អគ្គិភ័យឆេះផ្ទះពលរដ្ឋជាច្រើនខ្នងនៅជិតបេនឡានក្រុងប៉ោយប៉ែត

ហេតុការអគ្គិភ័យមួយបានកើតឡើងនៅវេលាម៉ោង១២និង៣០នាទី ថ្ងៃទី០៨ ខែកក្តដា ឆ្នាំ២០២២ បណ្តាលអោយឆាបឆេះរាលដាលផ្ទះប្រជាពលរដ្ឋតៗគ្នាជាច្រើនខ្នងនៅមុខចំណតរថយន្តក្រុងប៉ោយប៉ែត ស្ថិតនៅភូមិបាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ។

តាមសេចក្តីរាយការណ៍បានបញ្ជាក់ថា ហេតុការអគ្គិភ័យនេះធ្វើអោយផ្ទះប្រជាពលរដ្ឋប្រមាណ៥ល្វែង ដែលនៅជាប់គ្នាបានឆាបឆេះបន្តបន្ទាប់ ទោះជាផ្ទះល្វែងទាំងនេះ សង់អំពីថ្ម​ប្រក់ស័ង្កសី​ក៏ដោយធ្វើអោយសម្ភារៈនៅក្នុងផ្ទះត្រូវបានឆាបឆេះ ផ្ទះខ្លះឆេះធ្ងន់ធ្ងរ និងផ្ទះមួយចំនួនទៀតរងការខូចខាតស្រាល ។  

ខណះដែលអគ្គិភ័យកំពុងឆាបឆេះ កម្លាំងអាជ្ញាធរ ចេញរថយន្ដពន្លត់អគ្គីភ័យជាច្រើនគ្រឿង ទើបគ្រប់គ្រងស្ថានភាពបានរហូតរលត់ទាំងស្រុងនៅវេលាម៉ោងប្រមាណជា២រសៀលនេះ។

មកដល់ពេលនេះ ទំហំនៃការខូចខាតជាក់ស្តែងនោះ នៅមិនទាន់មានរបាយការណ៍ជាក់លាក់នៅឡើយទេ ហើយមូលហេតុនៃការឆាបឆេះសមត្ថកិច្ចនៅមិនទាន់អាចបញ្ជាក់បានថាមូលពីហេតុអ្វីដែរ៕

អត្ថបទ៖ ពៅ