«ធី ដៃមួយពាន់» ជាមុខសញ្ញាលួចយ៉ាងសកម្មក្នុងភូមិសាស្ដ្ររាជធានី ត្រូវបានឃាត់ខ្លួន

កម្លាំងជំនាញនៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ កាលពីថ្ងៃទី២០ ខែមេសា ឆ្នាំ២០២៥ វេលាម៉ោង​០៣និង៤៨នាទី​ទៀបភ្លឺ បានស្រាវជ្រាវ និងឃាត់ខ្លួនជនសង្ស័យម្នាក់ដែលជាមុខសញ្ញាលួចយ៉ាងសកម្មក្នុងភូមិសាស្ត្ររាជធានីភ្នំពេញ ដែលធ្លាប់ធ្វើសកម្មភាពជាច្រើនករណីកន្លងមក។ ការឃាត់ខ្លួននេះធ្វើឡើងក្រោយជនសង្ស័យធ្វើសកម្មភាពចូលបន្លំលួចលុយពីស្រ្តីម្នាក់បានសម្រេច នៅក្នុងផ្ទះលេខ៤៨០​ ផ្លូវលេខ២៣០​ ក្នុងសង្កាត់ផ្សារដើមគរ​ ខណ្ឌទួលគោក កាលពីថ្ងៃទី១៥​ ខែមេសា​ ឆ្នាំ២០២៥​កន្លងទៅ។

ជនសង្ស័យមានឈ្មោះ ប៊ុន​ ធី​ ហៅ ធីដៃមួយពាន់ អាយុ៤២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួលមិនចាំលេខ (ម្តុំផ្សារទួលគោក) ផ្លូវមិនចាំលេខ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។ ក្នុងប្រតិបត្តិការឃាត់ខ្លួន កម្លាំងជំនាញបានដកហូត ម៉ូតូម៉ាកហុងដាស្កុបពី​ ពណ៌ខ្មៅ​ ពាក់ស្លាកលេខភ្នំពេញ​ 1LM-3496 (របស់ជនសង្ស័យធ្វេីសកម្មភាព)។

បើតាមសមត្ថកិច្ច ជនសង្ស័យត្រូវបានឃាត់ខ្លួននៅចំណុចមុខផ្ទះសំណាក់​ លក្ខណ៍ប៊ូទិច ផ្លូវលេខ១៣២ ក្នុងសង្កាត់ស្រះចក ខណ្ឌដូនពេញ។ ជនសង្ស័យត្រូវបាន​កម្លាំងជំនាញនាំយកទៅនាយកដ្ឋាននគរបាលព្រហ្មទណ្ឌ​ ដើម្បីធ្វើការសាកសួរ​តាមនីតិវិធី​ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញដើម្បីអនុវត្តនិតិវិធីច្បាប់៕