ត្រីប៉ាវ៉ាមុខពីរ លក់នៅផែក្រុងក្រចេះ​តម្លៃចាប់​ពី​ ២០ ម៉ឺនរៀល ទៅ​​ដល់​​ជាង ៤០ ម៉ឺនរៀល ក្នុង ១ គីឡូក្រាម

ត្រីប៉ាវ៉ាមុខពីរ គឺជាប្រភេទត្រីទឹកសាបធម្មជាតិដ៏កម្រនិងមានតម្លៃថ្លៃបំផុតមួយនៅក្នុងប្រទេស​កម្ពុជា។ តម្លៃត្រឹទឹកសាប​នេះ​អាចប្រែប្រួលចន្លោះពី ២០ ម៉ឺនរៀល ទៅដល់ជាង ៤០ ម៉ឺនរៀល ក្នុង ១ គីឡូក្រាម អាស្រ័យលើទំហំ ទម្ងន់ និងរដូវកាល។

បើ​តាម​ប្រភពពីអាជីវករលក់ត្រីម្នាក់នៅចំណុចផ្សារផែលើខេត្តក្រចេះបានឲ្យដឹងថា តូបរបស់លោកមាន​លក់ត្រីប៉ាវ៉ាមុខពីរចំនួន ២ ក្បាល ដោយមួយក្បាលទម្ងន់ ៥ គីឡូក្រាម និងមួយក្បាលទៀតមាន​ទម្ងន់​ដល់ទៅ ៧ គីឡូក្រាម។

អាជីវកររូបនោះបានបញ្ជាក់ថា តាមពិតទៅក្នុងខែកក្កដានេះ គឺលែងមានត្រីប្រភេទនេះទៀតហើយ ប៉ុន្តែមិនដឹងយ៉ាងម៉េច នៅប៉ុន្មានថ្ងៃមុននេះស្រាប់តែមាន ២ ថ្ងៃជាប់គ្នា ភាគច្រើនត្រីប្រភេទនេះ គឺអស់ត្រឹមខែឧសភា និងខែមិថុនា ចាប់ផ្ដើមខ្សត់លែងមានហើយ ប៉ុន្តែមួយរយៈនេះទឹកទន្លេឡើង ត្រីប៉ាវ៉ាមុខពីរក៏ចាប់ផ្ដើមមានវិញ។

ប្រភពពីមន្ត្រីជំនាញនៃខណ្ឌរដ្ឋបាលជលផលក្រចេះបានឲ្យដឹងថា មូលហេតុចម្បងៗដែលធ្វើឱ្យត្រីប៉ាវ៉ាមុខពីរ មានតម្លៃថ្លៃ ដោយសារកត្តាមួយចំនួន ដូចជា៖ ១. ជាប្រភេទត្រីកម្រ និងជិតផុតពូជ ទីជម្រកមានកំណត់។

ត្រីនេះរស់នៅតែតាមដងទន្លេមេគង្គលើ ក្នុងតំបន់ទឹកជួរមានថ្ម និងមានអន្លង់ជ្រៅៗ ដូចជា នៅក្នុងខេត្តស្ទឹងត្រែង ក្រចេះ និងរតនគិរី។

ប្រឈមនឹងការផុតពូជ៖ តាមការផ្សាយរបស់អង្គការ Wonders of the Mekong ត្រីប៉ាវ៉ាមុខពីរ (ឈ្មោះវិទ្យាសាស្ត្រ៖ Incisilabeo behri) ត្រូវបានចាត់ទុកថាជាប្រភេទត្រីដែលជិតផុតពូជលើភភពផែនដីទៅហើយ។

បច្ចុប្បន្នចំនួនត្រីនេះមានការថយចុះជារៀងរាល់ឆ្នាំ។ អ្នកនេសាទជួនកាលចំណាយពេល ២ ទៅ ៣ ថ្ងៃ ទើបអាចចាប់បានមួយឬពីរតែប៉ុណ្ណោះ ឬថ្ងៃខ្លះមិនបានទាល់តែសោះ។

ត្រីនេះសម្បូរនិងត្រូវប៉ាន់ខ្លាំងតែនៅចន្លោះខែវិច្ឆិកា ដល់ខែកុម្ភៈ (រដូវធ្លាក់ខ្យល់រំហើយ ដែលវាហែលបន្លាស់ទី)។

ត្រីប៉ាវ៉ាស៊ីស្លែជាអាហារ ធ្វើឱ្យសាច់របស់វាមានលក្ខណៈពិសេស ផ្អែមឆ្ងាញ់ខ្លាំង មិនងាយទ្រលាន់។ គេនិយមយកទៅធ្វើជាមុខម្ហូបប្រចាំតំបន់ដូចជា ស្ងោរជ្រក់ ចំហុយ អាំង ឬធ្វើផ្អក។ ដោយសារតម្លៃថ្លៃដូចមាស ពលរដ្ឋធម្មតាមិនសូវហ៊ានទិញបរិភោគឡើយ ពោលគឺមានតែអ្នកមានធនធាន ឬភ្ញៀវទេសចរមកពីចម្ងាយប៉ុណ្ណោះ ដែលបញ្ជាទិញពីតាមបណ្តាភោជនីយដ្ឋាន។

ទោះបីជាតម្លៃត្រីប៉ាវ៉ាមុខពីរ មានតម្លៃថ្លៃខ្ពស់ចន្លោះពី ២០ ម៉ឺន ទៅ ៤៥ ម៉ឺនរៀល ក្នុង១គីឡូ យ៉ាង​ណាក្តី ផ្អែកលើទិន្នន័យផ្សារ ខេត្តក្រចេះ គឺស្ថិតនៅចំណាត់ថ្នាក់លេខ ២ ខណៈត្រីប៉ាសេអ៊ីឈរនៅចំណាត់ថ្នាក់លេខ១ មានតម្លៃថ្លៃដាច់គេនៅលើទីផ្សារកម្ពុជាចាប់ពី ៥០ ម៉ឺន ដល់ ៦៥ ម៉ឺនរៀលក្នុងមួយគីឡូក្រាម​។ មូលហេតុដែលថ្លៃ ដោយសារ​វាជាត្រីកម្រដែលមានរសជាតិឆ្ងាញ់មានខ្លាញ់ច្រើន ក្លិនក្រអូប និងសម្បូរតែនៅតំបន់ទន្លេមេគង្គលើ អំឡុងខែវិច្ឆិកា ដល់ខែកុម្ភៈប៉ុណ្ណោះ៕

អត្ថបទ៖ ប្រុញ វិធិន