កីឡា

ល្បុក្កតោជើងឯកជាតិក្រសួងមហាផ្ទៃឈរនៅលំដាប់កំពូលតារាង

បានផុស

៥ years មុន

នៅ

ថ្ងៃចន្ទ ២៥ មករា ២០២១

ដោយ

ការប្រកួតកីឡាគុនល្បុក្កតោជើងឯកជាតិឆ្នាំ២០២០ ដែលចាប់ផ្ដើមប្រកួតពីថ្ងៃទី២១ ខែមករា នោះបានបញ្ចប់ហើយនៅយប់ថ្ងៃអាទិត្យទី២៤ ខែមករា ឆ្នាំ២០២១ ដោយមានការអញ្ជើញចូលរួមពីលោកបណ្ឌិតសភាចារ្យ ច័ន្ទ សារុន ប្រធានសហព័ន្ធកីឡាល្បុក្កតោកម្ពុជា លោកកែវ រ៉េមី អនុប្រធានទី១ លោក ហ៊ុល ប៊ុនថា អនុប្រធានទី២ លោកព្រឹទ្ធាចារ្យ សាន គឹមស៊ាន និង ព្រឹទ្ធាចារ្យគុនល្បុក្កតោជាច្រើនរូបទៀត នៅសាលាសកលវិទ្យាល័យភូមិន្ទភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតគុនល្បុក្កតោជើងឯកថ្នាក់ជាតិនេះ វិញ្ញាសាដែលដាក់ឲ្យប្រកួតមានចំនួន១៨វិញ្ញាសាដែលក្នុងនោះវិញ្ញាសាសម្ដែងទម្រង់មេគុនបុរសនារី មានចំនួន១២វិញ្ញាសា និងវិញ្ញាសាប្រយុទ្ធបុរសមាន៤ប្រភេទទម្ងន់ និងនារី ២ប្រភេទទម្ងន់ ។

ឆ្លងកាត់ការប្រកួតរយៈពេល៤ថ្ងៃ ក្រុមកីឡាគុនល្បុក្កតោក្រសួងមហាផ្ទៃ ប្រជែងបានចំណាត់ថ្នាក់លេខ១ ដោយដណ្តើមបានមេដាយសរុបចំនួន១៣ ក្នុងនោះមេដាយមាសចំនួន៧គ្រឿង និងមេដាយសំរិទ្ធចំនួន៦គ្រឿង ។

សាលាគុនល្បុក្កតោ តារាជ ឈរនៅលំដាប់លេខ២ ដោយប្រជែងបានមេដាយមាសចំនួន៦គ្រឿងនិងមេដាយប្រាក់ចំនួន១គ្រឿង ។ សាលាគុនល្បុក្កតោ សុវណ្ណអង្គរនាគរាជ ស្ថិតនៅលំដាប់លេខ៣ដោយបានមេដាយមាស៤គ្រឿង និងប្រាក់២គ្រឿង ។ សាលាគុនល្បុក្កតោ ឌីភីអេសអេស(DPSS) បានមេដាយមាស៣គ្រឿង និងមេដាយប្រាក់២គ្រឿង ។ ចំពោះសាលាគុនល្បុក្កតោ ខេមវើល បានមេដាយមាស២ និងសំរិទ្ធ ១ ។ សាលាគុនល្បុក្កតោព្រះស៊ីសុវត្ថិ(ដំរីស) បានមេដាយមាស១និងសំរិទ្ធ៤ សាលាគុនល្បុក្កតោ គោកធ្លក បានមេដាយមាស១ មេដាយប្រាក់២ និងសាលាគុនល្បុក្កតោលក្ខរ៉ៃយ៉ុង បានមេដាយមាស១ ។

ចំណែកសាលាគុនចំនួន១១ ប្រជែងបានត្រឹមតែមេដាយប្រាក់ និងមេដាយសំរិទ្ធប៉ុណ្ណោះហើយក៏មានសាលាគុនចំនួន៥ផ្សេងទៀត គឺពុំបានទទួលមេដាយនៅក្នុងការប្រកួតជើងឯកថ្នាក់ជាតិនេះទេ ។

សូមបញ្ជាក់ថា ការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិ ប្រចាំឆ្នាំ២០២០មានសាលាគុនចំនួន២៤ ដែលមានប្រតិភូគ្រូបង្វឹកនិងកីឡាករចំនួន១៩៣នាក់ មកពីរាជធានី-ខេត្ត ចំនួន១០ចូលរួម៕

អត្ថបទ ៖ វិសិទ្ធ

Related Topics:ក្រសួងមហាផ្ទៃ គុនល្បុក្កតោ

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា