ព័ត៌មានអន្ដរជាតិ

វៀតណាម យកសាច់ក្របីបន្លំជាសាច់គោជប៉ុន Wagyu ដាក់លក់ក្នុងតំបន់ធំៗ

បានផុស

៩ ខែ មុន

នៅ

ថ្ងៃព្រហស្បតិ៍ ១៦ តុលា ២០២៥

ដោយ

នៅរសៀលថ្ងៃទី១៤ ខែតុលា នាយកដ្ឋាននគរបាលសេដ្ឋកិច្ចនៃប៉ូលិសក្រុងហាណូយបានប្រកាសថា ខ្លួនបានកាត់ទោស និងឃាត់ខ្លួនមនុស្ស៤នាក់ក្នុងក្រុមហ៊ុន Hida ដែលចាក់សារធាតុគីមីចូលទៅក្នុងសាច់ក្របីក្លែងក្លាយចំនួន ១៤ តោន ដើម្បីបំលែងទៅជាសាច់គោ WAGYU របស់ជប៉ុន ហើយដាក់លក់វានៅលើទីផ្សារធំៗក្នុងតម្លៃលើស ៥ ដងឯណោះ។

សាច់ក្របីដែលមានគុណភាពអន់ ត្រូវបានបំប្លែងទៅជាសាច់គោដែលមានគុណភាពខ្ពស់។ រូបថត៖ DMS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយពី vnexpress ការផ្ទៀងផ្ទាត់បឋមបង្ហាញថា ចាប់ពីខែឧសភា ឆ្នាំ២០២៤មក រហូតដល់ពេលចាប់ខ្លួន មុខសញ្ញាបានឃុបឃិតគ្នាផលិត និងប្រើប្រាស់សាច់ក្របីប្រមាណ ១៤តោន ដែលក្លែងធ្វើជាសាច់គោដ៏ប្រណិតរបស់ជប៉ុន។ សាច់ក្លែងក្លាយដ៏ច្រើននេះ ត្រូវបានរត់ពន្ធទៅកាន់ទីក្រុង និងខេត្តធំៗជាច្រើននៅទូទាំងប្រទេស រួមមានទីក្រុងហាណូយ, ដាណាង, ញ៉ាត្រាង និងទីក្រុងហូជីមិញ។ ជាពិសេស វាក៏ត្រូវលក់ក្នុងទីផ្សារជាច្រើនកន្លែងដូចជា ភោជនីយដ្ឋាន BBQ / Hotpot និងហាងអហារប៊ូហ្វេធំៗ, ហាងលក់សាច់លំដាប់ខ្ពស់ ព្រមទាំងតាមផ្សារទំនើបខ្លះៗ។

ជាងនេះទៀតដែរ អាជ្ញាធរវៀតណាមបញ្ជាក់ថា មួយផ្នែកសាច់ក្លែងក្លាយ ត្រូវបានរៀបចំដើម្បីនាំចេញខុសច្បាប់ទៅកាន់ប្រទេសជិតខាងក្បែរៗនោះ។ ប៉ុន្តែក្រុមអ្នកស៊ើបអង្កេតពុំទាន់ដឹងច្បាស់នូវឡើយទេថា តើមុខសញ្ញាពិតជាបានចែកចាយមែនឬអត់នោះ។

ដោយឡែក តាមការសារភាពរបស់ម្ចាស់ក្រុមហ៊ុនបាននិយាយថា ខ្លួនទិញសាច់ក្របីគុណភាពទាបដែលនាំចូលពីប្រទេសឥណ្ឌា ក្នុងតម្លៃ ១២០,០០០ ដុង/គីឡូក្រាម (៤.៥៦ដុល្លារ)។ បន្ទាប់មក ក៏ចាក់បញ្ចូលវាដើម្បីបង្កើតជាសារធាតុរាវនិងខ្លាញ់ ដោយធ្វើការវេចខ្ចប់ផលិតផល ហើយដាក់ស្លាកថាជាសាច់គោ។ ចាប់តាំងពីពេលនោះមក សាច់គោត្រូវបានគេដាក់លក់នៅលើទីផ្សារក្នុងតម្លៃចាប់ពី ៤០០.០០០ ដុង ដល់ ៦០០.០០០ ដុង/គីឡូក្រាម (១៦ទៅ ២៣ដុល្លារ)។

ក្នុងពេលចុះឆែកឆេរទីតាំងផលិត និងឃ្លាំង អាជ្ញាធរបានរឹបអូសសាច់សរុបចំនួន ៦៥ តោនបន្ថែម (រួមទាំងសាច់ក្របី និងសាច់គោក្លែងក្លាយ) និងគ្រឿងចក្រទាំងអស់ដែលប្រើសម្រាប់កែច្នៃ។ លើសពីនេះ ភ្នាក់ងារស៊ើបអង្កេតក៏បានរឹបអូសបានម្សៅចម្រាញ់ចំនួន ១៧តោន ដែលប្រើសម្រាប់ចាក់ចូលទៅក្នុងសាច់ក្របី ដើម្បីបង្កើតជាខ្លាញ់ដូចសាច់គោ Wagyu បោកប្រាស់អតិថិជន។

យ៉ាងណាមិញ ចំពោះលទ្ធផលនៃការពិនិត្យនៅវិទ្យាស្ថានជាតិធ្វើតេស្តបង្ហាញថា សំណាកសាច់គោ ២៤/២៩ ដែលរឹបអូសបាននៅក្រុមហ៊ុន Hida មានសារធាតុ DNA ក្របី។ ទីភ្នាក់ងារស៊ើបអង្កេតក៏កំពុងពិនិត្យមើលម្សៅចម្រាញ់ចំនួន ១៧ តោនផងដែរ ដើម្បីកំណត់ថា តើវាមានសារជាតិពុលដែលបង្កគ្រោះថ្នាក់ដល់សុខភាពឬអត់?