ជនជាតិចិនបើកបររថយន្ត ជ្រុលបុករះអ្នកលក់បន្លែ លើចិញ្ចើមផ្លូវជាតិលេខ១

មានរឿងគួរឱ្យភ្ញាក់ផ្អើល ខណៈរថយន្តស៊េរីទំនើបបើកបុករះអ្នកលក់បន្លែតាមចិញ្ចើមផ្លូវជាតិលេខ១ មុខហាងការហ្វេយីហោ TUBG ស្ថិតក្នុងភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

យោងតាមរបាយការណ៍របស់នគរបាលខណ្ឌច្បារអំពៅ ធ្វើកំណត់ដោយលោកអនុសេនីយ៍ឯក ហ៊ុល ផាន់ណា អនុប្រធានផ្នែកដោះស្រាយគ្រោះថ្នាក់ចរាចរណ៍ បានឱ្យដឹងថា ករណីគ្រោះថ្នាក់ចរាចរណ៍នេះបង្កឡើងដោយរថយន្ត AUdi G5 ពណ៌ស ពាក់ស្លាកលេខ ភ្នំពេញ ២ BQ ៤២ ៣២ បើកបរដោយជនជាតិចិនឈ្មោះ Li JiM GGi ភេទប្រុស អាយុ ៣៦ឆ្នាំ។

ជនខាងលើ បានបើកបរតាមបណ្តោយផ្លូវជាតិលេខ១ ក្នុងទិសដៅពីទិសខាងកើត ឆ្ពោះមកខាងលិចឆ្លងស្ពានព្រះមុនីវង្សចាស់ ទៅអតីតរង្វង់មូលក្បាលថ្នល់។ លុះទៅដល់ចំណុចកើតហេតុ បានបុករះអ្នកលក់បន្លែលើចិញ្ចើមផ្លូវបង្កឱ្យមានអ្នករងរបួសចំនួន ២នាក់ រួមទាំងម៉ូតូរុឺម៉ក ម៉ូតូឌុប ៣គ្រឿង និងបន្លែធ្លាក់រប៉ាត់រប៉ាយពេញលើដងផ្លូវ ហើយរថយន្តក៏បានឈប់ ព្រោះទៅមុខមិនបានដោយសារប្រជាពលរដ្ឋព័ទ្ធជាប់។

ក្រោយកើតហេតុ កម្លាំងជំនាញបានប្រគល់រថយន្តបង្ក រួមទាំងអ្នកបើកបរប្រគល់ទៅឱ្យនគរបាលការិយាល័យផ្លូវគោក នៃស្នងការដ្ឋាននគរបាលរាជធានីភ្នំពេញ។

គួរបញ្ជាក់ថា ករណីគ្រោះថ្នាក់ចរាចរណ៍នេះមិនបង្កឱ្យមានអ្នកស្លាប់ ខណៈមានអ្នកលក់ និងអ្នកទិញបន្លែរាប់រយនាក់នៅលើផ្លូវ។ តាមរបាយការណ៍បានបញ្ជាក់ថា ករណីគ្រោះថ្នាក់នេះបានកើតឡើងនៅវេលាម៉ោង ៤ និង ១០នាទីទាបភ្លឺ ឈានចូលថ្ងៃទី១៧ ខែតុលា៕

អត្ថបទ៖ នរា