បួខាវ​ និងក្រុមកីឡា​ឃីកបុកស៊ីងរបស់ខ្លួន​ នឹងមកដល់កម្ពុជានៅថ្ងៃនេះ

បួខាវ ស្តេចប្រដាល់របស់ប្រទេសថៃ រួមដំណើរជាមួយក្រុមកីឡា​ឃីកបុកស៊ីងរបស់ខ្លួន​ ធ្វើដំណើរមកកម្ពុជានៅថ្ងៃនេះ សម្រាប់ការប្រកួតចាប់ពីថ្ងៃទី១៣​ ខែឧសភា តទៅ។ នេះបើតាមផុសផ្សាយរបស់ហ្វេសប៊ុកផេក​ SEA Games Cambodia 2023​ នៅព្រឹកថ្ងៃទី១២ ខែឧសភានេះ​ និងមានការចែករំលែកបន្ត ដោយរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ។

ក្នុងឱកាសនៃដំណើររបស់ក្រុមកីឡាឃីកបុកស៊ីង​របស់ប្រទេសថៃនេះ ក្រុមអ្នករៀបចំកម្មវិធីប្រកួតក្នុងព្រឹត្តិការណ៍កីឡា ស៊ីហ្គេម រួមនឹងថ្នាក់ដឹកនាំទាំងអស់ ស្នើឲ្យបងប្អូនប្រជាពលរដ្ឋខ្មែរទាំងអស់ រក្សាសេចក្តីថ្លៃថ្នូរ កុំប្រើការប្រមាថមើល​ងាយ​លើបុគ្គល​ណា​ឲ្យសោះ ត្រូវ​រក្សាតម្លៃក្នុងនាមជាម្ចាស់ផ្ទះ។

គួរបញ្ជាក់ថា វត្តមានរបស់បួខាវមកកម្ពុជានៅថ្ងៃនេះ គឺជាការដឹកនាំក្រុមឃីកបុកស៊ីងរបស់ប្រទេសថៃ មកប្រកួតនៅកម្ពុជា ក្នុងព្រឹត្តិការណ៍កីឡាស៊ីហ្គេម លើកទី៣២ ដោយការប្រកួតនេះចាប់ផ្តើមពីស្អែកនេះតទៅ៕