អាជ្ញាធរខណ្ឌទួលគោក ចុះរៀបចំសណ្តាប់ជាលើកទី២ នៅជុំវិញមន្ទីរពេទ្យកុមារជាតិ ក្រោយមានសំណូមពរពីពលរដ្ឋ

កម្លាំងគណៈបញ្ជាការឯកភាពខណ្ឌទួលគោក នៅព្រឹកថ្ងៃទី២០ ខែមិថុនា ឆ្នាំ២០២៥ នេះ បានបន្តចុះរៀបចំសណ្ដាប់​ធ្នាប់នៅជុំវិញរបងមន្ទីរពេទ្យកុមារជាតិ ដែលកន្លងទៅអាជ្ញាធរបានចុះអប់រំណែនាំជាច្រើនលើកច្រើនសារតែក្រុមអាជីវករ​ទាំងនោះហាក់មិនចូលរួមជាមួយអាជ្ញាធរនៅឡើយ។ ការចុះរៀបចំសណ្ដាប់ធ្នាប់នេះ ធ្វើឡើងបន្ទាប់ពីប្រជាពលរដ្ឋបង្ហោះចែកចាយវីដេអូពីសកម្មភាពដែលក្រុមអាជីវករមួយចំនួនដាក់តាំងរបស់របររំលោភចំណីផ្លូវសាធារណៈ ធ្វើឲ្យកកស្ទះចរចរណ៍ និងពិបាកក្នុងការធ្វើដំណើរ។

បើតាមការលើកឡើងពីប្រជាពលរដ្ឋដែលតែងតែធ្វើដំណើរនៅតាមបណ្ដោយផ្លូវនៅជុំវិញមន្ទីរពេទ្យកុមារជាតិ បានសំណូមពរដល់អាជ្ញាធរពាក់ព័ន្ធជាពិសេសអាជ្ញាធរខណ្ឌទួលគោក ឲ្យជួយរៀបចំសណ្ដាប់ធ្នាប់ និងរក្សាចិញ្ជើមផ្លូវនៅជុំវិញរបងមន្ទីរពេទ្យឲ្យមានរបៀបរៀបរយ និងសណ្ដាប់ធ្នាប់ល្អ។ ដោយកន្លងទៅអាជីវករបានយកចិញ្ចើមផ្លូវសាធារណៈបានតាំងតូបលក់ធ្វើឲ្យបាត់បង់សណ្ដាប់ធ្នាប់ និងបង្កការកកស្ទះដល់ប្រជាពលរដ្ឋអ្នកធ្វើដំណើរ។

សូមបញ្ជាក់ផងដែរថា កន្លងទៅអាជ្ញាធរខណ្ឌលគោក ក៏បានចុះរៀបចំសណ្ដាប់ធ្នាប់នៅជុំវិញបរិវេណសមន្ទីរពេទ្យកុមារជាតិនេះម្ដងរួចមកហើយ ដោយមានការចងខ្សែហ៊ុំព័ទ្ធផងដែរ ប៉ុន្តែមួយរយៈក្រោយក៏មានការតាំងលក់ត្រឡប់មកវិញដែលបង្កឲ្យមានការកកស្ទះ និងបាត់បង់សណ្ដាប់ធ្នាប់តាមដងផ្លូវនេះ។ ដូច្នេះប្រជាពលរដ្ឋសង្ឃឹមថា ការរៀបចំសណ្ដាប់ធ្នាប់លើកនេះ នឹងមិនមានការត្រឡប់មកលក់ដូរធ្វើឲ្យបាត់បង់សណ្ដាប់ធ្នាប់ឡើងវិញនោះទេ៕

អត្ថបទ៖ សុភា