បញ្ជូនខ្លួនស្រ្តីម្នាក់ទៅតុលាការ ពាក់ព័ន្ធករណីបរិហារកេរ្តិ៍មន្ទីរពេទ្យមួយនៅទួលទំពូង

នគរបាលព្រហ្មទណ្ឌក្រសួងមហាផ្ទៃ នៅរសៀលថ្ងៃទី១៨ ខែមករា ឆ្នាំ ២០២៣ បានចាប់បញ្ជូនស្ត្រីម្នាក់ទៅតុលាការពាក់ពន្ធករណី បរិហារបង្កាច់កេរ្តិ៍ មិនរាងចាល និងញុះញង់ឲ្យមានការរើសអើង ប្រព្រឹត្តតាមបណ្តាញសង្គម ។

ស្ត្រីរូបនោះឈ្មោះ សេង ថៃមារា អាយុ២៦ឆ្នាំ រស់នៅភូមិអូរសួស្តី ឃុំបារាយណ៍ ស្រុកបារាយណ៍ ខេត្តកំពង់ធំ។ ដើមចមនៃការចាប់បញ្ជូនខ្លូនជនសង្ស័យខាងលើទៅតុលាការត្រូវបានប្រភពព័ត៌មានឲ្យដឹងថា កាលពីថ្ងៃទី៧ ខែមេសា ឆ្នាំ២០២១ ឈ្មោះ សេង ថៃមារា បានជេរប្រមាថ បរហារបង្កាច់កេរ្តិ៍ ទៅលើបុគ្គលម្នាក់តាមបណ្តាញសង្គមហ្វេសប៊ុក ដោយចោទប្រកាន់ថា គ្លីនិកបុគ្គលនោះស្ថិតនៅសង្កាត់ទួលទំពូង២ ខណ្ឌចំការមន រាជធានីភ្នំពេញ បានសម្លាប់កូនក្មេង និងបង្ហោះជាសាធារណៈ “សូមឲ្យបងប្អូនគ្រប់ៗគ្នាឈប់យកកូនទៅពិនិត្យ និងព្យាបាលនៅគ្លីនិកនោះទៀតទៅ បើមិនចង់ស្តាយក្រោយ” ។

អង្គហេតុដូចបានរៀបរាប់ខាងលើនេះ ជាការធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់ភាគីម្ខាងទៀត ដែលមិនមែនជាការពិត និងគ្មានភស្តុតាងគ្រប់គ្រាន់ គឺជនសង្ស័យមានគំនិតទុច្ទរិតដោយចេតនា ដើម្បីបរិហារបង្កាច់កេរ្តិ៍ លើអ្នកដ៏ទៃតែប៉ុណ្ណោះ ម្តងហើយម្តងទៀតមិនរាងចាល បើទោះបីមានការប្រមានពីភាគីដើមបណ្តឹងក៏ដោយ ដែលទង្វើនេះទើបធ្វើឲ្យភាគីម្ខាងនោះ សម្រេចចិត្តដាក់ពាក្យបណ្តឹងទៅសមត្តកិច្ចឲ្យជួយចាត់ការទៅតាមផ្លូវច្បាប់ ។ ជនសង្ស័យកំពុងស្ថិតនៅដំណាក់កាល អយ្យការអមសាលាដំបូងរាជធានីភ្នំពេញ បើកការស៊ើបសួរ ៕

អត្ថបទ៖ មករា