្គ្រោះបឋមប្រចាំការនៅទីទួលសុវត្ថិភាពមួយកន្លែង ក្នុងខេត្តឧត្តរមានជ័យ និងមួយកន្លែងក្នុងខេត្តបន្ទាយមានជ័យ។

ក្នុងឱកាសនោះដែរ លោកស្រីរដ្ឋលេខាធិការ និងក្រុមការងារ បានពាំនាំនូវការសួរសុខទុក្ខពីសំណាក់លោកសាស្ត្រាចារ្យរដ្ឋមន្ត្រី ព្រមទាំងថ្លែងអំណរគុណទៅកាន់មន្ត្រី និងបុគ្គលិកសុខាភិបាលទាំងអស់ ដែលបានខិតខំបម្រើសេវាថែទាំសុខភាពជូនដល់អ្នករងរបួស និងប្រជាពលរដ្ឋភៀសសឹកក្នុងអំឡុងពេលផ្ទុះអាវុធ។

ជាមួយគ្នានេះ លោកស្រីរដ្ឋលេខាធិការ ក៏បានលើកទឹកចិត្តឱ្យមន្ត្រី និងបុគ្គលិកសុខាភិបាលទាំងអស់ ពង្រឹងស្មារតី ជំហរស្មារតី និងបន្តរៀបចំការត្រៀមខ្លួនឱ្យបានរួចរាល់ ទាំងក្នុងការការពារសុវត្ថិភាពផ្ទាល់ខ្លួន និងក្នុងការផ្តល់សេវាសុខាភិបាលដល់ប្រជាពលរដ្ឋក្នុងមូលដ្ឋាន៕

អត្ថបទ ៖ សំអឿន