Update៖ ស្លាប់២នាក់ និងរបួសធ្ងន់ម្នាក់ក្នុងករណី​ឆេះផ្ទះនៅខណ្ឌទួលគោក

អគ្គិភ័យដែលឆាបឆេះផ្ទះប្រជាពលរដ្ឋនៅផ្លូវ១៣៨ ក្នុងសង្កាត់ផ្សារដេប៉ូទី២ ខណ្ឌទួលគោក បានបណ្ដាលឲ្យមនុស្សចំនួន២នាក់ស្លាប់ និងម្នាក់ទៀតរបួសធ្ងន់កំពុងសង្គ្រោះនៅមន្ទីរពេទ្យ។

យោងតាមរបាយការណ៍របស់សមត្ថកិច្ចបានឲ្យដឹងថា ទីតាំងដែលត្រូវអគ្គិភ័យឆាបឆេះនេះ គឺជាភោជនីយដ្ឋានឈ្មោះ «កន្លែងថី្ម» ធ្វើអំពីថ្មបេតុង ប្រក់សង្ក័សី ទំហំ ២០ម៉ែត្រ X ១៩ម៉ែត្រ មានម្ចាស់ឈ្មោះ ហុក ទ្រី ភេទប្រុស អាយុ៣១ឆាំ្ន សញ្ជាតិខែ្មរ ដែលសមត្ថកិច្ចបញ្ជាក់ថា មូលហេតុ គឺផ្ដើមចេញពីជាងផ្សារដែកបង្កជាអគ្គិភ័យ ។

ក្នុងប្រតិបត្តិការជួយអន្តរាគមន៍ កម្លាំងសមត្ថកិច្ចបានប្រើប្រាស់រថយន្ដពន្លត់អគ្គិភ័យចំនួន០៩គ្រឿង ប្រើប្រាស់ទឹកអស់ចំនួន០៩ឡាន ស្មើរនឹង៣៦ម៉ែត្រគូប។

សូមបញ្ជាក់ថា ករណីអគ្គិភ័យនេះ បានកើតឡើងកាលពីវេលាម៉ោង១០និង៤៥នាទី ព្រឹកថ្ងៃទី៣១ ខែមករា ឆ្នាំ២០២៣ នៅចំណុច ហាងកន្លែងថី្ម ផ្លូវ១៣៨ ក្រុម៤១ ភូមិ២ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ។

បើតាមប្រភពមួយចំនួនបានលើកឡើងថា ជនរងគ្រោះនៅក្នុងគ្រោះអគ្គិភ័យនេះ គឺជាបុគ្គលិកបម្រើការនៅក្នុងភោជនីយដ្ឋាននេះតែម្ដង ដោយក្រោយពីចប់ម៉ោងការងារពួកគាត់បានសម្រាកនៅក្នុងបន្ទប់ជាន់ខាងលើ៕