មន្ត្រីជំនាញរកឃើញបង្គាស្រស់នាំចូលពីប្រទេស​វៀតណាម មានសារធាតុគីមីហាមឃាត់

មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ កាលពីថ្ងៃទី៨ ខែមេសា ឆ្នាំ២០២៥ បានរកឃើញបង្គាស្រស់មួយចំនួនដែលឈ្មួញលួចនាំចូលពីប្រទេសវៀតណាមមានចាក់សារធាតុគីមីហាមឃាត់ ក្រោយធ្វើតេស្ដបឋមបន្ទាប់ពីស្ទាក់ឃាត់ការនាំចូលតាមរថយន្ដមួយគ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរកឃើញបង្គាស្រស់មានចាក់សារធាតុគីមីនេះ ធ្វើឡើងដោយមន្ត្រីជំនាញសាខា ក.ប.ប.​ ខេត្តណ្ដាល សហការជាមួយនគរបាលទទួលផែនប្រឆាំងបទល្មើសសេដ្ឋកិច្ចខេត្តកណ្ដាល ដោយបានត្រួតពិនិត្យ និងធ្វើតេស្តបឋមលើផលិតផល ត្រីញៀនក្លាសេ និងបង្គាស្រស់មួយចំនួនដែលឈ្មួញលួចនាំចូលពីប្រទេសវៀតណាម ដឹកដោយរថយន្ដតួរីសពណ៌សមួយគ្រឿង ពាក់ស្លាកលេខ ភ្នំពេញ 2AJ-8196។

បើតាមមន្ត្រីជំនាញ បង្គាស្រស់ទាំងនេះមានចាក់បន្ថែមនូវសារធាតុហាមឃាត់ និងការដឹកជញ្ជូនផលិតផលទាំងនោះមិនមានលិខិតអនុញ្ញាតនាំចូល និងការដឹកជញ្ជូនមិនត្រឹមត្រូវតាមលក្ខណៈបច្ចេកទេស។ បន្ទាប់ពីពិនិត្យ និងដោយមានការឯកភាពពី ព្រះរាជអាជ្ញា មន្រ្តីជំនាញបានធ្វើការដកហូត និងដុតកម្ទេចចោលនូវផលិតផលទាំងនោះភ្លាមៗជៀសវាងបង្កផលប៉ះពាល់សុខភាពអ្នកបរិភោគ៕