Update៖ អគ្គិភ័យឆេះរោងចក្រនៅឃុំឈើទាលបានរលត់ទាំងស្រុង និងមានកម្មការិនីម្នាក់បាត់បង់ជីវិត

គិតត្រឹមវេលាម៉ោង៩និង៥០នាទី អគ្គិភ័យដែលឆេះរោងចក្រមួយកន្លែងនៅ​ឃុំឈើទាល ស្រុកគៀនស្វាយ ខេត្ត​កណ្ដាល​ ត្រូវបានកម្លាំងជំនាញអន្តរាគមន៍គ្រប់គ្រងពន្លត់បានទាំងស្រុងហើយ ដោយមិនមានការឆ្លងរាលដាលទៀតនោះទេ។ នេះបើតាមការបញ្ជាក់របស់ហ្វេសផេកស្នងការខេត្តកណ្ដាលនៅមុននេះបន្តិច។

សូមបញ្ជាក់ថា ករណីអគ្គិភ័យនេះបានកើតឡើងកាលពីវេលាម៉ោង​៦និង៥៥​នាទីព្រឹក​ ថ្ងៃ​ទី​១៨​ ខែ​មករា​ ឆ្នាំ​២០២៤ ​រោងចក្រ​មួយ​កន្លែងឈ្មោះ យីដា ​ស្ថិត​នៅភូមិឬស្សីស្រុក ឃុំឈើទាល ស្រុកកៀនស្វាយ ខេត្តកណ្តាល។ បើតាមស្នងការខេត្តកណ្ដាល ករណីនេះគឺឆេះអគារ១ខ្នង (ឡបោកគក់)។

តាមរបាយការណ៍របស់ប៉ុស្តិ៍នគរបាលរដ្ឋបាលឈើទាល នៃអធិការដ្ឋាននគរបាលស្រុកកៀនស្វាយ ករណីអគ្គីភ័យនេះបណ្តាលអោយខូចខាតអាគារមួយកន្លែង និងសម្ភារៈនៅខាងក្នុងអាគារជាច្រើន និងមានកម្មការី ម្នាក់បានស្លាប់ឈ្មោះ សុខ ឆវី ភេទស្រីអាយុ៣៣ឆ្នាំ ជនជាតិខ្មែរ មានទីលំនៅភូមិឈើទាល២ ឃុំឈើទាល ស្រុកកៀនស្វាយ ខេត្តកណ្តាល។ និងមានអ្នកដែលជួយពន្លត់ចំនួន០៤នាក់ទៀតបានមានបញ្ហាថប់ដង្ហើមត្រូវបានរថយន្តសង្រោះដឹកយកទៅមន្ទីរពេទ្យជ័យជំនះ។ របាយការបញ្ជាក់ថា ក្នុងប្រតិបត្តិការនេះកម្លាំងអន្តរាគមន៍បានប្រើប្រាស់រថយន្តពន្លត់អគ្គីភ័យចំនួន១៥គ្រឿង។ ទោះបីយ៉ាងណា កម្ពុជាថ្មី នៅមិនទាន់ទទួលបានរបាយការណ៍ច្បាល់លាស់ណាមួយពីស្នងការដ្ឋាននគរបាលខេត្តកណ្ដាលនៅឡើយទេ៕

អត្ថបទ៖ សុខុម