ព័ត៌មានជាតិ

រដ្ឋមន្ត្រីអប់រំ ៖ ទោះស្ថានភាពតាមព្រំដែនមិនទាន់ត្រឡប់មកប្រក្រតីភាពក្តី តែបេក្ខជនប្រឡងបាក់ឌុបរក្សាបាននូវស្មារតីនឹងន និងស្ងប់ស្ងាត់

បានផុស

១០ ខែ មុន

នៅ

ថ្ងៃសុក្រ ២៩ សីហា ២០២៥

ដោយ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអះអាងថា បើទោះស្ថានភាពនៅតាមព្រំដែននៅមិនទាន់វិលត្រឡប់មកប្រក្រតីភាពក្តី តែបេក្ខជនប្រឡងបាក់ឌុបទាំងអស់ រក្សាបាននូវស្មារតីនឹងន ស្ងប់ស្ងាត់ និងរបៀបរៀបរយល្អ ខណៈគណៈមេប្រយោគគ្រប់រូប បានអនុវត្តតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវ និងការយកចិត្តទុកដាក់ខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់ លោកឧបនាយករដ្ឋមន្ត្រី នេះ បានធ្វើឡើងនៅព្រឹកថ្ងៃទី ២៩ សីហា ក្នុងឱកាសអញ្ជើញកាត់ប្រធានវិញ្ញាសា និងពិនិត្យស្ថានភាពទូទៅនៅមណ្ឌលប្រឡង វិទ្យាល័យ សិរីសោភ័ណ ខេត្តបន្ទាយមានជ័យ។

ការចុះពិនិត្យដោយផ្ទាល់នេះ ដើម្បីបានឃើញច្បាស់ពីស្ថានភាពជាក់ស្ដែងនៅតាមមណ្ឌលប្រឡង ការអនុវត្តគោលការណ៍ និងបទប្បញ្ញត្តិ នៃការប្រឡងនានា ត្រូវអនុវត្តបានត្រឹមត្រូវតាមគោលការណ៍ណែនាំរបស់ក្រសួង ហើយក៏ជាឱកាសជួបសំណេះសំណាលសួរសុខទុក្ខក្រុមការងារប្រចាំការនៅមណ្ឌលប្រឡង មុនដំណើរការសំណេរចាប់ផ្ដើម។

លោកឧបនាយករដ្ឋមន្ត្រី បានកោតសរសើរ និងថ្លែងអំណរគុណដល់អភិបាល នៃគណៈអភិបាលខេត្តបន្ទាយមានជ័យ ចំពោះកិច្ចសហការប្រកបដោយការយកចិត្តទុកដាក់ជាមួយក្រសួងអប់រំ យុវជន និងកីឡា ក្នុងការជួយគាំទ្រដល់ដំណើរការប្រឡងជារៀងរាល់ឆ្នាំ ជាពិសេសសម្រាប់ឆ្នាំ ២០២៥ នេះ ជាករណីពិសេសដែលកម្ពុជាកំពុងមានវិបត្តិជម្លោះព្រំដែនជាមួយប្រទេសថៃ ដោយសូមយកឱកាសនេះដែរ អំពាវនាវដល់ភាគីពាក់ព័ន្ធទាំងអស់ ឱ្យបន្តជឿជាក់លើចំណាត់ការរបស់រាជរដ្ឋាភិបាលក្នុងការការពារដែនអធិបតេយ្យភាព និងបូរណភាពទឹកដី ដើម្បីឧត្តមប្រយោជន៍របស់ជាតិយើង។

លោកឧបនាយករដ្ឋមន្ត្រី បានបន្តថា បើទោះស្ថានភាពនៅតាមព្រំដែននៅមិនទាន់វិលត្រឡប់មកប្រក្រតីភាពក្តី តែបេក្ខជនប្រឡងទាំងអស់ រក្សាបាននូវស្មារតីនឹងន ស្ងប់ស្ងាត់ និងរបៀបរៀបរយល្អ ខណៈគណៈមេប្រយោគគ្រប់រូប បានអនុវត្តតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវ និងការយកចិត្តទុកដាក់ខ្ពស់។

លោកឧបនាយករដ្ឋមន្ត្រី សូមជូនពរបេក្ខជនប្រឡងទាំងអស់ជោគជ័យក្នុងការប្រឡង ជាពិសេសទទួលបាននិទ្ទេសល្អៗ ដែលខ្លួនប្រាថ្នា ឆ្លើយតបទៅនឹងការខិតខំប្រឹងប្រែងសង្វាតរៀនសូត្រជាច្រើនឆ្នាំមកនេះ និងសូមជូនពរដល់គណៈមេប្រយោគ និងគណៈកម្មការនានា នៃដំណើរការប្រឡង សូមមានសុខសុវត្ថិភាព សុខភាពល្អ និងទទួលបានជោគជ័យក្នុងការបំពេញភារកិច្ច។

គួរបញ្ជាក់ថា ប្រឡងបាក់ឌុបឆ្នាំនេះ ខេត្តបន្ទាយមានជ័យ មានបេក្ខជនចុះឈ្មោះចំនួន ៦.៥៥២ នាក់ ស្រី ៣.៧២៥ នាក់ ចែកជា ៨ មណ្ឌល ក្នុងនោះ មានថ្នាក់វិទ្យាសាស្ត្រសរុប ១.៨២៥ នាក់ / ស្រី ១.១០៧ នាក់ និងថ្នាក់វិទ្យាសាស្ត្រសង្គមចំនួន ៤.៧២៧ នាក់ / ស្រី ២.៦១៨ នាក់៕

អត្ថបទ ៖ សំអឿន

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា