សន្តិសុខសង្គម

ACU សម្រេចបញ្ជូនខ្លួនប្រធានផ្សារទួលពង្រ និង បក្ខពួក ទៅកាន់តុលាការ

បានផុស

១ year មុន

នៅ

ថ្ងៃពុធ ២១ ឧសភា ២០២៥

ដោយ

កាលពីល្ងាចថ្ងៃទី ២០ ខែឧសភា ឆ្នាំ ២០២៥ ម្សិលមិញ អង្គភាពប្រឆាំងអំពើពុករលួយ (ACU) បានបញ្ជូនស្ត្រីប្រធានផ្សារទួលពង្រ និង មនុស្ស ៣ នាក់ទៀត ទៅកាន់សាលាដំបូងរាជធានីភ្នំពេញ ក្រោយឃាត់ខ្លួនពាក់ព័ន្ធការដើរប្រមូលលុយពីក្រុមអាជីវករលក់ដូរតាមដងផ្លូវដែលជាការដើរប្រមូលចំណូលមិនមែនសារពើពន្ធដោយមិនទទួលបានសិទ្ធិពីរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ បានប្រាប់ឲ្យដឹងកាលពីយប់ថ្ងៃទី ២០ ឧសភា ថា ករណីសន្តិសុខផ្សារទួលពង្រ ដើរប្រមូលលុយពីក្រុមអាជីវករលក់ដូរតាមដងផ្លូវ ត្រូវបានគេចុះផ្សាយដ៏ច្រើនសន្ធឹកសន្ធាប់តាមបណ្ដាញសង្គម ដែលសកម្មភាពរបស់ក្រុមសន្តិសុខនេះ ធ្វើឡើងតាមការបញ្ជារបស់ប្ដី-ប្រពន្ធប្រធានផ្សារ។

លោក សយ ច័ន្ទវិចិត្រ បានបញ្ជាក់ថា ជនសង្ស័យទាំង ៤ រូប រួមមាន ៖ ទី១.ឈ្មោះ ណៃ ដាណែត ភេទស្រី អាយុ ៣៩ ឆ្នាំ មុខរបរប្រធានផ្សារទួលពង្រ។ ទី២.ឈ្មោះ ប៊ុន ស៊ិន ភេទប្រុស អាយុ ៣៩ ឆ្នាំ មុខរបរជាងថតវីដេអូ។ ទី៣.ឈ្មោះ ម៉ី សាផាត ភេទប្រុស អាយុ ៤១ ឆ្នាំ មុខរបរសន្តិសុខផ្សារទួលពង្រ។ ទី៤.ឈ្មោះ សាម៉ាក់ ឆាន ភេទប្រុស អាយុ ៤២ ឆ្នាំ មុខរបរសន្តិសុខផ្សារទួលពង្រ។

លោកបន្តថា ជនសង្ស័យទាំង ៤ នាក់នេះ ជាប់សង្ស័យអំពីអំពើពុករលួយក្នុងបទល្មើស «ប្រមូលចំណូលមិនមែនសារពើពន្ធដោយមិនទទួលបានសិទ្ធិពីរដ្ឋ មាត្រា ៨៩ និង មាត្រា ៩៧ នៃច្បាប់ ស្ដីពីការគ្រប់គ្រងចំណូលមិនមែនសារពើពន្ធ និង ការសមគំនិត តាមមាត្រា ២៩ នៃក្រមព្រហ្មទណ្ឌ»។

ក្រោយបញ្ចប់ការសួរនាំ មន្ត្រីនគរបាលយុត្តិធម៌ នៃអង្គភាពប្រឆាំងអំពើពុករលួយ បានសម្រេចឃាត់ខ្លួនបុគ្គលទាំង ៤ នេះ កាលពីវេលាម៉ោង ១៦ និង ១០ នាទី ថ្ងៃទី ១៨ ខែឧសភា ឆ្នាំ ២០២៥ ហើយបានបញ្ជូនទៅសាលាដំបូងរាជធានីភ្នំពេញ នៅល្ងាចថ្ងៃទី ២០ ខែឧសភា ឆ្នាំ ២០២៥៕

អត្ថបទ ៖ សុខា