លោក ជីវ កក្ដា ជាបេក្ខភាព ប្រធានគណបក្សខ្មែរស្រឡាញ់ជាតិ តែម្នាក់គត់

លោក ជីវ កក្ដា គឺជាបេក្ខភាព ប្រធានគណបក្សខ្មែរស្រឡាញ់ជាតិ តែម្នាក់គត់ ដែលគ្រោងឲ្យសមាជិក-សមាជិកានៃគណបក្សនេះ បោះឆ្នោតផ្ដល់សេចក្ដីទុកចិត្ត នៅចុងខែមករានេះ។ នេះបើតាមការឲ្យដឹងពីលោក ខឺយ ស៊ីនឿន អ្នកនាំពាក្យ នៃគណបក្សខ្មែរស្រលាញ់ជាតិ ដែលបានមានប្រសាសន៍ប្រាប់កម្ពុជាថ្មី នៅព្រឹកថ្ងៃទី ១២ ខែមករា ឆ្នាំ ២០២២ នេះ។

លោក ខឺយ ស៊ីនឿន បានឲ្យដឹងបន្តថា នៅថ្ងៃទី ៣០ ខែមករា ឆ្នាំ ២០២២ខាងមុខនេះ គណៈកម្មាធិការអចិន្ត្រៃយ៍គណបក្សខ្មែរស្រលាញ់ជាតិ នឹងរៀបចំធ្វើសមាជលើកដំបូងរបស់ខ្លួន។ អង្គសមាជលើកដំបូង របស់គណបក្សខ្មែរស្រលាញ់ជាតិ នឹងមានការអញ្ជើញចូលរួមពីសំណាក់ សមាជិក-សមាជិកាមកពីតាមបណ្ដារាជធានី-ខេត្ត ដើម្បីធ្វើការបោះឆ្នោតគាំទ្រសមាសភាពប្រធាន អនុប្រធានប្រចាំការ អនុប្រធាន បេក្ខជនគណៈកម្មាធិការនាយក សមាសភាពគណៈកម្មាធិការអចិន្ត្រៃយ៍ អនុម័តលក្ខន្តិកៈ ព្រមទាំងការកំណត់ទិសដៅ និងគោលនយោបាយគណបក្ស ដើម្បីត្រៀមខ្លួនចូលរួមការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ឆ្នាំ ២០២២ និងការបោះឆ្នោតជ្រើសតាំងតំណាងរាស្រ្ដ ឆ្នាំ ២០២៣ខាងមុខនេះ។

អ្នកនាំពាក្យគណបក្សខ្មែរស្រលាញ់ជាតិ បានឲ្យដឹងបន្ថែមថា លោក ជីវ កក្ដា គឺបេក្ខភាពប្រធានគណបក្សខ្មែរស្រលាញ់ជាតិតែម្នាក់គត់ សម្រាប់ការបោះឆ្នោតផ្ដល់សេចក្ដីទុកចិត្ត នាពេលខាងមុខនេះ។ លោក ខឺយ ស៊ីនឿន មានប្រសាសន៍បន្តថា «នៅក្នុងការត្រៀមដាក់បេក្ខភាពប្រធាន គឺមានឯកឧត្ដម ជីវ កត្តា លោក គឺជាបេក្ខភាពប្រធានគណបក្ស ហើយលោកគឺជាអតីតរាស្ត្រ មកពីអតីតគណបក្សសង្រ្គោះជាតិ និងអតីតតំណាងរាស្រ្ដមកពីគណបក្ស សម រង្ស៊ី»។

ចំណែកបេក្ខភាពអនុប្រធានវិញ មានចំនួន ៣នាក់ រួមមាន៖ ទី១. លោក តាន់ ទីន ជាបេក្ខភាពអនុប្រធានប្រចាំការ។ ទី២. លោក កង គឹមហាក់ អតីតតំណាងរាស្រ្ដ នៃអតីតគណបក្សសង្រ្គោះជាតិ ជាបេក្ខភាពអនុប្រធាន។ លោក ខឺយ ស៊ីនឿន អតីតមន្ត្រីជាន់ខ្ពស់ នៃគណបក្សសង្រ្គោះជាតិ ជាបេក្ខភាពអនុប្រធានគណបក្ស។

សូមជម្រាបថា គណបក្សខ្មែរស្រលាញ់ជាតិ បានចុះបញ្ជីគណបក្សនយោបាយ នៅក្រសួងមហាផ្ទៃ នៅថ្ងៃទី ១០ ខែមេសា ឆ្នាំ ២០២០។ ស្ថាបនិក ដែលបង្កើតគណបក្សនេះ គឺភាគច្រើនមកពីអតីតគណបក្សសង្រ្គោះជាតិ៕

អត្ថបទ៖ ឃួន សុភ័ក្រ