ផ្ទះ ១៣ ល្វែង​ត្រូវ​បាន​កំទេច​រួចរាល់​ ម្ចាស់​ត្រូវ​ស្នើសុំ​សាងសង់​ ខណៈ​អាជ្ញាធរ​សម្រួល​ឯកសារ

ផ្ទះថ្មចំនួន ១៣ ល្វែងដែលមានសភាពទ្រុឌទ្រោមពុកផុយមានអាយុកាល ៩១ ឆ្នាំមកហើយនោះ ត្រូវបានវាយកំទេចចោលរួចហើយ។ ដូច្នេះដើម្បីកសាងផ្ទះល្វែងនេះឡើងវិញម្ចាស់ផ្ទះត្រូវប្រញាប់ធ្វើលិខិតស្នើសុំកសាងផ្ទះល្វែង ដោយន្ត្រីជំនាញ និងអាជ្ញាធរសន្យាថានឹងជួយសម្រួលឯកសារផ្លូវច្បាប់តាមគោលការណ៍មិនឱ្យកកស្ទះនោះឡើយ។

លោក ហ៊ីង ភ័ពមីនា អភិបាលរងក្រុងកំពង់ឆ្នាំងថ្មីៗនេះធ្លាប់បានឲ្យដឹងថា ក្រោយពីអាជ្ញាធរខេត្តបានចេញលិខិតសម្រេចជាផ្លូវការឲ្យវាយ កំទេចផ្ទះថ្មទ្រុឌទ្រមទាំង ១៣ ល្វែងខាងលើនេះចោលរួចហើយនោះ ដើម្បីកសាងផ្ទះថ្មទាំង ១៣ ល្វែងនេះឡើងវិញ ម្ចាស់ផ្ទះត្រូវនាំគ្នាធ្វើលិខិតស្នើសុំសាងសង់ផ្ទះល្វែងនេះឡើង វិញទៅតាមគោលការណ៍ច្បាប់។ ដោយមន្ត្រីជំនាញ និងអាជ្ញាធរខេត្តបានសន្យាថា នឹងជួយសម្របសម្រួលឯកសារកសាងផ្ទះទាំង ១៣ ល្វែង នេះតាមគោលការណ៍ច្បាប់ ឱ្យបានឆាប់រហ័សមិនឱ្យកកស្ទះនោះឡើយ។

សូមបញ្ជាក់ថា ផ្ទះថ្មទាំង១៣ល្វែងនេះបានកសាងឡើងឆ្នាំ ១៩៣១ នៅក្នុងជំនាន់អាណានិគមបារាំង និងគិតមកដល់ពេលនេះមានអាយុ ៩១ ឆ្នាំហើយ។ ដោយឡែកកាលពីជាង ៣ ឆ្នាំមុនដោយពិនិត្យឃើញថា ផ្ទះថ្មទាំង ១៣ ល្វែងនេះមានសភាពពុកផុយ ទ្រុឌទ្រោមអាចនឹងរលំបាត់បង្កហានិភ័យដល់ប្រជាពលរដ្ឋជាម្ចាស់ផ្ទះ ក្រុមការងារចម្រុះខេត្តកំពង់ឆ្នាំងបានស្នើសុំឲ្យបងប្អូនជាម្ចាស់ផ្ទះរស់នៅលើផ្ទះថ្មនេះធ្វើការចាកចេញ ដើម្បីធានាសុវត្ថិភាពដល់អាយុជីវិត និងទ្រព្យសម្បត្តិ។

ក្រោយមកដោយមានលិខិតណែនាំជាបន្តបន្ទាប់ពីរដ្ឋបាលខេត្តកំពង់ឆ្នាំង ក្រោមការគ្រប់គ្រង និងដឹកនាំរបស់ឯកឧត្តម ស៊ុន សុវណ្ណារិទ្ធិ ជាអភិ បាលខេត្តកំពង់ឆ្នាំង និង ដោ យមានការសន្យាថានឹងជួយសម្រប សម្រួលផ្លូវច្បាប់ក្នុងការវាយកំទេចផ្ទះនេះចោល និងកសាងផ្ទះល្វែងនេះឡើងវិញផងនោះ ទើបនៅក្នុងអំឡុងខែមករា ឆ្នាំ២០២២ ប្រជាព លរដ្ឋជាម្ចាស់ផ្ទះថ្មទាំង១៣ ល្វែងនេះបានស្ម័គ្រចិត្តរុះ រើទ្រព្យសម្បត្តិចាកចេញ។ ដែលនេះគឺជាជោគជ័ យថ្មីមួយទៀតរបស់រដ្ឋបាលខេត្តកំពង់ឆ្នាំង ក្នុងការការជួយជម្លៀសប្រជាពលរដ្ឋចេញពីហានិភ័យនៃគ្រោះថ្នាក់រលំផ្ទះ។

ប្រជាពលរដ្ឋជាម្ចាស់ផ្ទះសង្ឃឹមថា ក្នុងពេលខាងមុខនេះរដ្ឋបាលខេត្តកំពង់ឆ្នាំង មន្ត្រីជំនាញ និងគោរពការសន្យាជួយសម្របសម្រួលឯកសារផ្លូវច្បាប់ ក្នុងការកសាងផ្ទះថ្មទាំង១៣ល្វែងនេះឡើងវិញឲ្យបានឆាប់រហ័ស ពួកគាត់តាមការដែល បានសន្យា៕

អត្ថបទ៖ ឈៀងថារិទ្ធ