អាជ្ញាធរក្រុងបានលុង ចាត់វិធានការក្តៅលើអាជីវករលក់​ដូរលើចំណីផ្លូវសាធារណៈមុខផ្សារបានលុង

កម្លាំងសមត្ថកិច្ចចម្រុះក្រុងបានលុង បានប្រើធម៌ក្តៅចំពោះអាជីវករមួយចំនួនតូចដែលយកចំណីផ្លូវសាធារណៈដាក់លក់ដូរនៅមុខផ្សារក្រុងបានលុង ធ្វើឲ្យប៉ះពាល់ដល់សណ្តាប់ធ្នាប់សាធារណៈរបស់បងប្អូនប្រជាពលរដ្ឋដែលចេញចូលមកក្នុងផ្សារពិបាកធ្វើដំណើរ។

នៅព្រឹកថ្ងៃទី១៩ ខែធ្នូ ឆ្នាំ២០២២ នៅត្រង់ចំណុចមុខផ្សារក្រុងបានលុង ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង លោក ធូ ឃឿ អភិបាលក្រុងបានលុង ដឹកនាំកម្លាំងសមត្ថកិច្ចចម្រុះរួមមាន កម្លាំងអាវុធហត្ថក្រុងបានលុង កម្លាំងនគរបាលក្រុងបានលុង កម្លាំងនគរបាលខេត្ដ កម្លាំងមន្ទីរសាធារណការ សង្កាត់ឡាបានសៀក និងកម្លាំងភូមិបាលក្រុងបានលុងចុះរៀបចំសណ្ដាប់ធ្នាប់នៅតាមដងផ្លូវជុំវិញផ្សារបានលុង។

កម្លាំងសមត្ថកិច្ចបានចុះប្រមូលសម្ភារៈដាក់លក់ផ្លែឈើ និងឆ័ត្រនៅលើចិញ្ចើមផ្លូវរបស់រដ្ឋដែលធ្វើឲ្យប៉ះពាល់ដល់សោភ័ណភាពនៅក្នុងក្រុង ឬមុខផ្សារ ដែលអាជ្ញាធរក៏បានណែនាំម្តងរួចមកហើយដែរ ប៉ុន្តែអាជីវករនៅមិនទាន់អនុវត្តតាមការណែនាំរបស់អាជ្ញាធរក្រុងឡើយ។ សម្ភារៈដែលបានរឹបអូសទាំងនោះ សមត្ថកិច្ចបានយកមករក្សាទុកនៅសាលាក្រុងបានលុង ដើម្បីចាត់វិធានការបន្តតាមនីតិវិធី៕

អត្ថបទ៖ វុទ្ធឦសាន