ខេត្តក្រចេះ ចាប់​ខ្លួនជនសង្ស័យ ១៥៦ នាក់ ពាក់ព័ន្ធគ្រឿងញៀន រយៈពេល ៦ ខែ ដើមឆ្នាំ២០២៥

ក្នុងរយៈពេល ៦ខែ ក្នុងឆ្នាំ២០២៥ សមត្ថកិច្ចខេត្តក្រចេះ បានធ្វើការបង្ក្រាបបទល្មើសគ្រឿងញៀនសរុបចំនួន ៩២ករណី ចាប់ខ្លួនជនសង្ស័យចំនួន ១៥៦នាក់ ស្រី ៧នាក់។

នេះតាមការឱ្យដឹងពីលោកឧត្តមសេនីយ៍ទោ អ៊ូ សុបុណ្ណា ស្នងការនគរបាលខេត្តក្រចេះ នៅព្រឹកថ្ងៃទី២៦ ខែសីហា ឆ្នាំ២០២៥នេះ ក្នុងអង្គពិធី ប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ក្រោមប្រធានបទ “រួមគ្នា បង្ការ ទប់ស្កាត់ និងកាត់ផ្ដាច់ឫសគល់នៃបញ្ហាគ្រឿងញៀននៅកម្ពុជា” និងពិធីដុតបំផ្លាញ់គ្រឿងញៀន។

លោកឧត្តមសេនីយ៍ទោ អ៊ូ សុបុណ្ណា ស្នងការនគរបាលខេត្តក្រចេះ បានបន្តថា វត្ថុតាងដែលត្រូវបានដកហូតបាន រួមមាន៖ គ្រឿងញៀនប្រភេទមេតំហ្វេតាមីន (ICE) ចំនួន ៦០០កញ្ចប់ មានទំងន់ស្មើ ១៧៨៣.៩៤ក្រាម សារធាតុមិនច្បាស់លាស់មានចំនួន ១កញ្ចប់ ទម្ងន់ស្មើ ១.៨៧ក្រាម ជញ្ជីងសម្រាប់ថ្លឹងគ្រឿងញៀនចំនួន ១៨គ្រឿង ម៉ូតូចំនួន ៥៨គ្រឿង ទូរសព្ទ័ចំនួន ១២៨គ្រឿង ប្រាក់រៀលចំនួន ៤៥៧,០០០រៀល។

ក្នុងចំណោមទាំង ៩២ករណី ក្នុងនោះ បង្ក្រាបដោយនគរបាល ៦៧ករណី ចាប់ខ្លួនជនសង្ស័យ ១០៧នាក់ ស្រី ០៣នាក់ បង្ក្រាបដោយកងរាជអាវុធហត្ថ ចំនួន ២៥ករណី ចាប់ខ្លួនជនសង្ស័យចំនួន ៤៩នាក់ ស្រី ០៤នាក់ និងអនុវត្តដីការបង្គាប់ឱ្យចាប់ខ្លួន ចំនួន ២៨ដីកា ចាប់ខ្លួនមុខសញ្ញាចំនួន ២៥នាក់ ស្រី ០១នាក់។

ក្នុងរយៈពេល ៦ខែ ដើមឆ្នាំ២០២៥នេះដូចគ្នា មន្ត្រីអនុវត្តច្បាប់ និងអាជ្ញាធរពាក់ព័ន្ធ រួមជាមួយអាណាព្យាបាល បានបញ្ជូនជនរងគ្រោះមកធ្វើការព្យាបាលផ្តាច់សារធាតុញៀន នៅមជ្ឍមណ្ឌលក្រចេះឱកាសថ្មី ជាមជ្ឍមណ្ឌលបន្សាបគ្រឿងញៀន បានចំនួន ៧៤នាក់៕

អត្ថបទ ប្រុញ វិធិន