សម្ដេចតេជោ ហ៊ុន សែន ៖ លេខរៀងទី ១៨ របស់គណបក្សប្រជាជនកម្ពុជា នៅលើសន្លឹកឆ្នោត គឺជាលេខហុងស៊ុយ​

សម្ដេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានថ្លែងថា លេខរៀងទី ១៨ របស់គណបក្សប្រជាជនកម្ពុជា នៅលើសន្លឹកឆ្នោត គឺជាលេខហុងស៊ុយ ហើយងាយស្រួលរកណាស់នៅលើសន្លឹកឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងរបស់សម្តេចតេជោ ហ៊ុន សែន បានធ្វើឡើងក្នុងសម្ពោធអគារសិក្សាថ្មី នៃពុទ្ធិកសាកលវិទ្យាល័យព្រះសីហមុនីរាជា ស្ថិតក្នុងបរិវេណ វត្តស្វាយពពែ នាព្រឹកថ្ងៃទី ៣០ ខែឧសភា ឆ្នាំ ២០២៣នេះ។

សូមជម្រាបថា គណៈកម្មាធិការជាតិរៀបចំការបោះឆ្នោត (គ.ជ.ប) កាលពីព្រឹកថ្ងៃទី ២៩ ខែឧសភានេះ បានរៀបចំពិធីចាប់ឆ្នោត ដើម្បីកំណត់លំដាប់លេខរៀង ឈ្មោះគណបក្សនយោបាយឈរឈ្មោះបោះឆ្នោត នៅលើសន្លឹកឆ្នោត សម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី ៧ ឆ្នាំ ២០២៣។ 

ពិធីនេះ ធ្វើឡើងក្រោមព្រះរាជាអធិបតីភាពសម្ដេចព្រះសង្ឃរាជទាំងពីរគណៈ និងក្រោមអធិបតីភាពលោក ប្រាជ្ញ ចន្ទ ប្រធាន គ.ជ.ប ព្រមទាំងមានការចូលរួមពីតំណាងក្រសួង-ស្ថាប័នពាក់ព័ន្ធ តំណាងគណបក្សនយោបាយ តំណាងអង្គការ-សមាគម ព្រមទាំងអ្នកសារព័ត៌មានជាច្រើនរូបទៀត។ ជាលទ្ធផលបង្ហាញថា គណបក្សប្រជាជនកម្ពុជា ទទួលបានលេខរៀងទី ១៨ នៅលើសន្លឹកឆ្នោត។   

សម្ដេចតេជោ ហ៊ុន សែន ថ្លែងបែបនេះថា «សម្ដេចអ្នកទៅចាប់ឆ្នោតស្រាប់ហើយ មិនមែនចាប់ប៉ះលេខ ១ ប៉ះលេខ ២អីទេ ចាប់ចំលេខ ១៨ តែម្ដង ហើយ ១៨ ៨បូក ១ ចេញ ៩ ហ្នឹងជាហុងស៊ុយ អាហ្នឹងស្រួលមួយទៅ ដល់មួយទៀត គឺថា ស្រួលរកណាស់ ប្រាប់គ្នាថា លេខ ១៨ហ្នឹង គឺថា នៅខាងស្ដាំដៃ អាជ្រុងចុងក្រោយគេហ្នឹង អាហ្នឹងហើយ»។

សម្ដេចតេជោ ហ៊ុន សែន ថ្លែងបន្តថា ឡូហ្គោរបស់គណបក្សប្រជាជនកម្ពុជា ងាយស្រួលរកណាស់ គឺសញ្ញាទេវតាប៉ាចផ្ដា៕