កំពង់ផែ​យឿត្រី​ នៅ​ក្រុង​កំពង់ឆ្នាំង​ មានសំរាមច្រើន អាជ្ញាធរណែនាំឱ្យក្រុមហ៊ុនទទួលបានសិទ្ធិ ប្រមូលចេញឱ្យស្អាត

តំបន់យឿត្រីមួយកន្លែង នៅ ចំណុចជាប់នឹងកំពង់ផែថ្មក្នុងសង្កាត់ខ្សាម ក្រុងកំពង់ឆ្នាំង ជាប់នឹងកំពង់​ផែថ្ម​របស់ខេត្ត ដែលក្រុមហ៊ុនលោក សួង ប៊ុនសុង ទទួលបានសិទ្ធិក្នុងការប្រមូលភាស៊ី​ពីផលនេសាទ ក្នុងពេលនេះមិនបានអនុវត្តតាមគោលការណ៍ណែនាំរបស់អាជ្ញាធរក្រុង និងរដ្ឋ​បាលខេត្តនោះឡើយ បណ្ដោយឱ្យមានការចោលសំរាមនៅ ជុំវិញតំបន់យឿត្រី ដែលធ្វើឱ្យបាត់បង់សោភ័ណភាព និងប៉ះពាល់ដល់បរិស្ថាន។

ទាក់ទងនឹងករណីនេះ លោក បេ សារុំ អភិបាលរងក្រុងកំពង់ឆ្នាំងនៅ ព្រឹកថ្ងៃទី ១៥ ខែធ្នូ ឆ្នាំ ២០២១នេះ បានឲ្យដឹងថា នៅ ជុំវិញតំបន់យឿត្រី គឺជាការទទួលខុសត្រូវរបស់លោក សួង ប៊ុនសុង ជាអ្នកទទួលបានសិទ្ធិក្នុង​ការប្រមូលភាស៊ីពី ផលនេសាទ និងជាអ្នកទទួលខុសត្រូវលើបរិស្ថាន​និងអនាម័យផងដែរ។

ប៉ុន្តែកន្លងមក លោក សួង ប៊ុនសុង មិនបានជួល​ក្រុមហ៊ុនប្រមូល​សំរាមឱ្យ​ទៅ ប្រមូលសំរាមនៅ តំបន់យឿត្រីនោះឡើយ។ ករណីនេះកន្លងមកលោកតែងជួលរថយន្ត ទៅ ប្រមូលសំរាម នៅ ជុំវិញនោះជាបន្តបន្ទាប់ដើម្បីកុំឲ្យថ្នាក់លើស្ដីបន្ទោស។ ជាក់ស្ដែងព្រឹកនេះលោកបានជួលរថយន្តដឹកសំរាមចេញ ៣ រថយន្តហើយ។

ជុំវិញករណីនេះលោក​នឹងព្យាយាម ណែនាំឲ្យលោក សួង ប៊ុនសុង ប្រមូលសំរាមចេញពីតំបន់យឿត្រីនោះផងដែរ ដើម្បី​ចូល​រួមថែរក្សាសោភ័ណភាព បរិស្ថាន និងអនាម័យតាមមាត់ទន្លេ ក្នុងក្រុងកំពង់ឆ្នាំង។

លោក សួង ប៊ុនសុង ជាអ្នកទទួលបានសិទ្ធប្រមូលភាស៊ីយឿត្រី បានប្រាប់តាមទូរស័ព្ទ​ថា មូលហេតុដែលលោកមិនព្រម ជួលក្រុមហ៊ុនដឹកសំរាម ឱ្យចូលប្រមូលសំរាមតំបន់នោះ ព្រោះតែសំរាមមានត្រឹម១ការុង២ការ៉ុង ក្រុមហ៊ុនប្រមូលសំរាមទារថ្លៃដល់ទៅ ៣០ ម៉ឺនរៀល ក្នុងមួយខែ ដែលកន្លងមកលោកបានឱ្យ ១៥ ម៉ឺនរៀលក្នុងមួយខែ តែក្រុមហ៊ុនមិនព្រមយក ទើបលោកសុខចិត្តប្រមូលសំរាមដឹកចេញដោយខ្លួនឯង។

ចំណែកសំរាមទាំងនោះភាគច្រើនគឺប្រជាពលរដ្ឋមកទិញត្រីប្រហុកជាអ្នកបោះចោលពាសវាលពាសកាលមិនព្រមបោះចូលក្នុងធុងសំរាមនោះឡើយ ជាហេតុធ្វើឱ្យលោកជួបការលំបាកយ៉ាងខ្លាំងផងដែរ។ ប៉ុន្តែនៅ ព្រឹកនេះក្រោយពីលោកបានទទួលការណែនាំលោកអភិបាលរងក្រុងកំពង់ឆ្នាំង លោកក៏បានជួលរថយន្តឲ្យប្រមូលសំរាមដឹកចេញឲ្យអស់នៅព្រឹកនេះផងដែរ។

ដោយឡែកតាមការពិនិត្យឃើញ ជាក់ស្ដែងនៅ ជុំវិញតំបន់យឿត្រីនេះទៅ តាមមាត់ច្រាំងទន្លេ ទាំងនៅ ក្នុងទឹកទន្លេ និងតាមចិញ្ចើមថ្នល់ និងកន្ទុយរោងលក់ដូរឈើឬស្សី មានគំនរសំរាម ថង់ប្លាស្ទិក សំបកការ៉ុង ប្រអប់បាយ ដបទឹកសុទ្ធ ជាច្រើន ដែលធ្វើអោយប៉ះពាល់ដល់បរិស្ថាន ទាំងលើគោក និងក្នុងទឹក ក៏ដូចជាប៉ះពាល់ដល់វិស័យទេសចរណ៍ នៅ ក្នុងក្រុងកំពង់ឆ្នាំងផងដែរ។

ជុំវិញករណីនេះដែរប្រជាពលរដ្ឋសង្ឃឹម ថាឯកឧត្តមអភិបាលខេត្តកំពង់ឆ្នាំងថ្មីពិតជាចាត់វិធានការយ៉ាងម៉ឺងម៉ាត់រឿងសំរាម កំប៉ិកកំប៉ុកនៅ តំបន់នេះជាមិនខាន មិនឱ្យក្រុមហ៊ុនទទួលសិទ្ធិប្រមូលភាស៊ីពីផលនេសាទនៅ តំបន់នោះ បង្អាប់បង្អោនមុខមាត់និងកិត្តិយសរបស់ថ្នាក់ដឹកនាំខេត្តកំពង់ឆ្នាំងនោះឡើយ៕

អត្ថបទ៖ ឈៀងថារិទ្ធ