សេដ្ឋកិច្ច

កសិករខេត្តស្ទឹងត្រែងប្រមាណ៧០ភាគរយនាំគ្នាដាំដំឡូងមីតាមបច្ចេកទេសកសិកម្ម

បានផុស

៤ years មុន

នៅ

ថ្ងៃព្រហស្បតិ៍ ២ មិថុនា ២០២២

ដោយ

កសិករនៅខេត្តស្ទឹងត្រែងប្រមាណ ៧០ ភាគរយ នាំគ្នាដាំដំឡូងមី ដោយសារទទួលបានបច្ចេកទេសពីមន្ទីរកសិកម្ម ក្នុងការដាំដុះហើយទទួលបានទិន្នផលខ្ពស់ទាំងបរិមាណ និងគុណភាពល្អសម្រាប់តម្រូវការទៅទីផ្សារនាំចេញទៅក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទុំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែង បានគាំទ្រចំពោះការប្រឹងប្រែងរបស់កសិករព្រោះវាជាមុខព្រួញមួយបានជំរុញឱ្យវិស័យកសិកម្មមានភាពរីកចម្រើនក្នុងពេលដែលប្រមុខរាជរដ្ឋាភិបាល និងក្រសួងកសិកម្មកំពុងលើកទឹកចិត្តកសិករឱ្យខិតខំដាំដំណាំកសិកម្ម។

លោកប្រធានមន្ទីរបន្តថា៖ កត្តានេះហើយដែលបានរុញច្រានកសិកមានជីវភាពរីកចម្រើន ហើយការដាំដុះចូរបងប្អូនអនុវត្កតាមបច្ចេកទេសដែលមន្ត្រីជំនាញកសិកម្មបានណែនាំ ក៏ដូចជាដែលបានទទួលបានវគ្គបណ្តុះបណ្តាលកន្លងមក លើការរៀបចំដី ការជ្រើសរើសពូជ និងប្រើប្រាស់ជី ការថែទាំជាដើម។

លោក សៅ មេងអាន អ្នកបច្ចេកទេសដាំដំឡូងមីបញ្ជាក់ថា៖ នៅឆ្នាំ២០២២នេះ កសិករនៅខេត្តស្ទឹងត្រែងមានការព្យាយាមដាំដំណាំដំឡូងមីទៅតាមបច្ចេកទេសប្រមាណ៧០% ដើម្បីធ្វើឱ្យបានផលច្រើនតម្រូវទៅលើទីផ្សារនាំចេញ។

លោកថា ផលសិកម្មដែលត្រូវនាំចេញទៅទីផ្សារបានល្អ លុះត្រាផលិតផលទាំងនោះមានបរិមាណច្រើន មានគុណភាពល្អ ដូច ជាគ្រាប់ស្វាយចន្ទី ពោត សណ្តែកបាយ សណ្តែកសៀង សណ្តែកដី ល្ង និងដំឡូងមីជាដើម សម្រាប់បំពេញការកែច្នៃផលិតផលសម្រេច។

អ្នកបច្ចេកទេសរូបនេះបញ្ជាក់ថា បច្ចេកទេសដាំដុះដំឡូងមី ត្រូវការជ្រើសរើសពូជ ការរៀបចំដី ការប្រើប្រាស់ថ្នាំកសិកម្ម ការដាំដុះទៅតាមមន្ត្រីជំនាញណែនាំ រួមផ្សំនិងការថែទាំផង ទើបទទួលបានទិន្នផលច្រើននៅពេលប្រមូលផល។

លោក សាន សំអូន កសិករដាំដំឡូងមីនៅចំណុចគីឡូ៥ ភូមិរាជានុកូលក្រុងស្ទឹងត្រែងបានទទួលស្គាល់ថា៖ ឆ្នាំនេះសកិករ ប្រមាណជា៧០%បាននាំគ្នាដាំដំឡូងមីព្រោះរយៈពេល២ឆ្នាំមកនេះដំឡូងមីទីផ្សារមានតម្លៃល្អ អាចទទួលយកបាន ហើយមានឈ្មួញមកបញ្ជាទិញច្រើន សម្រាប់នាំចេញទៅកាន់ទីផ្សារក្រៅប្រទេស។

លោកបន្តថា៖ កាលពីឆ្នាំ២០១៩និង២០២០កសិករយើងនៅតាមតំបន់ មួយចំនួនខ្លះដាំតិចតួចតែប៉ុណ្ណោះព្រោះតែតម្លៃលក់ចេញទាប ក្នុងមួយគីឡូក្រាមតែជាង១០០រៀល ចំណែកនៅឆ្នាំ២០២២ដំឡូងមីស្រស់ មានតម្លៃឡើងខ្ពស់ដល់ទៅជាង(៣០០រៀលឬ៤០០រៀលក្នុងមួយគីឡូក្រាម) ទើបប្រជាកសិករនាំគ្នាដាំដំឡូងមីច្រើនជាងដំណាំផ្សេងៗទៀត។

សូមបញ្ចាក់ថា៖ ខេត្តស្ទឹត្រែងឆ្នាំ២០២២នេះកសិករបាននាំគ្នាដាំដំឡូងមីជិតទៅ៣ ម៉ឺនហិកតា កើនឡើងជាងឆ្នាំ២០២១ប្រមាណជាង ២៥% ដោយសារកសិករខ្លះបានបង្វែរផ្ទៃដី ពីដាំស្វាយចន្ទី និងស្វាយកែវម្លៀតមកដាំដំឡូងមីវិញព្រោះមានទីផ្សារល្អ៕