​ប៉ូលិសចាប់ខ្លួនបុរស​ចិន ២​ នាក់ ​ច្នៃប្រឌិតថតរឿងខ្មោចលង​នៅសណ្ឋាគារ និងកាស៊ីណូ​

អគ្គស្នងការដ្ឋាននគរបាលជាតិ បានចាប់ខ្លួន ជនជាតិចិន២នាក់ នៅថ្ងៃទី១៤ ខែកុម្ភៈ ឆ្នាំ២០២៤​ បន្ទាប់ពីពួកគេរួមគំនិតផលិតមាតិកាវីដេអូប្រឌិតរឿងកុហក។

​បុរសជនជាតិចិនទាំង២នាក់ ត្រូវបានកម្លាំងសមត្ថកិច្ចជំនាញចាប់ខ្លួននៅបន្ទប់ខុនដូមួយកន្លែង ដែលមាន​ទីតាំង​ស្ថិតក្នុងក្រុងព្រះសីហនុ ខេត្តព្រះសីហនុ បន្ទាប់ពីពួកគេរួមគ្នាផលិតវីដេអូក្លែងក្លាយ ដើម្បីទាក់ទាញការចាប់អារម្មណ៍ នៅលើបណ្ដាញសង្គម ជាពិសេស TikTok ដែលមានអ្នកគាំទ្រ ឬចុចឡាយ រហូតដល់ជាង៥លាននាក់។

វីដេអូដែលពួកគេផលិតនោះ មានដូចជា ការប្រឌិតជាខ្មោចលងនៅតាមសណ្ឋាគារ កាស៉ីណូ ឬទីតាំងផ្សេងៗ នៅក្នុងមូលដ្ឋានខេត្តព្រះសីហនុ។

វីដេអូប្រឌិតទាំងនោះ បានធ្វើឲ្យ​មហាជនមានការភ័យខ្លាច និងយល់ច្រឡំ ពិសេសអ្នកដែលរស់នៅក្រៅប្រទេស ហើយមានបំណងមកលេងកម្សាន្ដនៅខេត្ដទេសចរណ៍មួយនេះតែម្ដង ខណៈមិនមានហេតុការណ៍នេះកើតឡើងនោះទេ។

ក្រោយចាប់ខ្លួនកម្លាំងសមត្ថកិច្ចជំនាញ ដកហូតបានស្រោមមុខខ្មោច និងសម្ភារៈបម្រើឲ្យការថតវីដេអូមួយចំនួនទៀតផងដែរ។

ស្នងការដ្ឋាននគរបាលខេត្តព្រះសីហនុ នឹងធ្វើសន្និសីទសារព័ត៌មាននៅរសៀលថ្ងៃទី ១៥ ខែកុម្ភៈនេះ ដើម្បីលម្អិតជំុវិញករណីនេះ និងចំណាត់ការលើបុរសទាំងពីរនាក់នេះ៕