សន្តិសុខសង្គម

បំបែកសំណុំរឿងប្លន់ម៉ូតូប្រដាប់អាវុធ ០៤ ករណី ឃាត់ខ្លួនជនសង្ស័យ ០៩ នាក់

បានផុស

៤ ខែ មុន

នៅ

ថ្ងៃព្រហស្បតិ៍ ២២ ធ្នូ ២០២២

ដោយ

កម្លាំងចម្រុះ នៃស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវឈានដល់បំបែកសំណុំរឿងប្លន់ម៉ូតូប្រដាប់អាវុធចំនួន ០៤ ករណី និងឃាត់ខ្លួនជនសង្ស័យទាំង ០៩ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយអនុវត្តតាមបទបញ្ជារបស់លោកឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កម្លាំងចម្រុះ នៃស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវឈានដល់បំបែកសំណុំរឿងប្លន់ម៉ូតូប្រដាប់អាវុធចំនួន ០៤ ករណី និងឃាត់ខ្លួនជនសង្ស័យទាំង ០៩ នាក់។

ប្រតិបត្តិការរយៈពេល ០៣ ថ្ងៃ ចាប់ពីថ្ងៃទី ១៩ រហូតដល់ថ្ងៃទី ២១ ខែធ្នូ ឆ្នាំ ២០២២ កម្លាំងជំនាញ នៃអធិការដ្ឋាននគរបាលខណ្ឌកំបូល សហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ដឹកនាំបញ្ជាលោកឧត្ដមសេនីយ៍ទោ សុង លី ស្នងការរង ទទួលផែនការងារព្រហ្មទណ្ឌ បានស្រាវជ្រាវឈានដល់បំបែកសំណុំរឿងប្លន់ម៉ូតូប្រដាប់អាវុធចំនួន ០៤ ករណី ចាប់ឃាត់ខ្លួនជនសង្ស័យទាំង ០៩ នាក់ នៅក្នុងភូមិសាស្ត្រខណ្ឌកំបូល ដែលធ្វើសកម្មភាពដោយជិះម៉ូតូដេញតាមម៉ូតូជនរងគ្រោះតាមផ្លូវសាធារណៈមានសភាពស្ងាត់ជ្រងំ ហើយពួកវាយកកាំភ្លើងខ្លីភ្ជង់ជនរងគ្រោះឲ្យឈប់ម៉ូតូ ហើយធាក់ផ្ដួលម៉ូតូ ក៏វាយជនរងគ្រោះដោយកាំភ្លើង ប្លន់យកម៉ូតូជិះគេចខ្លួនបាត់។

ជនសង្ស័យទាំង ៩ នាក់ ដែលត្រូវឃាត់ខ្លួនរួមមាន ៖

១-ឈ្មោះ ជា ដារ៉ូ ភេទប្រុស មុខរបរកម្មករសំណង់ ស្នាក់នៅភូមិផ្សារអង្គ សង្កាត់ត្រពាំងក្រសាំង ខណ្ឌពោធិ៍សែនជ័យ។

២-ឈ្មោះ យុន វិសាល ហៅប៉េ ភេទប្រុស គ្មានមុខរបរពិតប្រាកដ រស់នៅភូមិត្រពាំងទួល សង្កាត់កំបូល ខណ្ឌកំបូល។

៣-ឈ្មោះ រៀម ចាន់ ភេទប្រុស គ្មានមុខរបរពិតប្រាកដ ស្នាក់នៅភូមិ ៦ សង្កាត់ចោមចៅ ២ ខណ្ឌពោធិ៍សែនជ័យ។

៤-ឈ្មោះ ស្រៀង វណ្ណៈ ហៅម៉ៅ ភេទប្រុស គ្មានមុខរបរពិតប្រាកដ ស្នាក់នៅភូមិ ៦ សង្កាត់ចោមចៅ ២ ខណ្ឌពោធិ៍សែនជ័យ រាជធានីភ្នំពេញ។

៥-ឈ្មោះ ទិត្យ វីឡា ភេទប្រុស គ្មានមុខរបរពិតប្រាកដ រស់នៅភូមិ ៣ សង្កាត់ចោមចៅ ២ ខណ្ឌពោធិ៍សែនជ័យ។

៦-ឈ្មោះ សុខ ទៀង ដាវីដ ភេទប្រុស គ្មានមុខរបរពិតប្រាកដ ស្នាក់នៅភូមិ ៣ សង្កាត់ចោមចៅ ២ ខណ្ឌពោធិ៍សែនជ័យ ប្រើប្រាស់គ្រឿងញៀន។

៧-ឈ្មោះ សម្បត្តិ ដា ហៅឆាង ភេទប្រុស មុខរបរសន្តិសុខ ស្នាក់នៅភូមិតំណាក់ត្រយឹង សង្កាត់ចោមចៅ ២ ខណ្ឌពោធិ៍សែនជ័យ។

៨-ឈ្មោះ ឈឹង គឹមឆន ភេទប្រុស គ្មានមុខរបរពិតប្រាកដ រស់នៅភូមិត្រាំដោក សង្កាត់ពងទឹក ខណ្ឌដង្កោ។

៩-ឈ្មោះ អុន សំអុល ហៅខ្លី ភេទប្រុស គ្មានមុខរបរពិតប្រាកដ រស់នៅភូមិអំបិល សង្កាត់កំបូល ខណ្ឌកំបូល។

ចំពោះជនសង្ស័យទាំងអស់ និងវត្ថុតាង កម្លាំងជំនាញ នៃអធិការដ្ឋាននគរបាលខណ្ឌកំបូល កំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕

អត្ថបទ ៖ រ៉ាវុទ្ធ