សហព័ន្ធកីឡាប្រដាល់គុនខ្មែរ គ្រោងសាងសង់ សារមន្ទីរតម្កល់ប្រវត្តិ​ក្បាច់​គុនបុរាណខ្មែរ

សហព័ន្ធកីឡាប្រដាល់គុនខ្មែរ​ បានប្រកាសពីគម្រោងសាងសង់សារមន្ទីរ​កីឡានាពេលឆាប់ៗខាងមុខនេះ ដើម្បីតម្កល់ឯកសារ និងប្រវត្តិ​​ក្បាច់គុន​បុរាណខ្មែរ​ ក្រោមជំនួយរបស់ភាគីចិន។

លោក ហេង សុឃន អគ្គលេខាធិការសហព័ន្ធកីឡាប្រដាល់គុនខ្មែរ បានថ្លែងប្រាប់អ្នកសារព័ត៍មាន កាលពីថ្ងៃទី៣០ មករា​ម្សិលមិញនេះថា “នាពេលខាងមុខនេះ​ មិត្តចិននឹង​អភិវឌ្ឍ​វិស័យកីឡាប្រដាល់គុនខ្មែរ និងឃីកបុកសីង នៅកីឡដ្ឋាន​កងយោធពលខេមរៈភូមិន្ទ (ស្តាតចាស់) ដោយ​កែប្រែឲ្យស្របតាមកម្រិតស្តង់ដាអន្តរជាតិតែម្តង។ បច្ចុប្បន្ននេះ​ ក្រុមហ៊ុនឡុងហៃ កំពុង​សិក្សា​ពីហេដ្ឋារចនាសម្ព័ន្ធក្នុងស្តាត ដោយមានការឯកភាព​ពីឯកឧត្តម តែម ម៉ឺន ដើម្បីរៀបចំការប្រកួតស្តង់ដាអន្តរជាតិរបស់គុនខ្មែរតែម្តង”។

“ក្រោមការចរចារបស់ ឯកឧត្តម តែម ម៉ឺន គឺសហព័ន្ធនឹងធ្វើសារមន្ទីរ​មួយ ដើម្បីតម្កល់ឯកសារពីដូនតា ភស្តុតាងទាំងអស់ ធ្វើការផ្សព្វផ្សាយដល់ភ្ញៀវពិសេសអន្តរជាតិ ពេលដែលពួកគាត់មកទស្សនានៅទីនេះ ឲ្យគាត់មើលប្រវត្តិ​ និងស្វែងយល់ពីក្បាច់គុនបុរាណខ្មែរ។ ចំពោះគម្រោងសាងសង់នេះ អាចនឹងធ្វើឡើងពេលចប់​ព្រឹត្តការណ៍កីឡាស៊ីហ្គេម ដោយសារ​ពេលនេះ សហព័ន្ធកំពុង​មមាញឹកខ្លាំង ហើយ​វិស្វករកំពុងសិក្សាគម្រោង”។ លោក ហេង សុឃន បញ្ជាក់បន្ថែម។

បច្ចុប្បន្ន លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ កំពុងស្នើសុំគោលការណ៍​ពីសម្តេចពិជ័យសេនា ទៀបាញ់ ឧបនាយករដ្ឋមន្រ្តី រដ្ឋមន្រ្តី​ក្រសួងការពារជាតិ រៀបចំស្ដាតចាស់ ជា​ទីកន្លែងស្តង់ដាមួយ មានទាំងសង្វៀន សារមន្ទីរ​ និងហេរដ្ឋរចនាមួយចំនួនទៀត។

ស្របពេលជាមួយគ្នានោះ កម្ពុជាក៏​បានបញ្ចូនកីឡាករកម្ពុជា ១រូបទៅប្រកួតនៅប្រទេសចិន នាខែកុម្ភៈ​ខាងមុខផងដែរ គឺកីឡាករ លន បញ្ញា។ លោក​អគ្គលេខាធិការដដែល សង្កត់ធ្ងន់ថា “ការបញ្ជូនកីឡាករទៅប្រកួតនៅប្រទេសចិននេះ គឺជាការបង្កើនការទំនាក់ទំនង ផ្តល់ទំនុកចិត្ត​ឲ្យ​គ្នា ក្នុងការផ្លាស់ប្តូរកីឡាករ ព្រមជាមួយកិច្ចសហការពីទូរទស្សន៍ហឺណាន ដ៍ល្បីល្បាញនៅប្រទេសចិន។ ឆាប់ៗខាងមុខនេះ សហព័ន្ធនឹងបង្កើតឲ្យមានការប្រកួតលើប្រភេទកីឡា ឃីកបុកស៊ីង ២គូ ប្រដាល់គុនខ្មែរ ៦គូ តាមកម្រិតស្តង់ដាតែម្តង”។

លោកអគ្គលេខាធិការបញ្ជាក់បន្ថែមថា មួយរយៈពេលចុងក្រោយនេះ គុណផលរបស់អ្នកប្រដាល់កម្ពុជា គឺឡើងខ្លាំង ដោយទទួលបានលទ្ធផលល្អប្រសើរ ពេលឡើងទៅប្រកួតនៅ A​SEAN Championship នៅទីក្រុងបាងកក គឺល្អច្រើន ​បើកុំតែមានបញ្ហាបច្ចេកទេសពីអ្នករៀបចំ យើងយកមេដាយបានទាំងអស់៕

អត្ថបទ៖ Sok Leak