អូស្ត្រាលី ប្តេជ្ញាធ្វើការជាមួយរាជរដ្ឋាភិបាល ដើម្បីគាំទ្រលទ្ធិប្រជាធិបតេយ្យនៅកម្ពុជា

អូស្ត្រាលីបានប្រកាសប្តេជ្ញាធ្វើការជាមួយរាជរដ្ឋាភិបាលកម្ពុជា សង្គមស៊ីវិល និងដៃគូអភិវឌ្ឍន៍ផ្សេងៗ ដើម្បីការពារ និងលើកកម្ពស់សិទ្ធិមនុស្ស និងគាំទ្រលទ្ធិប្រជាធិបតេយ្យដែលទទួលបានដោយលំបាកនៅកម្ពុជា។ ការប្រកាសនេះ ធ្វើឡើងក្រោយពីគណៈកម្មាធិការសិទ្ធិមនុស្សកម្ពុជា និងស្ថានទូតអូស្រ្តាលីប្រចាំនៅកម្ពុជាបានជួបជជែកពិភាក្សាគ្នាដោយផ្ទាល់នៅរសៀលថ្ងៃទី២២ ខែវិច្ឆិកា ឆ្នាំ២០២១នេះនៅទីស្នាក់ការគណៈកម្មាធិការសិទ្ធិមនុស្សកម្ពុជា។

ស្ថានទូតអូស្រ្តាលីប្រចាំនៅកម្ពុជាបានសរសេរបញ្ជាក់ឱ្យដឹងនៅលើទំព័រហ្វេសប៊ុករបស់ខ្លូនថា ជំនួបរវាងលោកឯកអគ្គរាជទូតអូស្រ្តាលី Pablo Kang  និងលោកឯកអគ្គរាជទូតរង Andreas Zurbrugg ជាមួយលោកកែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជាទទួលបានផ្លែផ្កាល្អ។ ស្ថានទូតអូស្ត្រាលី បានអះអាងទៀតថា កិច្ចពិភាក្សានេះ គឺមានលទ្ធផលល្អលើសេចក្តីព្រាងច្បាប់របស់គណៈកម្មាធិការសិទ្ធិមនុស្សកម្ពុជាសម្រាប់ស្ថាប័នសិទ្ធិមនុស្សកម្ពុជា ការចូលរួមសិទ្ធិមនុស្សដែលមានសក្តានុពលជាមួយនឹងកម្ពុជាជាប្រធានអាស៊ាននៅឆ្នាំក្រោយ និងការបារម្ភអំពីសិទ្ធិមនុស្សផ្សេងៗទៀត រួមទាំងសារៈសំខាន់នៃការធានាឱ្យមានបរិយាកាសសុវត្ថិភាពសម្រាប់គណបក្សប្រឆាំង និងការប្រឆាំងដោយសន្តិវិធី ដើម្បីឱ្យមានការបោះឆ្នោតពហុបក្សតំណាងពិតប្រាកដ។

ប៉ុន្តែ លោកកែវ រ៉េមី វិញបានអះអាងខ្លីនៅលើហ្វេសប៊ុករបស់លោកថា ជំនួបពិភាក្សាជាមួយទូតអូស្រ្តាលីនេះ គឺជាជំនួបមួយដែលធ្វើឱ្យលោកមានអារម្មណ៍ថា​ ស្វិតស្វាញមិនចាញ់ជួបជាមួយទូតជប៉ុននោះឡើយ៕

អត្ថបទ៖ វណ្ណ សុគន្ធា