មន្ត្រីជំនាញស្ទាក់ចាប់ប្រហិតសាច់ក្ដាមផ្ទុកសារធាតុគីមីហាមឃាត់ជាង ៤តោនលួចនាំចូលពីប្រទេស​វៀតណាម

កម្លាំងជំនាញសាខាគយ និងរដ្ឋាករខេត្តតាកែវ សហការជាមួយអាជ្ញាធរពាក់ព័ន្ធ និងមន្ត្រីជំនាញសាខា ក.ប.ប. ខេត្តតាកែវ កាលពីថ្ងៃទី២៤ ខែមិថុនា ឆ្នាំ២០២៦​ បានចុះបង្ក្រាប និងស្ទាក់ចាប់រថយន្តដឹកទំនិញគ្មានច្បាប់អនុញ្ញាតមួយគ្រឿង លួចនាំចូលប្រហិតសាច់ក្ដាមចំនួនជាង ៤តោនពីប្រទេសវៀតណាម មានផ្ទុកសារធាតុគីមីហាមឃាត់ «ប៉ូរ៉ាក់» (Borax) ។ ប្រហិតសាច់ក្ដាមទាំងនេះ ក៏នឹងត្រូវបានរៀបចំដុតបំផ្លាញចោលផងដែរនៅព្រឹកថ្ងៃទី២៥ ខែមិថុនា ឆ្នាំ២០២៦ នៅទីលានចាក់សំរាមក្រុងដូនកែវ ខេត្តតាកែវ។

ប្រតិបត្តិការស្ទាក់ចាប់រថយន្តនាំចូលប្រហិតសាច់ក្ដាមមានផ្ទុកសារធាតុគីមីហាមឃាត់នេះ ធ្វើឡើងនៅចំណុចភូមិជ្រោយពេន ឃុំក្រពុំឈូក ស្រុកកោះអណ្តែត ខេត្តតាកែវ។

ក្នុងការត្រួតពិនិត្យ សមត្ថកិច្ចបានរកឃើញប្រហិតសាច់ក្ដាមចំនួន ៤១៦កេស ស្មើនឹង៤,១៦០គីឡូក្រាម ដែលត្រូវបានលួចនាំចូលពីប្រទេសវៀតណាម តាមភូមិជ្រោយពេន ឃុំក្រពុំឈូក ស្រុកកោះអណ្តែត។ លទ្ធផលវិភាគបញ្ជាក់ថា ផលិតផលទាំងនេះមានផ្ទុកសារធាតុគីមីហាមឃាត់ «ប៉ូរ៉ាក់» ដែលបង្កគ្រោះថ្នាក់ដល់សុខភាពអ្នកប្រើប្រាស់។

លោក លៀង សុភា ប្រធានសាខា ក.ប.ប. ខេត្តតាកែវ បានឱ្យដឹងថា សារធាតុ «ប៉ូរ៉ាក់» គឺជាសារធាតុគីមីហាមឃាត់ដែលអាចបង្កផលប៉ះពាល់ធ្ងន់ធ្ងរដល់សុខភាពមនុស្ស។ ការប្រើប្រាស់ ឬទទួលទានអាហារដែលមានសារធាតុនេះ អាចបណ្ដាលឱ្យកើតជំងឺរបកស្បែក ប្រកាច់ ខ្សោយតម្រងនោម និងអាចឈានដល់ការខូចតម្រងនោមធ្ងន់ធ្ងរ។ លើសពីនេះ វាក៏អាចប៉ះពាល់ដល់សន្លាក់ និងឆ្អឹង ប្រព័ន្ធក្រពះពោះវៀន ប្រព័ន្ធដង្ហើម ប្រព័ន្ធសរសៃឈាមបេះដូង ថ្លើម និងប្រព័ន្ធប្រសាទផងដែរ។

អាជ្ញាធរជំនាញបានអំពាវនាវដល់អាជីវករ និងអ្នកនាំចូលទំនិញទាំងអស់ ត្រូវគោរពតាមច្បាប់ និងស្តង់ដារសុវត្ថិភាពចំណីអាហារ ដើម្បីការពារសុខភាពប្រជាពលរដ្ឋ និងទប់ស្កាត់ការចរាចរផលិតផលគ្មានគុណភាពនៅលើទីផ្សារ៕

​អត្ថបទ៖ វីរៈ