សន្តិសុខសង្គម

ដឹងមូលហេតុដែលកូនមន្ត្រីសាលាស្រុកអង្គរជ័យយកកាំភ្លើងអាកា បាញ់បងស្រីថ្លៃនិងបងស្រីជីដូនមួយស្លាប់

បានផុស

៣ years មុន

នៅ

ថ្ងៃព្រហស្បតិ៍ ២៧ មេសា ២០២៣

ដោយ

កំពត ៖ ហេតុការណ៍ខ្មាំងកាំភ្លើងបាញ់ប្រហារមួយបានកើតឡើង នៅវេលាម៉ោង១០ព្រឹក ថ្ងៃទី២៧ ខែមេសា ឆ្នាំ២០២៣ នេះ ស្ថិតក្នុងភូមិបាល ឃុំតានី ស្រុកអង្គរជ័យ ខេត្តកំពត បណ្ដាលឲ្យស្ត្រី ១នាក់ស្លាប់ភ្លាមៗ នៅនឹងកន្លែងកើតហេតុ និងម្នាក់ទៀតបានស្លាប់ខណៈបញ្ជូនទៅសង្គ្រោះបន្ទាន់ រួចខ្មាន់កាំភ្លើងបាញ់ខ្លួនឯងតាមក្រោយ តែមិនស្លាប់ដោយបានរងរបួសធ្ងន់ចំដើមទ្រូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានឲ្យដឹងថា ក្រោយទទួលបានព័ត៌មាន លោកបានបញ្ជាឱ្យកម្លាំងជំនាញ នៃស្នងការដ្ឋាននគរបាលខេត្ត និងកម្លាំងអធិការដ្ឋាននគរបាលស្រុកអង្គរជ័យ បានចុះដល់កន្លែងកើតហេតុភ្លាមៗ។

ពេលទៅដល់កម្លាំងជំនាញបានពិនិត្យឃើញថា ជនសង្ស័យមានឈ្មោះ ឡាយ សំអាត ហៅចែម អាយុ៣៩ឆ្នាំ មានទីលំនៅភូមិ-ឃុំកើតហេតុខាងលើ បានធ្វើសកម្មភាពបាញ់ទៅលើបងថ្លៃ និងបងជីដូនមួយរបស់ខ្លួន ដោយប្រើប្រាស់អាវុធម៉ាក RPK (គ្រាប់AK) ជាច្រើនគ្រាប់ បន្ទាប់មកបានធ្វើអត្តឃាតខ្លួនឯង ដោយបាញ់ខ្លួនឯងចំនួន ០១ គ្រាប់ ចំដើមទ្រូង (របួសធ្ងន់) បច្ចុប្បន្នត្រូវបានសមត្ថកិច្ចដឹកតាមរថយន្តសង្គ្រោះ នៅមន្ទីរពេទ្យបង្អែកខេត្តកំពត។

ដោយឡែក ជនរងគ្រោះទាំងពីរនាក់ រួមមាន៖ *ទី១៖ ឈ្មោះ នួន សុខា ភេទស្រី អាយុ៤២ឆ្នាំ មុខរបរគ្រូបង្រៀន មានទីលំនៅភូមិ-ឃុំកើតហេតុខាងលើ (បងជីដូនមួយជាជនសង្ស័យ) ត្រូវចំនួន០២គ្រាប់ ស្លាប់នៅនឹងកន្លែងកើតហេតុ *ទី២៖ ឈ្មោះ អៀង ស៊ុន ភេទស្រី អាយុ៤៧ឆ្នាំ មុខរបរកសិករ មានទីលំនៅភូមិ-ឃុំកើតហេតុខាងលើ (ត្រូវជាបងថ្លៃជនសង្ស័យ) រងរបួសចំនួន២ គ្រាប់ ត្រូវបានស្លាប់នៅពេលដែលរថយន្តសង្គ្រោះបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកខេត្តតាកែវ។

បើតាមលោកឧត្តមសេនីយ៍ទោស្នងការនគរបាលខេត្តបានប្រាប់ឱ្យដឹងថា មូលហេតុគឺជនសង្ស័យមានគំនុំខឹងជាមួយបងជីដូនមួយ និងបងថ្លៃ ហើយជនសង្ស័យក៏ជាមុខសញ្ញាប្រើប្រាស់គ្រឿងញៀនផងដែរ។ បច្ចុប្បន្នកម្លាំងសមត្ថកិច្ច កំពុងកសាងសំណុំរឿងបញ្ជូនទៅតុលាការដើម្បីចាត់វិធានការទៅតាមនីតិវិធីច្បាប់៕

ដោយ ៖ សឹង រ៉ាត់