Connect with us

សន្តិសុខសង្គម

ជនអន្តោប្រវេសន៍​ជាង​៨០​នាក់ សង្ស័យ​បទល្មើស​ល្បែងស៊ីសង​តាម​អន​ឡាញ ត្រូវ​សមត្ថកិច្ច​ចុះបង្ក្រាប​នៅផ្ទះ​សំណាក់ ថា​ន់ តា​យ

បានផុស

នៅ

កោះកុង ​៖ ក្រុម​ជនអន្តោប្រវេសន៍​ប្រមាណ​៨០​នាក់ ត្រូវ​បាន​តំណាង​អយ្យការ​អម​សាលាដំបូង​ខេត្តកោះកុង និង​អាជ្ញាធរ​កងកម្លាំង​នគរបាល​ចម្រុះ ចុះ​ត្រួតពិនិត្យ និង​ឃាត់ខ្លួន ករណី​សង្ស័យ​ថា​ លួចលាក់​ប្រព្រឹត្ត​បទល្មើស​ល្បែងស៊ីសង​តាម​អន​ឡាញ​នៅ​ក្នុង​ផ្ទះសំណាក់ ថា​ន់ តា​យ​។

កិច្ចប្រតិបត្តិការ​ទប់ស្កាត់ និង​បង្ក្រាប​ក្រុម​ជនអន្តោប្រវេសន៍​នេះ ធ្វើឡើង​តាម​បទបញ្ជា​ដោយ​ផ្ទាល់​ខ្លួន​លោក រស់ សា​រាំ ព្រះរាជអាជ្ញា​ខេត្តកោះកុង រសៀល​ថ្ងៃទី​២១​ ខែកញ្ញា ឆ្នាំ​២០២២ ស្ថិតនៅ​ភូមិ​៣ សង្កាត់​ស្មាច់មានជ័យ ក្រុង​ខេមរភូមិន្ទ​។

លោក រស់ សា​រាំ ព្រះរាជអាជ្ញា​ខេត្ត​កោះកុង បាន​គូស​បញ្ជាក់​ប្រាប់​កម្ពុ​ជាថ្មី​ថា រូបលោក កំពុង​តែ​បន្ត​ស្រាវជ្រាវ​រកមុខ​មេខ្លោង​របស់​ក្រុម​ជនអន្តោប្រវេសន៍​ទាំង​៨២​នាក់ ស្រី​២៨​នាក់ ភាគច្រើន​ជា​ជនជាតិ​ឥ​ណ្ឌូនេ​ស៊ី​ស្នាក់នៅ​ផ្ទះសំណាក់ ថា​ន់ តា​យ តាំងពី​យប់​ថ្ងៃ​ទី​១៩ ខែកញ្ញា ថ្មីៗ​នេះ​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោក​ព្រះរាជអាជ្ញា​ខេត្តកោះកុង លើកឡើង​ថា រាល់​លទ្ធផល​ស៊ើបអង្កេត​ស្រាវជ្រាវ​ទទួលបាន​លម្អិត​យ៉ាងណា​ទៀត​នោះ នឹង​ជូន​ព័ត៌មាន​តាម​ក្រោយ​ទៀត​។

ដោយឡែក​លោក យស់ ចាន់​វិចិត្រ អធិការ​នគរបាល​ក្រុង​ខេមរ​ភូមិន្ទ ពន្យល់​ថា លោក​បាន​ចាត់​កម្លាំង​សមត្ថកិច្ច​ក្រោម​ឱវាទ​តាមដាន​វត្តមាន​អន្តោប្រវេសន៍​ក្នុង​មូលដ្ឋាន​របស់​ខ្លួន​២​ថ្ងៃ​មកហើយ ពោលគឺ​ទើប​រកឃើញ​ទីតាំង​របស់​ពួកគេ និង​ដាក់​ការ​សង្ស័យ​ថា ​លួចលាក់​ប្រព្រឹត្ត​បទល្មើស​ល្បែងស៊ីសង​តាម​អន​ឡាញ​។

បើ​តាម​លោក​អធិការ​នគរបាល​ក្រុង​ខេមរភូមិន្ទ ក្រុម​ជនអន្តោប្រវេសន៍​ទាំង​៨២​នាក់​នោះ បាន​ធ្វើ​ដំណើរ​មកពី​ខេត្ត​ព្រះសីហនុ​មក​ស្នាក់នៅ​ផ្ទះសំណាក់ ថា​ន់ តា​យ ដោយ​ម្ចាស់​ផ្ទះសំណាក់​មិនបាន​រាយការណ៍​ផ្ដល់​ព័ត៌មាន​កាន់​អាជ្ញាធរ​សមត្ថកិច្ច​នោះឡើយ​។ ក្នុងចំណោម​៨៦​នាក់ រកឃើញ​ចំនួន​៧នាក់ ជា​ជនជាតិ​វៀតណាម និង​ឥ​ណ្ឌូ​នេ​ស៊ី ដែល​ពុំ​មាន​លិខិតឆ្លងដែន និង​ឯកសារ​គ្រប់គ្រាន់ ហើយ​ឃាត់ខ្លួន​បញ្ជូន​ទៅ​ស្នងការដ្ឋាន​នគរ​បាល​ខេត្ត​ភ្លាមៗ ដើម្បី​កសាង​សំណុំរឿង​បន្ត។

គួរ​ជម្រាប​ថា នេះ​ជា​លើកដំបូង​ហើយ​ ដែល​សមត្ថកិច្ច​ពាក់ព័ន្ធ​នៅក្នុង​ក្រុង​ខេមរភូមិន្ទ ចុះ​ពិនិត្យ និង​បង្ក្រាបបាន​ក្រុម​អន្តោប្រវេសន៍ គ្រា​ពីមុន​មិន​ធ្លាប់​មាន​ករណីបែបនេះ​សោះឡើយ បន្ទាប់ពី​សម្តេច​តេ​ជោ​នាយករដ្ឋមន្ត្រី បញ្ជា​ដាច់​ណាត់​ឱ្យ​បង្ក្រាប​បន​ល្បែងស៊ីសង​គ្រប់​ប្រភេទ​នៅ​ទូទាំងប្រទេស​កម្ពុជា​៕

អត្ត​ប​ទ ៖ សិរី​វឌ្ឍនៈ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម