ក្រុម Manila មកលេងមុខព្រះបរមរាជវាំង រំសាយអារម្មណ៍ត្រៀមជួប ព្រះខ័នរាជស្វាយរៀង ស្អែក

កីឡាករ និងក្រុមការងារគ្រូបង្វឹករបស់ក្រុម Manila Digger FC បានឆ្លៀតពេលមកលេងកំសាន្តនៅមុខព្រះបរមរាជវាំងចតុមុខមង្គលនាព្រឹកថ្ងៃ សុក្រ ទី ៣១ ខែ តុលា ឆ្នាំ ២០២៥ មុនការប្រកួតចុងក្រោយពូល D នៃពានរង្វាន់ AFC Challenge League ទល់នឹងក្រុម ព្រះខ័នរាជស្វាយរៀង នៅពហុកីឡដ្ឋានជាតិមរតកតេជោ ថ្ងៃសៅរ៍ ទី ១ ខែ វិច្ឆិកា ឆ្នាំ ២០២៥ មកដល់។

ក្រុម Manila Digger FC របស់ ហ្វីលីពីន និងក្រុម ព្រះខ័នរាជស្វាយរៀង បានដឹកដៃគ្នាឡើងទៅកាន់វគ្គ ៨ ក្រុមចុងក្រោយពាន ACGL ជាផ្លូវការហើយ បន្ទាប់ពីឆ្លងកាត់ការប្រកួត ២ ប្រកួត ពួកគេឈ្នះទាំង ២ ប្រកួត និងមាន ៦ ពិន្ទុ​។ យ៉ាងណា ការប្រកួតនៅថ្ងៃស្អែក ក៏ជាការប្រកួតដ៏សំខាន់ផងដែរ ដោយក្រុមទាំង ២ ត្រូវប្រជែងយកជ័យជម្នះ ដើម្បីដណ្តើមចំណាត់ថ្នាក់កំពូលតារាងក្នុងពូល D។

គួរ​ឱ្យដឹងថា ក្រុម ព្រះខ័នរាជស្វាយរៀង ពេលនេះកំពុងឈរនៅកំពូលតារាងពូល D ដោយឆ្លងកាត់ ២ ប្រកួត យកឈ្នះលើក្រុម SP Falcons ៣-០ និង Ezra FC ៣-០ ទទួលបាន ៦ ពិន្ទុពេញ និងមានគ្រាប់ចំណេញ ៦ គ្រាប់។ ចំណែកក្រុម Manila វិញ កំពុងឈរនៅលេខរៀងទី ២ ដោយមាន ៦ ពិន្ទុដូចគ្នា បន្ទាប់ពីឆ្លងកាត់ ២ ប្រកួត បានយកឈ្នះលើក្រុម Ezra FC ២-០ និង SP Falcons ៣-១៕

អត្ថបទ៖ សេម កុសល