សន្តិសុខសង្គម

យោធាថៃចាប់ខ្លួនប្តីប្រពន្ធជនជាតិថៃ ពាក់ព័ន្ធរត់ពន្ធបារីពីកម្ពុជា

បានផុស

២ ខែ មុន

នៅ

ថ្ងៃអាទិត្យ ១៧ ឧសភា ២០២៦

ដោយ

យោធាថៃប្រចាំតាមខ្សែបន្ទាត់ព្រំដែន បានឃាត់ខ្លួនជនជាតិថៃ ២នាក់ ដែលជាប្តីប្រពន្ធ ខណៈកំពុងធ្វើសកម្មភាពដឹកជញ្ជូនបារីគេចពន្ធពីកម្ពុជាចូលទៅប្រទេសថៃ។ ក្នុងនោះ បុរសជាប្តីត្រូវបានរាយការណ៍ថាជាមន្ត្រីយោធា។

ប្រតិបត្តិការនេះបានធ្វើឡើងនៅយប់ថ្ងៃទី១៦ ខែឧសភា ឆ្នាំ២០២៦ នៅចំណុចភូមិថាប់ភ្រិក ស្រុកអារញ្ញប្រាថេត ខេត្តស្រះកែវ បន្ទាប់ពីកម្លាំងជំនាញសង្កេតឃើញសកម្មភាពសង្ស័យរថយន្តមួយដែលធ្វើដំណើរចេញចូលតំបន់ព្រំដែនជាញឹកញាប់នៅពេលយប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការស៊ើបអង្កេត សមត្ថកិច្ចបានរកឃើញរថយន្តម៉ាក Honda Jazz ពណ៌ស ពាក់ស្លាកលេខខេត្តឈុនបុរី មានសភាពផ្ទុកធ្ងន់ខុសធម្មតា ហើយបានដាក់កម្លាំងតាមដានរហូតដល់ពេលចាប់ខ្លួន។ មុនពេលប្រតិបត្តិការ សមត្ថកិច្ចបានឃើញបុរសជនជាតិខ្មែរ ២នាក់ លីកេសឆ្លងដែន មកប្រគល់បារីឲ្យភាគីថៃ ហើយជួយលើកដាក់ក្នុងរថយន្ត។ ទោះជាយ៉ាងណា បន្ទាប់ពីសមត្ថកិច្ចបង្ហាញខ្លួន ជនជាតិខ្មែរទាំងនោះបានរត់គេចខ្លួនត្រឡប់ទៅទឹកដីកម្ពុជាវិញ។

ជនសង្ស័យដែលត្រូវបានឃាត់ខ្លួនរួមមាន៖

– វីសាឡុត ចាន់ចិន្តា អាយុ ៤០ឆ្នាំ (ប្តី) ជាមន្ត្រីយោធានៅខេត្តស្រះកែវ

– វ៉ាត់ឆារ៉ាផន អ៊ិនអន អាយុ ៤១ឆ្នាំ (ភរិយា)

ក្នុងប្រតិបត្តិការនេះ សមត្ថកិច្ចបានរឹបអូសបារីបរទេសគេចពន្ធចម្រុះម៉ាក ចំនួន ២០ កេសធំ ស្មើនឹងប្រហែល ៩,៨០០ កញ្ចប់ ដែលមានតម្លៃរាប់លានបាត។ បច្ចុប្បន្ន ជនសង្ស័យ និងវត្ថុតាង ត្រូវបានបញ្ជូនទៅប៉ុស្តិ៍នគរបាលឃ្លងណាំសៃ ដើម្បីចាត់ការតាមនីតិវិធីច្បាប់។ករណីនេះបានបង្កឲ្យមានសំណួរពីមជ្ឈដ្ឋានសាធារណៈថា ហេតុអ្វីបានជាសកម្មភាពនាំបារីឆ្លងដែនពីកម្ពុជាចូលទៅថៃ នៅតែអាចប្រព្រឹត្តទៅបានជាបន្តបន្ទាប់ និងតំបន់ណាដែលអាចមានភាពចន្លោះក្នុងការគ្រប់គ្រង?