​ច្បាប់ចរាចរណ៍ថ្មីដាក់ពិន័យធ្ងន់លើអ្នកបើកបរប្រើគ្រឿងញៀន រំពឹងអនុម័តមុនរដ្ឋាភិបាលអាណត្តិថ្មី

សេចក្ដីព្រៀងច្បាប់ចរាចរណ៍ផ្លូវគោកថ្មីមាន ១២ ជំពូក និង ៩០ មាត្រា ត្រូវបានរៀបចំធ្វើរួចចប់សព្វគ្រប់ និងបានបញ្ជូនទៅដល់ដៃគណៈរដ្ឋមន្ត្រីហើយ។

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានប្រាប់អ្នកសារព័ត៌មាននៅព្រឹកថ្ងៃទី ២៩ ខែមិថុនា ឆ្នាំ ២០២៣ ដោយលោកសង្ឃឹមថា ច្បាប់ចរាចរណ៍ថ្មីនេះ នឹងអាចឆ្លងផុតសភា មុនការបង្កើតអាណត្តិថ្មីរបស់រាជរដ្ឋាភិបាល ហើយថា ច្បាប់​ថ្មីនេះ នឹងរឹតបន្តឹងខ្លាំងលើអ្នកបើកបរប្រើប្រាស់គ្រឿងញៀន។

លោក ស៊ុន ចាន់ថុល មានប្រសាសន៍ថា៖ «ច្បាប់ចាស់អត់មានផ្លូវល្បឿនលឿន ឥឡូវមានផ្លូវល្បឿនលឿន ចំណុចនេះក៏បញ្ជូលក្នុងច្បាប់ ចំពោះការរឹតបន្តឹងជាពិសេសការប្រើគ្រឿងញៀន បើយើងត្រូតពិនិត្យឃើញគឺគាត់បាត់បង់សុពលភាពបើកបររថយន្ត ៦ ខែ ទៅ ១ ឆ្នាំ បានអនុញ្ញាតឱ្យបើកបរឡើងវិញ»។

ខ្លឹមសារសំខាន់ៗនៅក្នុងសេចក្តីព្រាងច្បាប់​ថ្មី​នេះមានច្រើនទៀតដូចជា តម្រូវឱ្យ​អ្នកបើកបរ​ធ្វើតេស្ត​រក​សារធាតុ​ញៀនជាពិសេស​​លើ​ការអភិវឌ្ឍ​ផ្លូវថ្នល់ ដូចជា​ការពង្រីក​ផ្លូវ ការកសាង​ផ្លូវ​ល្បឿន​លឿន និង​ចង់​បង្កើន​ប្រសិទ្ធភាព កាត់បន្ថយ​អ្នកស្លាប់ និង​របួស​ដោយ​គ្រោះថ្នាក់​ចរាចរណ៍៕