សមត្ថកិច្ចនាំខ្លួនយុវជនដែលប្រើហិង្សាលើឪពុកបង្កើតបណ្ដាលឲ្យសន្លប់មកអនុវត្តច្បាប់ (មានវីដេអូហិង្សា)

បន្ទាប់ពីបែកធ្លាយនូវវីដេអូសកម្មភាពហិង្សារវាងកូននិងឪពុកដែលបណ្ដាលឲ្យបុរសជាឪពុករងរបួសសន្លប់នៅលើគ្រែនោះមក នៅថ្ងៃទី៣១ ខែឧសភា ឆ្នាំ២០២២ កម្លាំងនគរបាលស្រុកបាទី បាននាំខ្លួនជនសងស្ស័យជាកូនយកមកសួរនាំ និងអនុវត្តតាមនិតិវិធីច្បាប់។

យោងតាមសេចក្ដីបំភ្លឺរបស់ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តតាកែវ បានឲ្យដឹងថា ក្រោយពីទទួលបានព័ត៌មានដែលបានចែកចាយបន្តនូវវីដេអូរអំពីសកម្មភាពហិង្សារវាងឪពុក និងកូន មានរយៈពេល១នាទីនិង២១វិនាទី ដែលបង្ហោះដោយគណនីហ្វេសប៊ុកឈ្មោះ រីណា និងគណនីហ្វេសប៊ុកឈ្មោះ នីល សារ័ត្ន ដែលកើតហេតុនៅភូមិស្តុក ឃុំកុមារាជា ស្រុកបាទី ខេត្តតាកែវ កម្លាំងប៉ុស្តិ៍នគរបាលរដ្ឋបាលកុមារាជា រួមជាមួយកម្លាំងអធិការដ្ឋាននគរបាលស្រុកបាទី បានចុះដល់ផ្ទះកើតហេតុដើម្បីធ្វើការសាកសួរ តែភ្លាមៗអាណាព្យាបាលមិនសហការ ដោយបានរារាំង សមត្ថកិច្ចមិនឱ្យនាំខ្លួនជនបង្កជាកូនមកធ្វើការសាកសួរ និងសុំមិនប្តឹងផ្តល់អ្វីឡើយ។

ក្រុមការងារប្រតិកម្មរហ័សនៃស្នងការដ្ឋាននគរបាលខេត្តតាកែវ បានបន្ថែមថា បន្ទាប់ពីមានការសម្របសម្រួលពីសំណាក់ឯកឧត្តមព្រះរាជអាជ្ញាអមសាលាដំបូងខេត្តតាកែវ និងបទបញ្ជារបស់លោកឧត្តមសេនីយ៍ទោ ឈាង ផាន់ណារ៉ា ស្នងការ នៃស្នងការដ្ឋាននគរបាលខេត្តតាកែវ ទើបកម្លាំងជំនាញសម្រេចឃាត់ខ្លួនជនបង្កមកកាន់អធិការដ្ឋាននគរបាលស្រុកបាទី ដើម្បីសាកសួរបន្ថែម។

ក្នុងសេចក្ដីបំភ្លឺរបស់ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តតាកែវ បានបញ្ជាក់ថា ករណីខាងលើបានកើតឡើងកាលពីថ្ងៃទី៣០ ខែឧសភា ឆ្នាំ២០២២ វេលាម៉ោង១២និង២០នាទី បង្កឡើងដោយជនសង្ស័យឈ្មោះ ប៉ឹង ពេជ្រ ហៅឌឿន ភេទប្រុស អាយុ២១ឆ្នាំ ជាកូនបង្កើតរបស់ជនរងគ្រោះ រស់នៅភូមិស្តុក ឃុំកុមារាជា ស្រុកបាទី ខេត្តតាកែវ ។ ចំណែកជនរងគ្រោះជាឪពុកមានឈ្មោះ ប៊ុត ឌៀប អាយុ៥២ឆ្នាំ រស់នៅភូមិ ឃុំជាមួយគ្នា។

ក្រោយកើតហេតុ ជនរងគ្រោះជាឪពុកមិនបានដាក់ពាក្យបណ្តឹង ឬរាយការណ៍មកសមត្ថកិច្ចនោះទេ តែឈ្មោះ ប៉ឹង សុគន្ធ ភេទស្រី អាយុ៣២ឆ្នាំ ត្រូវជាកូនជនរងគ្រោះ បានផ្ញើវីដេអូដែលបានថត​ពីសកម្មភាពហិង្សាទៅឱ្យឈ្មោះ ថោង សារ៉ន ភេទស្រី អាយុ២៨ឆ្នាំ ត្រូវជាក្មួយជនរងគ្រោះ នៅរាជធានីភ្នំពេញ ប្រើប្រាស់គណនីហ្វេសប៊ុកចំនួនពីរ មានឈ្មោះ រីណា និងឈ្មោះ នីល សារ័ត្ន ហើយក៏បានបង្ហោះលើបណ្តាញសង្គមហ្វេសប៊ុកតែម្ដង។

ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តតាកែវ បានបន្ថែមថា បន្ទាប់ពីសួរនាំមូលហេតុដែលឈានដល់ការប្រើអំពើហិង្សានេះ គឺបណ្តាលមកពីការយល់ច្រឡំ ដោយសារឪពុកមកពីធ្វើការហត់​ហូបបាយថ្ងៃរួចបានសម្រាក ស្របពេលជាមួយគ្នានោះ កូនប្រុសដែលជាជនបង្កក្រោកពីដេកឡើងរកបាយហូប ក៏ធ្វើឱ្យជ្រុះគម្របឆ្នាំងបាយលាន់លឺខ្លាំង ស្រាប់តែឪពុកភ្ញាក់ឡើងខឹង ស្មានថាកូនបោកឆ្នាំបាយ បានស្រែកស្តីឱ្យកូន (មិនធ្វើការអី គិតតែដេក ងើបពីដេកបោកឆ្នាំងបាយទៀត) រហូតមានទំនាស់ពាក្យសម្តីនឹងគ្នា បង្កឡើងជាហិង្សាតែម្តង តែមិនមានរបួសធ្ងន់ធ្ងរនោះទេ។

បច្ចុប្បន្នជនបង្កត្រូវបានឃាត់ខ្លួននៅអធិការនគរបាលស្រុកបាទី ដើម្បីសូរនាំ និងកសាងសំណុំរឿងអនុវត្តតាមនិតិវិធីច្បាប់។

សូមបញ្ជាក់ថា ឃ្លីបវីដេអូហិង្សារវាងឪពុកនិងកូនបង្កើតនេះ បានបែកធ្លាយកាលពីថ្ងៃទី៣១ ខែឧសភា ឆ្នាំ២០២២ វេលាម៉ោង១៧និង៣០នាទី នៅលើបណ្ដាលសង្គមហ្វេសប៊ុក និងTikTok ដែលធ្វើឲ្យមហាជនមានការហួសចិត្តយ៉ាងខ្លាំងពេលឃើញសកម្មភាពកូនប្រុសបង្កើតវាយតដៃជាមួយឪពុក បណ្ដាលឲ្យជនរងគ្រោះជាឪពុកដួលសន្លប់នៅគ្រែ៕

អត្ថបទ៖ សុខុម