លោក ឃួន ផុនរតនៈ ចូលរួមជាមួយពលរដ្ឋខ្មែរជាង៥ពាន់នាក់ ក្នុងការប្រគុំតន្ត្រីសប្បុរសធម៌ ដើម្បីអង្គាសប្រាក់ជួយកងទ័ព

នៅថ្ងៃទី៥ ខែតុលា ឆ្នាំ២០២៥ លោក ឃួន ផុនរតនៈ ឯកអគ្គរាជទូតតែងតាំង​ ប្រចាំប្រទេសកូរ៉េខាងត្បូង​ បានចូលរួមកម្មវិធីអបអរសាទរ បុណ្យភ្ជុំបិណ្ឌ និងការប្រគុំតន្ត្រីសប្បុរសធម៌ នៅតំបន់ក្វាងជូតូច ប្រទេសកូរ៉េខាងត្បូង​ ដែលរៀបចំដោយមជ្ឈមណ្ឌលគាំពារពលករបរទេសក្វាងជូតូច និងមានការចូលរួមពីប្រជាពលរដ្ឋខ្មែររស់នៅប្រទេសកូរ៉េខាងត្បូងប្រមាណ ៥ពាន់នាក់។

កម្មវិធីនេះ ធ្វើឡើងក្នុងគោលបំណងរៃអង្គាសថវិកាជួយដល់កងទ័ព និងជនភៀសសឹកនៅតាមខ្សែបន្ទាត់ព្រំដែនកម្ពុជា-ថៃ។

ឆ្លៀតក្នុងឱកាសនោះដែរ លោក ឃួន ផុនរតនៈ ក៏បានចូលរួមមតិសំណេះសំណាល និងទស្សនាស្តង់ម្ហូបខ្មែរ​ ព្រមទាំងបានធ្វើការថ្លែងអំណរគុណយ៉ាងជ្រាលជ្រៅដល់តំណាងអាជ្ញាធរពាក់ព័ន្ធ ដែលតែងតែជួយសម្របសម្រួល និងជួយយកចិត្តទុកដាក់គាំពារដល់បពលករ និងប្រជាពលរដ្ឋខ្មែរ​ នៅក្នុងតំបន់ ក៏ដូចជាក្នុងខេត្តខ្យង់គីទាំងមូល៕