Update៖ សមត្ថកិច្ចបញ្ជាក់ពីមូលហេតុនៃការឆេះក្បាលរថភ្លើងនៅសង្កាត់សំរោងក្រោម

កាលពីវេលាម៉ោង​២រសៀល ថ្ងៃទី១០ ខែកញ្ញា ឆ្នាំ២០២៥ អគ្គិភ័យបានឆាបឆេះក្បាលរថភ្លើងមួយគ្រឿងយ៉ាងសន្ធោសន្ធៅ នៅចំណុចភូ​មិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។ ក្នុងប្រតិបត្តិការអន្តរាគមន៍ កម្លាំងសមត្ថកិច្ចជំនាញបានបញ្ចេញរថយន្តពន្លត់អគ្គិភ័យចំនួន០៣គ្រឿងទៅអន្តរាគមន៍នៅកន្លែងកើតហេតុ និងបានប្រើប្រាស់ទឹក​អស់០១ឡាន ស្មើរនឹង០៤ម៉ែត្រគូប។

តាមរបាយការណ៍របស់ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ករណីនេះកម្លាំងជំនាញបានប្រើពេល៣០នាទីដើម្បីបាញ់ទឹកពន្លត់ និងគ្រប់គ្រងស្ថានការបានមួយរយភាគរយ ដោយមិនមានការរាលដាលនោះទេ។

តាមការបញ្ជាក់ពីមន្ត្រីជំនាញ ករណីនេះបណ្តាលមកពីការផ្ទុះកុំម៉ាស័រម៉ាស៊ីនរទេះភ្លើង ទើបបង្កជាអគ្គិភ័យតែម្ដង។ ដោយឡែក នៅក្នុងហេតុការណ៍គ្រោះអគ្គិភ័យនេះ មិនបណ្តាញឲ្យមានអ្នករងរបួសនោះឡើយ។

តាមប្រភពមួយបានបង្ហើបថា រថភ្លើងដែលត្រូវអគ្គិភ័យឆាបឆេះនេះ គឺបានដឹកប្រេងពីខេត្តព្រះសីហនុ ចូលមករាជធានីភ្នំពេញ ហើយពេលមកដល់ចំណុចកើតហេតុក៏ត្រូវឆាបឆេះតែម្ដង៕