ប្រធានអូឡាំពិករុស្ស៊ី ត្រូវបានដកចេញពីគណៈកម្មាធិការកម្មវិធីអូឡាំពិកអន្តរជាតិ

ប្រធានគណៈកម្មាធិការអូឡាំពិករុស្ស៊ី (ROC) លោក Stanislav Pozdnyakov ត្រូវបានដកចេញពីបញ្ជីសមាជិកថ្មីនៃគណៈកម្មការ​កម្មវិធីអូឡាំពិក របស់គណៈកម្មាធិការអូឡាំពិកអន្តរជាតិ (IOC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីវ័យ ៤៩ឆ្នាំរូបនេះទំនងជាត្រូវបានជំនួសដោយ លោក Jackie Cowan ដែលជាអនុប្រធានទីមួយ នៃសមាគមអូឡាំពិកចាម៉ៃកា។

ស្ថាប័ននេះដឹកនាំដោយលោក Karl Stoss សមាជិក IOC មកពីប្រទេសអូទ្រីស ត្រូវបានប្រគល់ភារកិច្ចក្នុងការវិភាគកម្មវិធីកីឡាអូឡាំពិករដូវក្តៅ រដូវរងា និងយុវជន និងបង្កើតសំណើសម្រាប់ការពិចារណាដលក្រមប្រឹក្សាប្រតិបត្តិរបស់ IOC។

លោក Pozdnyakov គឺជាអតីតកីឡាករគុនដាវអូឡាំពិកដែលធ្លាប់ឈ្នះមេដាយចំនួន ៥គ្រឿង។

មិនមែនតែម្នាក់នោះទេ ខណៈបញ្ជីគណៈកម្មាធិការ IOC ថ្មីដែលបានប្រកាសកាលពីសប្តាហ៍មុនគឺគួរឱ្យកត់សម្គាល់ស្រដៀងនឹងឆ្នាំ២០២២ មានការផ្លាស់ប្តូរមួយចំនួនផ្សេងទៀតដែលប៉ះពាល់ដល់មន្ត្រីរុស្ស៊ី។

មហាសេដ្ឋីរុស្ស៊ី លោក វ្ល៉ាឌីមៀ លីស៊ីន ដែលបានបាត់បង់តំណែងជាប្រធានសហព័ន្ធកីឡាបាញ់កាំភ្លើងអន្តរជាតិកាលពីខែវិច្ឆិកា ក៏មិនត្រូវបានចុះបញ្ជីជាសមាជិកនៃគណៈកម្មការភាពជាដៃគូពាណិជ្ជកម្ម និងប្រាក់ចំណូលទៀតផងដែរ។

ដោយឡែកអតីតអគ្គលេខាធិការអូឡាំពិករុស្សី ROC អ្នកនាង Anastasia Davydova ក៏លែងមានមុខងារក្នុងគណៈកម្មការអប់រំអូឡាំពិក។

ម្ចាស់មេដាយមាសកីឡាហែលទឹកអូឡាំពិក ៥សម័យកាល Davydova បានភៀសខ្លួនចេញពីប្រទេសរុស្ស៊ីកាលពីខែកញ្ញាឆ្នាំមុន ហើយត្រូវបានគេជឿថាបានផ្លាស់ទៅទីក្រុងឌូបៃ។

ការផ្លាស់ប្តូរទាំងនេះកើតឡើងនៅពេលដ៏រសើបមួយជាមួយនឹងសំណួរថាតើ ប្រសិនបើស្ថិតក្រោមលក្ខខណ្ឌច្បាស់លាស់ អត្តពលិកដែលមានលិខិតឆ្លងដែនរុស្ស៊ី ឬបេឡារុស្ស នឹងត្រូវបានអនុញ្ញាតឱ្យចូលរួមប្រកួតនៅ​អូឡាំពិក​ ឆ្នាំ​២០២៤​ នៅតែត្រូវដោះស្រាយដើម្បីភាពច្បាស់លាស់៕

ប្រែសម្រួល៖ មន្នីរ័ត្ន
ប្រភព៖ insidethegames.biz