សម្ដេច ស ខេង ប្រាប់ទូតអឺរ៉ុបថា ការបោះឆ្នោតក្រុមប្រឹក្សាឃុំ-សង្កាត់ គឺបង្ហាញភាពចម្រុះនៃប្រជាធិបតេយ្យនៅមូលដ្ឋាន

ក្នុងជំនួបពិភាក្សាការងារ ជាមួយប្រតិភូនៃអគ្គរដ្ឋទូតសហភាពអឺរ៉ុបចំនួន ៤ប្រទេស ដឹកនាំដោយលោកស្រី ខាមិន ម៉ូរ៉េណូ ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា កាលពីរសៀលថ្ងៃទី ២៦ ខែឧសភា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ គឺដើម្បីកសាងប្រជាធិបតេយ្យ ឲ្យមានភាពចម្រុះនៅថ្នាក់មូលដ្ឋាន ហើយមូលដ្ឋានត្រូវកសាងភាពម្ចាស់ការ ជាមួយប្រជាពលរដ្ឋរបស់ខ្លួនផ្ទាល់។

បើតាមសម្ដេច ស ខេង ដំណើរការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់នេះ បានបង្ហាញថា ប្រជាពលរដ្ឋកាន់តែមានការគាំទ្រ ទៅលើការបោះឆ្នោតថ្នាក់មូលដ្ឋាន ខណៈការបោះឆ្នោតមួយទៅការបោះឆ្នោតមួយ គឺប្រជាពលរដ្ឋមានការយល់ដឹងកាន់តែច្រើន។

នៅក្នុងជំនួបនេះ សម្ដេច ស ខេង ក៏បានប្រាប់ទូតសហភាពអឺរ៉ុប ថា ក្នុងការងារពង្រឹងប្រជាធិបតេយ្យនៅមូលដ្ឋាន រាជរដ្ឋាភិបាលកម្ពុជា បាននិងកំពុងខិតខំអនុវត្តកំណែទម្រង់វិមជ្ឈការ និងវិសហមជ្ឈការ ដោយបន្តផ្ទេរមុខងារ ធនធានថវិកា និងធនធានហិរញ្ញវត្ថុដល់ថ្នាក់មូលដ្ឋាន ដើម្បីអនុវត្តភារកិច្ចប្រកប​ដោយប្រសិទ្ធភាព ។ 

សម្ដេចក្រឡាហោម ក៏យកឱកាសនេះស្នើសុំដល់សហភាពអឺរ៉ុប បន្តគាំទ្រដល់កិច្ចការកំណែទម្រង់វិមជ្ឈការ និងវិសហមជ្ឈការ ជាពិសេសគឺបន្តជួយគាំទ្រការចែករំលែកបទពិសោធ ពាក់ព័ន្ធនឹងការបណ្ដុះ បណ្ដាលធនធានមនុស្ស ដើម្បីមានសមត្ថភាពកាន់តែសមស្រប បម្រើប្រជាពលរដ្ឋក្នុងមូលដ្ឋាន ក៏ដូចជា ការងារអភិវឌ្ឍមូលដ្ឋានរបស់ខ្លួន៕

អត្ថបទ៖ ធឿន វ៉ាន់សុង