ការប្រកួតយប់មិញ បំបែកកំណត់ត្រាមានអ្នកទស្សនាផ្ទាល់ច្រើនបំផុតនៅវគ្គ១/២ ពាន ACGL

ការប្រកួតរវាងក្រុម ព្រះខ័នរាជស្វាយរៀង និងក្រុម ហ្វីលីពីន Manila Digger នៅពហុកីឡដ្ឋានជាតិមរតកតេជោ ថ្ងៃ ព្រហស្បតិ៍ ទី ៩ ខែ មេសា បានបំបែកកំណត់ត្រា ក្លាយជាការប្រកួតមានទស្សនាច្រើនបំផុតសម្រាប់វគ្គពាក់កណ្តាលផ្តាច់ព្រ័ត្រពាន AFC Challenge League។

ការប្រកួតជើងទី ១ វគ្គពាក់កណ្តាលផ្តាច់ព្រ័ត្រពាន ACGL រដូវកាល ២០២៥-២០២៦ រវាងក្រុម ព្រះខ័នរាជស្វាយរៀង និង Manila Digger បានបញ្ចប់ទៅដោយលទ្ធផលស្មើគ្នា ១ ទល់នឹង ១។ ក្រុមម្ចាស់ផ្ទះ ជាអ្នករកគ្រាប់បាល់នាំមុខមុន ដែលស៊ុតបញ្ចូលទីដោយកីឡាករ Tiago Alves នៅនាទីទី ៤។ ឈានចូលវគ្គទី ២ នាទីទី ៨៥ ខាងក្រុមភ្ញៀវ បានរកគ្រាប់បាល់តាមស្មើមកវិញ ដែលស៊ុតបញ្ចូលទីដោយកីឡាករ Pa Ousman Gai។

ជំនួបដ៏ធំនេះ បានទាក់ទាញអ្នកគាំទ្រចូលទស្សនាផ្ទាល់យ៉ាងច្រើនកុះកររហូតដល់ទៅ ១៦,៦០២ នាក់។ ស្ថិតិនេះ បានធ្វើឱ្យការប្រកួតយប់មិញ បំបែកកំណត់ត្រាការប្រកួតរវាងក្រុម ព្រះខ័នរាជស្វាយរៀង និង Madura United កាលពីរដូវកាលមុន ក្លាយជាការប្រកួតមានទស្សនាផ្ទាល់ច្រើនបំផុតប្រចាំវគ្គពាក់កណ្តាលផ្តាច់ព្រ័ត្រពាន ACGL ដោយពេលនោះមានអ្នកទស្សនាផ្ទាល់ចំនួន ១០,៧៦៥ នាក់។

នេះជាលើកទី ២ ហើយ ដែល ពហុកីឡដ្ឋានជាតិមរតកតេជោ កាន់កំណត់ត្រាមានអ្នកទស្សនាផ្ទាល់ក្នុងវគ្គពាក់កណ្តាលផ្តាច់ព្រ័ត្រពាន ACGL ច្រើនបំផុត ២ រដូវកាលជាប់គ្នា។ យ៉ាងណា ការប្រកួតវគ្គពាក់កណ្តាលផ្តាច់ព្រ័ត្រពាន ACGL រដូវកាលនេះមិនទាន់បញ្ចប់នោះទេ ដោយនៅសល់ ១ ជើងទៀត ដែលនឹងត្រូវកាត់សេចក្តីគ្នានៅជើងទី ២ ក្នុងប្រទេស ហ្វីលីពីន នាថ្ងៃទី ១៦ ខែ មេសា ឆ្នាំ ២០២៦។

ដូច្នេះកំណត់ត្រានេះ នឹងត្រូវរង់ចាំមើល ថាតើអ្នកគាំទ្រនៅទឹកដី ហ្វីលីពីន អាចបំបែកកំណត់ត្រាអ្នកគាំទ្រនៅទឹកដី កម្ពុជា បានឬទេ?

អត្ថបទ៖ សេម កុសល